୨୭ ବର୍ଷର ଅପେକ୍ଷା, ପାରିତ ନହୋଇ ପଡିରହିଛି ମହିଳା ସଂରକ୍ଷଣ ବିଲ।
କନକ ବ୍ୟୁରୋ: କୌଣସି ଗୋଟିଏ ବିଧେୟକକୁ ପାସ ହେବାକୁ କେତେ ସମୟ ଲାଗିଥାଏ? ଆମେ କହୁଛୁ ମହିଳା ସଂରକ୍ଷଣ ବିଲର କଥା ଯାହା ୧୯୯୬ରୁ ୨୦୨୩ ଯାଏ ପାସ ହୋଇପାରୁନାହିଁ । ଆପଣ ଭାବୁଥିବେ ନିହାତି ବିଲରେ କିଛି ଅସୁବିଧା ଅଛି ଯେଉଁକାରଣ ପାଇଁ ଏହା ପାରିତ ହୋଇପାରୁନାହିଁ । ଆପଣଙ୍କୁ କହିରଖିବାକୁ ଚାହୁଁଛୁ ଯେ ମହିଳା ସଂରକ୍ଷଣ ବିଲ ଲୋକସଭା, ରାଜ୍ୟସଭାରେ ମହିଳାଙ୍କୁ ୩୩ ପ୍ରତିଶତ ଆସନ ସଂରକ୍ଷଣ ପାଇଁ ପ୍ରସ୍ତାବ ରଖାଯାଇଛି । ତେବେ ଆସନ୍ତୁ ଜାଣିବା ଏହି ବିଧେୟକ କଣ? ଏହାର ଇତିହାସ କଣ? କିଏ ଏହାର ସମର୍ଥନ କରିଥିଲେ କିଏ ଏହାର ବିରୋଧ କରିଥିଲେ? ଏହା ଛଡା ଲୋକସଭା ଏବଂ ରାଜ୍ୟସଭାରେ ବର୍ତ୍ତମାନ ମହିଳାଙ୍କ ସଂଖ୍ୟା କେତେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଆପଣଙ୍କୁ ପ୍ରଥମେ କହିରଖିବାକୁ ଚାହୁଛୁ ଯେ ୨୦୧୪ରେ ଲୋକସଭାରେ ୧୨.୬ ପ୍ରତିଶତ ଏବଂ ରାଜ୍ୟସଭାରେ ୧୧.୪ ପ୍ରତିଶତ ମହିଳା ଥିଲେ । ପରେ ୨୦୧୯ରେ ହୋଇଥିବା ନିର୍ବାଚନରେ ଲୋକସଭାରେ ୧୪.୯ ପ୍ରତିଶତ ଏବଂ ରାଜ୍ୟସଭାରେ ୧୪.୫ ପ୍ରତିଶତ ମହିଳା ଥିଲେ । ତେବେ ଏହା ନୁହେଁ ଯେ ମହିଳା ସଂରକ୍ଷଣ ବିଲ ବାବଦରେ ଆଜି ଚର୍ଚ୍ଚା ହେଉଛି । ପୂର୍ବରୁ ମଧ୍ୟ ଅନେକ ଥର ଏହି ବିଧେୟକ ବାବଦରେ ଚର୍ଚ୍ଚା ହୋଇଛି । ଏହି ବିଧେୟକକୁ ୨୦୦୮ରେ ୟୁପିଏ ସରକାର ସମୟରେ ରାଜ୍ୟସଭାରେ ଉପସ୍ଥାପନ କରାଯାଇଥିଲା । ସେଠାରୁ ଏହାକୁ ସ୍ଥାୟୀ ସମିତି ବା ଷ୍ଟାଣ୍ଡିଂ କମିଟିକୁ ପଠାଇଦିଆଯାଇଥିଲା । ୨୦୧୦ରେ ଏହି ବିଧେୟକକୁ ରାଜ୍ୟସଭାରେ ମଞ୍ଜୁରୀ ମିଳିଯାଇଥିଲା । ସେଠାରୁ ଲୋକସଭାକୁ ମଞ୍ଜୁରୀ ଦେବା ପାଇଁ ପଠାଇଦିଆଯାଇଥିଲା । ତେବେ ଏହି ସମୟରେ ଲୋକସଭା ଭଙ୍ଗ ହୋଇଥିଲା ଯାହା ଫଳରେ ଏହାର ଅବଧି ଶେଷ ହୋଇଯାଇଥିଲା ।
ପୁଣି ଥରେ ଏହି ବିଲକୁ ନେଇ ଚର୍ଚ୍ଚା ଆରମ୍ଭ ହୋଇଛି । ବିଆରଏସ ନେତ୍ରୀ କେ କବିତା ଏହାକୁ ନେଇ ଚର୍ଚ୍ଚା ଆରମ୍ଭ କରିଛନ୍ତି । ସେ ଏହାକୁ ନେଇ ଧାରଣାରେ ବସିଯାଇଛନ୍ତି । ତଥ୍ୟକୁ ଯଦି ଦେଖିବା ମହିଳାଙ୍କ ପ୍ରତିନିଧିତ୍ୱ ମାମଲାରେ ଭାରତ ୧୯୩ ଦେଶ ମଧ୍ୟରେ ୧୪୮ ତମ ସ୍ଥାନରେ ରହିଛି । ଲୋକସଭାରେ ୫୪୩ ସାଂସଦଙ୍କ ମଧ୍ୟରୁ ୭୮ ଜଣ ମହିଳା ସଦସ୍ୟ ରହିଛନ୍ତି । ଯାହା ମୋଟ ସାଂସଦଙ୍କ ୧୪.୪ ପ୍ରତିଶତ । ତେଣୁ ପ୍ରଶ୍ନ ଉଠିବା ସ୍ୱାଭାବିକ ଯେ ଏହି ବିଧେୟକକୁ କାହିଁକି ପାରିତ କରାଯାଇପାରୁନାହିଁ । କେଉଠି ଅସୁବିଧା ରହୁଛି ଯେଉଁ କାରଣରୁ ସଂସଦରେ ଏହି ପ୍ରସ୍ତାବ ପାସ ହେବା ପାଇଁ ୨୭ ବର୍ଷ ଧରି ଅପେକ୍ଷା କରିବାକୁ ପଡିଛି ।
ଆସନ୍ତୁ ପ୍ରଥମେ ଜାଣିବା ମହିଳା ସଂରକ୍ଷଣ ବିଲ କଣ?
୧୯୯୩ ମସିହାରେ ଯେତେବେଳେ ସମ୍ବିଧାନ ସଂଶୋଧନ କରାଯାଇଥିଲା ସେତେବେଳେ ଏହି ବିଲ ବାବଦରେ ଚର୍ଚ୍ଚା ଆରମ୍ଭ ହୋଇଥିଲା । ଏହି ବିଧେୟକ ଜରିଆରେ ଲୋକସଭା, ରାଜ୍ୟସଭର ସମସ୍ତ ବିଧାନସଭା କ୍ଷେତ୍ରରେ ମହିଳାଙ୍କ ପାଇଁ ୩୩ ପ୍ରତିଶତ ଆସନର ସଂରକ୍ଷଣ କରିଥାଏ । ଏହାକୁ ସମସ୍ତ ଅଞ୍ଚଳରେ ଆବଣ୍ଟିତ କରାଯାଇଥାଏ । ଏହି ଆଇନ ଲାଗୁ ହେବା ପରେ ୧୫ ପରେ ମହିଳାଙ୍କ ହୋଇଥିବା ସଂରକ୍ଷଣ ଶେଷ ହୋଇଯିବ ।
ଏହି ବିଲକୁ କଂଗ୍ରେସ, ଆପ, ଶିବସେନା, ଅକାଳୀ ଦଳ, ପିଡିପି, ନ୍ୟାସନାଲ କନଫରେନ୍ସ, ଟିଏମସି, ଜେଡିୟୁ, ସିପିଆଇ, ସିପିଏମ, ଏନସିପି, ସପା, ଆରଜେଡି ଆଜି ବି ଏହାକୁ ସମର୍ଥନ କରୁଛନ୍ତି । ୨୦୧୦ରେ ଏହାକୁ ସମାଜବାଦୀ ପାର୍ଟି, ଜେଡିୟୁ, ଆରଜେଡି, ଏଆଇଏମଆଇଏମ, ବିଏସପି ବିରୋଧ କରୁଥିଲେ । ସେହିଭଳି ଆରଜେଡି, ଶିବସେନା, ଟିଡିପି ଏଆଇଏଡିଏମକେ, ବିଜେଡି, ଆସାମ ଗଣପରିଷଦ ଏହାକୁ ସମର୍ଥନ କରିଥିଲେ ।
ଏବେ କଥା ହେବା ୧୯୯୬ରେ ଯେତେବେଳେ ଏହି ବିଧେୟକୁ ଉପସ୍ଥାପନା କରାଯାଇଥିଲା । ଏହି ବିଲ ୨୭ ବର୍ଷ ଧରି ପାରିତ ହୋଇନପାରି ପଡିରହିଛି ।
ପ୍ରଶ୍ନ ଉଠୁଛି କାହିଁକି ଏହି ବିଲ ଜରୁରୀ ?
ଗ୍ଲୋବାଲ ଜେଣ୍ଡର ଗ୍ୟାପ୍ ରିପୋର୍ଟ ୨୦୨୧ ଅନୁସାରେ ଭାରତରେ ପଲିଟିକାଲ ଏମପାୱାରମେଣ୍ଟ ଇଣ୍ଡେକ୍ସରେ ୧୩.୫ ପ୍ରତିଶତର ହ୍ରାସ ଦେଖିବାକୁ ମିଳିଛି । ଯଦି ମହିଳା ମନ୍ତ୍ରୀଙ୍କ କଥା ଦେଖିବା ୨୦୧୯ରେ ଏହା ୨୩.୧ ପ୍ରତିଶତ ଥିଲା ଯାହା ୨୦୨୧ରେ କମି ୯.୧ ପ୍ରତିଶତରେ ପହଞ୍ଚିଯାଇଛି । ସରକାର ଏହାକୁ ମଧ୍ୟ ଗ୍ରହଣ କରିଛନ୍ତି ଯେ ସଂସଦ ଏବଂ ବିଧାନସଭାରେ ମହିଳାଙ୍କ ପ୍ରତିନିଧିତ୍ୱ କମ ହେବାରେ ଲାଗିଛି । ୧୯୯୬ରୁ ନେଇ ୨୦୧୦ ମଧ୍ୟରେ ୮ ଥର ଏହି ବିଧେୟକକୁ ପାସ ପାଇଁ ଉଦ୍ୟମ କରାଯାଇଥିଲା । କିନ୍ତୁ ଏହା ସମ୍ଭବ ହୋଇପାରିନଥିଲା ।