ବାବରଙ୍କ ଉପରେ ବର୍ଷିଲେ ଆଫ୍ରିଦି । କହିଲେ କୋହଲି ଓ ରାହୁଲଙ୍କ ଠାରୁ ଖେଳିବା ଶିଖ ।
କନକ ବ୍ୟୁରୋ : ଚଳିତ ବିଶ୍ୱକପରେ ପାକିସ୍ତାନର ପ୍ରଦର୍ଶନ ନୈରାଶ୍ୟଜନକ ରହିଛି । ଦଳ ଏଯାଏଁ ୭ଟି ମ୍ୟାଚ୍ ଖେଳି ସାରିଥିବା ବେଳେ ସେମିଫାଇନାଲ ଟିକେଟ ନିଶ୍ଚିତ କରିପାରିନି । ବରଂ ଦଳର ସେମିଫାଇନାଲ ଖେଳିବା ନେଇ ସସପେନ୍ସ ଲାଗି ରହିଛି । ପରବର୍ତ୍ତୀ ୨ଟି ମ୍ୟାଚରେ ପାକିସ୍ତାନ ବିଜୟ ହାସଲ ନ କଲେ ବିଶ୍ୱକପ ଅଭିଯାନ ଶେଷ କରିବ ଦଳ । ବାଂଲାଦେଶ ବିପକ୍ଷରେ ବିଜୟୀ ହେବା ପରେ ପାକିସ୍ତାନର ସେମିଫାଇନାଲ ଖେଳିବା ଆଶା କିଛି ମାତ୍ରାରେ ଉଜ୍ଜିବୀତ ହୋଇଛି ସତ କିନ୍ତୁ ପରବର୍ତ୍ତୀ ୨ଟି ମ୍ୟାଚ୍ ବାବରଙ୍କ ପାଇଁ ବେଶ ଗୁରୁତ୍ୱ ବହନ କରୁଛି । ତେବେ ପାକିସ୍ତାନର ପ୍ରଦର୍ଶନକୁ ନେଇ ବର୍ଷିଛନ୍ତି ଦଳର ପୂର୍ବତନ ଖେଳାଳୀ ସାହିଦ ଆଫ୍ରିଦି । ଖାସକରି ବାବରଙ୍କ ଖେଳିବାର ଶୈଳୀକୁ ନେଇ ପ୍ରଶ୍ନ କରିଛନ୍ତି ସାହିଦ ।
Kanak News is now on WhatsApp
Join and get latest news updates delivered to you via WhatsApp
ସାହିଦ କହିଛନ୍ତି, ବାବରଙ୍କ ବ୍ୟାଟରୁ ରନ୍ ଆସିବା ଏବଂ ବାବର ଦଳକୁ ବିଜୟୀ କରାଇବା ୨ଟି ଭିନ୍ନ ଭିନ୍ନ କଥା । ଭାରତୀୟ ବ୍ୟାଟରଙ୍କ ଉଦାହରଣ ରଖି ସାହିଦ କହିଛନ୍ତି, ବିରାଟ କୋହଲି ଓ କେଏଲ ରାହୁଲଙ୍କୁ ଦେଖନ୍ତୁ ସେମାନେ ନିଜ ଟିମ୍ ପାଇଁ କଣ କରୁଛନ୍ତି । ସେମାନେ ମୈଦାନରେ ରହୁଛନ୍ତି, ରନ୍ କରୁଛନ୍ତି ଏବଂ ମ୍ୟାଚ୍ ଜିତାଇ ଫେରୁଛନ୍ତି । କିନ୍ତୁ ବାବର ଆଜମଙ୍କ କ୍ଷେତ୍ରରେ ସେଭଳି କିଛି ଦେଖିବାକୁ ମିଳୁନାହିଁ । ବାବର ଆଜମ ପଡିଆକୁ ଆସିଲେ ମଧ୍ୟ ଲାଗୁନି ଯେ, ସେ ମ୍ୟାଚ୍ ଜିତାଇ ଯାଇପାରିବେ ବୋଲି । ଏମିତି ଲାଗୁଛି ବାବର ୫୦ ରନ୍ କରି ପ୍ୟାଭିଲିୟନ ଫେରିବେ । ଆମକୁ ଏଭଳି ଏକ ଖେଳାଳୀଙ୍କର ଆବଶ୍ୟକତା ରହିଛି ଯିଏ ଶେଷ ପର୍ଯ୍ୟନ୍ତ କ୍ରିଜରେ ରହି ମ୍ୟାଚ୍ ଜିତାଇ ପାରୁଥିବ । ଦଳକୁ ଜଣେ ମ୍ୟାଚ୍ ୱିନର ଖେଳାଳୀଙ୍କର ଆବଶ୍ୟକତା ରହିଛି । ମୁଁ ବାବରଙ୍କର ବଡ ପ୍ରଂଶସକ । କିନ୍ତୁ ବାବର ନିଜର ପ୍ରଦର୍ଶନରେ ବାରମ୍ବାର ନିରାଶ କରି ଆସୁଛନ୍ତି । ଯଦି ଶ୍ରେଷ୍ଠ ଖେଳାଳୀ ତାଲିକାରେ ସାମିଲ ହେବାକୁ ଇଚ୍ଛା ଅଛି ତେବେ ଶ୍ରେଷ୍ଠ ପ୍ରଦର୍ଶନ କରିବାର ମଧ୍ୟ ଆବଶ୍ୟକତା ରହିଛି ।
ବାବର ବିଶ୍ୱର ଏକ ନମ୍ବର ବ୍ୟାଟର ହୋଇଥିଲେ ମଧ୍ୟ ଚଳିତ ବିଶ୍ୱକପରେ ତାଙ୍କ ବ୍ୟାଟରୁ ବଡ ଇନିଂସ ଦେଖିବାକୁ ମିଳୁନାହିଁ । ଏବେ ପର୍ଯ୍ୟନ୍ତ ବାବର ୭ଟି ମ୍ୟାଚରୁ ୨୧୬ ରନ କରିଛନ୍ତି । କିନ୍ତୁ ବାବରଙ୍କ ବ୍ୟାଟରୁ ଏଯାବତ କୌଣସି ମ୍ୟାଚ୍ ବିଜୟୀ ଇନିଂସ ଦେଖିବାକୁ ମିଳିନାହିଁ । ଯାହାକୁ ନେଇ ସୋସିଆଲ ମିଡ଼ିଆରେ ବାବରଙ୍କୁ ଟ୍ରୋଲ କରିଛନ୍ତି ୟୁଜର୍ସ । ସତରେ କଣ ବାବର ବିଶ୍ୱର ଏକ ନମ୍ବର କ୍ରିକେଟର କି ବୋଲି ପ୍ରଶ୍ନ କରିଛନ୍ତି ୟୁଜର୍ସ । ଅନ୍ୟପଟେ ପାକିସ୍ତାନ ନିଜର ପରବର୍ତ୍ତୀ ଦୁଇଟି ମ୍ୟାଚ୍ ଶକ୍ତିଶାଳୀ ନ୍ୟୁଜିଲାଣ୍ଡ ଓ ଇଂଲଣ୍ଡ ବିପକ୍ଷରେ ଖେଳିବ । ଏହି ୨ ମ୍ୟାଚରେ ପାକିସ୍ତାନକୁ ନିଶ୍ଚିତ ବିଜୟ ଆବଶ୍ୟକ । ନଚେତ ପାକିସ୍ତାନର ବିଶ୍ୱକପ ଅଭିଯାନ ଲିଗ୍ ପର୍ଯ୍ୟାୟରୁ ହିଁ ଶେଷ ହେବ ।