ଭାରତରେ ‘ଆଫ୍ରିକାନ ସ୍ୱାଇନ ଫ୍ଲୁ’ ଆତଙ୍କ: ଆସାମରେ ୨୮ ଶହରୁ ଅଧିକ ଘୁଷୁରି ମୃତ; ଜାଣନ୍ତୁ କରୋନା ସହ କଣ ରହିଛି ଏହି ଭାଇରସର ସଂପର୍କ ଓ ମଣିଷ ପ୍ରତି ରହିଛି କି ବିପଦ ?
କନକ ବ୍ୟୁରୋ: କରୋନା ମହାମାରୀ ସହ ଲଢେଇ କରୁଛି ସାରା ବିଶ୍ୱ । ଦିନକୁ ଦିନ କରୋନାର ପ୍ରକୋପ ଅତି ଭୟଙ୍କର ହେଉଥିବା ବେଳେ ଏହାକୁ ରୋକିବା ବର୍ତ୍ତମାନ ସମସ୍ତଙ୍କ ପାଇଁ ମୁସ୍କିଲ ହୋଇପଡିଛି । ଆଉ ଏହାରି ଭିତରେ ଦେଶରେ ଆଉ ଏକ ଘାତକ ଭୁତାଣୁ ତଥା ଆଫ୍ରିକାନ ସ୍ୱାଇନ ଫ୍ଲୁ ମାମଲା ସାମ୍ନାକୁ ଆସିଛି । ଯାହା ବର୍ତ୍ତମାନ ଆସାମରେ ତାଣ୍ଡବ ରଚିଛି ।
Kanak News is now on WhatsApp
Join and get latest news updates delivered to you via WhatsApp
ଆସାମ ସରକାରଙ୍କ ସୂଚନା ଅନୁସାରେ, ଏହି ରୋଗରେ ଶିକାର ହୋଇ ଆସାମରେ ବର୍ତ୍ତମାନ ୨୮ ଶହ ଘୁଷୁରିଙ୍କର ମୃତ୍ୟୁ ଘଟିଲାଣି । ଆସାମର ପଶୁପାଳନ ଏବଂ ପଶୁ ଚିକିତ୍ସା ମନ୍ତ୍ରୀ ଅତୁଲ ବୋରା ଏସଂକ୍ରାନ୍ତରେ ସୂଚନା ଦେଇ କହିଛନ୍ତି ଯେ, ରାଜ୍ୟରେ ଆଫ୍ରିକାନ ସ୍ୱାଇନ ଫ୍ଲୁ ମାମଲା ଏବେ ନଜରକୁ ଆସିଛି । ଏଯାବତ୍ ଏହି ରୋଗ ଆସାମର ପାଖାପାଖି ୮ଟି ଜିଲ୍ଲାର ୩୦୬ଟି ଗାଁକୁ ବ୍ୟାପିଗଲାଣି । ଫଳରେ ଏହି ରୋଗର ଶିକାର ହୋଇ ୨୮ ଶହ ଘୁଷୁରିଙ୍କ ଜୀବନ ଗଲାଣି । ସେପଟେ ଏନଆଇଏଚଏସଡି ମଧ୍ୟ ଆଫ୍ରିକାନ ସ୍ୱାଇନ ଫ୍ଲୁ ସଂପର୍କରେ ସ୍ପଷ୍ଟ କରିଛି । ତେବେ ଏହି ସଂକ୍ରମଣ ଏତ ଭୟଙ୍କର କି ଏଥିରେ ସଂକ୍ରମିତ ଘୁଷୁରିଙ୍କର ମୃତ୍ୟୁହାର ଶତ ପ୍ରତିଶତ ରହିଥାଏ ।
ସେହିଭଳି ଏହି ଆଫ୍ରିକାନ ସ୍ୱାଇନ ଫ୍ଲୁ ଘୁଷୁରି ମାଂସ, ତାର ଲାଳ, ରକ୍ତ ଏବଂ ଟିସ୍ୟୁ ଦ୍ୱାରା ବ୍ୟାପିଥାଏ । ସରକାରୀ ସୂଚନା ମୁତାବକ, ୨୦୧୯ରେ ଚୀନର ଜିଆଙ୍ଗ ପ୍ରଦେଶର ଏକ ଗାଁରେ ଏହି ରୋଗ ପ୍ରଥମେ ଦେଖାଦେଇଥିଲା । ଯାହାକି ଅରୁଣାଚଳ ପ୍ରଦେଶର ସୀମାବର୍ତ୍ତୀ । ତେବେ ଆସାମରେ ଏହି ରୋଗ ଚଳିତ ବର୍ଷ ଫେବ୍ରୁଆରୀରୁ ହିଁ ଦେଖାଦେଇଛି । ତେଣୁ ରୋଗଟି ଚୀନରୁ ଅରୁଣାଚଳ ପ୍ରଦେଶ ଦେଇ ଆସାମରେ ପହଂଚିଥିବା ନେଇ ଅନୁମାନ କରାଯାଉଛି । ସେପଟେ କରୋନା ମହାମାରୀ ସହ ଏହାର କୌଣସି ସଂପର୍କ ନଥିବା ବେଳେ ଏହା ମଣିଷ ପ୍ରତି କୌଣସି ବିପଦ ନଥିବା ଜଣାପଡିଛି ।