ଆଫଗାନରେ ତାଲିବାନୀଙ୍କ ବର୍ବର କାଣ୍ଡ, କାଟିଦେଲେ ମହିଳା ଭଲ୍ଲି ବଲ୍ ଖେଳାଳୀଙ୍କ ମୁଣ୍ଡ
କନକ ବ୍ୟୁରୋ : ଯେବେଠାରୁ ଆଫଗାନିସ୍ତାନରେ ତାଲିବାନୀଙ୍କ ସରକାର ଆରମ୍ଭ ହୋଇଛି ସେବେଠୁ ଖେଳ ଓ ଖେଳାଳୀଙ୍କ ଭବିଷ୍ୟତ ସଂକଟ ଭିତରେ ରହିଛି । ଏବେ ଏକ ଆଶ୍ଚର୍ଯ୍ୟ କରିଦେବା ଭଳି ଖବର ସାମ୍ନାକୁ ଆସିଛି । ତାଲିବାନୀ ଯୋଦ୍ଧାମାନେ ଜଣେ ଆଫଗାନ ମହିଳା ଭଲ୍ଲି ବଲ୍ ଖେଳାଳୀଙ୍କ ମୁଣ୍ଡ କାଟି ହତ୍ୟା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜୁନିୟର ମହିଳା ଭଲ୍ଲି ବଲ୍ ଟିମର କୋଚ ଏଜ ଅର୍ନ୍ତରାଷ୍ଟ୍ରୀୟ ଗଣମାଧ୍ୟମକୁ ସୂଚନା ଦେଇ କହିଛନ୍ତି କି, ମହଜବୀନ ହକିମୀ ନାମକ ଜଣେ ମହିଳା ଭଲ୍ଲି ବଲ୍ ଖେଳାଳୀଙ୍କୁ ଅକ୍ଟୋବର ମାସ ଆରମ୍ଭରେ ତାଲିବାନୀମାନେ ମୁଣ୍ଡକାଟି ହତ୍ୟା କରିଛନ୍ତି । ଏନେଇ ବାହାରେ ପ୍ରକାଶ ନକରିବାକୁ ସେମାନେ ମହଜବୀନଙ୍କ ପରିବାର ଲୋକଙ୍କୁ ଧମକ ଦେଇଥିଲେ ।
କହିରଖୁ କି ଆଫଗାନରେ ଯେତେବେଳେ ଅସରଫ ଘନିଙ୍କ ସରକାର ଥିଲା ସେତେବେଳେ ମହଜବୀନ କାବୁଲ ଲୋକାଲ କ୍ଲବ ରେ ଭାଗ ନେଇଥିଲେ । ସେ କ୍ଲବର ଜେଣ ତାରାକା ଖେଳାଳୀ ଥିଲେ । ଏବେ ତହଜବୀନଙ୍କ ମୃତଦେହର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଦଳ ପ୍ରଶିକ୍ଷକଙ୍କ କହିବା ମୁତାବକ ଅଗଷ୍ଟ ମାସରେ ଯେତେବେଳେ ତାଲିବାନ ଆଫଗାନିସ୍ତାନକୁ ଦଖଲ କଲା ସେତେବେଳେ ଏହି ଟିମର ଜଣେ କି ଦୁଇଜଣ ଖେଳାଳୀ ବାହାର ଦେଶକୁ ପଳାୟନ କରିବାରେ ସଫଳ ହୋଇଥିଲେ । ହେଲେ ମହଜବୀନ ବାହାରକୁ ପଳାଇଯିବାରେ ସକ୍ଷମ ହୋଇ ନଥିଲେ । ଯାହା ଫଳରେ ତାଙ୍କୁ ଜୀବନ ଦେବାକୁ ପଡିଛି ।
ସୂଚନା ଥାଉକି ଆଫଗାନରେ ତାଲିବାନୀ ମାନଙ୍କ ଶାସନ ଆରମ୍ଭ ହେବା ପରେ ମହିଳା ମାନଙ୍କୁ ସେମାନଙ୍କ ଅଧିକାରରୁ ବଞ୍ଚିତ କରାଯାଉଛି । ଆଫଗାନରେ ସବୁପ୍ରକାର ଖେଳ ଓ ଖେଳାଳୀଙ୍କ ଉପରେ ଚାପ ପକାଯାଉଛି । ପ୍ରଶିକ୍ଷକଙ୍କ କହିବା ମୁତାବକ ଏବେ ସବୁଠାରୁ ସଂକଟରେ ରହିଛନ୍ତି ମହିଳା ଖେଳାଳୀ ।