କନକ ବ୍ୟୁରୋ : ସାରା ବିଶ୍ୱ ଆଶା କରୁଛି କି ତାଲିବାନ ଆଫଗାନିସ୍ତାନରେ ତା’ର ପୁରୁଣା ଆଇନ ଲାଗୁ ନକରି ମୁଖ୍ୟସ୍ରୋତରେ ସାମିଲ ହେବ । ହେଲେ ତାଲିବାନ ଏବେ ଏମିତି ଏକ ଆଇନ ଘୋଷଣା କରିଛି, ଯାହାକୁ ଶୁଣିବା ପରେ ସାରା ବିଶ୍ୱ ଚକିତ ହୋଇ ପଡିଛି । ତାଲିବାନ ସରକାରରେ ସାମିଲଥିବା ମୁଲ୍ଲା ନୁରଓଦ୍ଧିନ ତୁରାବି କହିଛନ୍ତି କି ଦୋଷୀକୁ ଫାଶି ଓ ହାତ କାଟିଦେବା ଭଳି ଦଣ୍ଡ ପୁଣିଥରେ ଆଫଗାନିସ୍ତାନରେ ଲାଗୁ ହେବାକୁ ଯାଉଛି । ଏହି ଘୋଷଣା ପରେ ବିଶ୍ୱରେ ନ୍ୟାୟ ବ୍ୟବସ୍ଥା ଉପରେ ଭରଶା କରୁଥିବା ଲୋକଙ୍କୁ ଝଟକା ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ତାଲିବାନ ସରକାରରେ ସାମିଲ ହୋଇଥିବା ମୁଲ୍ଲା ନୁରଓଦ୍ଧିନ ତୁରାବୀ ‘ଦ ଏସୋସିଏଟେଡ ପ୍ରେସ’ କୁ ଦେଇଥିବା ଏକ ଇଣ୍ଟରଭ୍ୟୁରେ କହିଛନ୍ତି ଯେ ଫାଶି ଓ ଶରୀରର କୌଣସି ଅଙ୍ଗ କାଟିବା ଭଳି ଦଣ୍ଡ ପୁଣି ଆଫଗାନରେ ଲାଗୁ କରାଯିବ । ହେଲେ ଏବେ ଦଣ୍ଡରେ ଦଣ୍ଡିତ କରାଯିବା ବେଳେ ତାହାକୁ ସାର୍ବଜନିକ ପ୍ରଦର୍ଶନ କରାଯିବ ନାହିଁ ।
ମୁଲ୍ଲା ନୁରଦ୍ଦିନ କହିଛନ୍ତି କି ଲୋକଙ୍କୁ ଷ୍ଟାଡିୟମରେ ଏଭଳି ଦଣ୍ଡ ଦେବାକୁ ନେଇ ଲୋକମାନେ ଆମକୁ ସମାଲୋଚନା କରୁଥିଲେ । ହେଲେ ଆମେ ସେମାନଙ୍କୁ ଆଇନ ଓ ଦଣ୍ଡ ବାବଦରେ କିଛି କହିନାହୁଁ । ସେ ଆହୁରି କହିଛନ୍ତି କି ‘ଆମେ ଦୁନିଆକୁ କହିବାକୁ ଚାହୁଁନାହୁଁ ଆମର ଦଣ୍ଡ ବ୍ୟବସ୍ଥା କିଭଳି ରହିବ , ଆମେ ଇସଲାମର ପାଳନ କରିବୁ ଓ କୁରାନ ଆଧାରରେ ଆମର ଆଇନ ପ୍ରସ୍ତୁତ କରିବୁ ।’
ତାଲିବାନ ନେତା ନୁରଦ୍ଦିନ କହିଛନ୍ତି କି ସୁରକ୍ଷା କାରଣରୁ ଦୋଷୀଙ୍କ ହାତ କାଟିଦେବା ନିହାତି ଆବଶ୍ୟକ । ଏଭଳି ଦଣ୍ଡ ପାଇବା ଫଳରେ ଦେଶରେ ଅପରାଧ ଓ ଅପରାଧୀଙ୍କ ସଂଖ୍ୟା କମିବ ବୋଲି ସେ ଦାବି କରିଛନ୍ତି । ଏନେଇ ତାଲିବାନ କ୍ୟାବିନେଟରେ ବିଚାର ବିମର୍ଷ ଚାଲିଥିବା କଥା ସେ କହିଛନ୍ତି । ଏନେଇ ତାଲିବାନ ଏକ ନୀତି ବିକଶିତ କରୁଥିବା କଥା ସେ ଗଣମାଧ୍ୟମକୁ କହିଛନ୍ତି ।