ପ୍ରଥମ ଟେଷ୍ଟରେ ଶୋଚନୀୟ ପରାଜୟ ପରେ ଦ୍ୱିତୀୟ ଟେଷ୍ଟ ଉପରେ ନଜର । ଟିମରେ ପରିବର୍ତ୍ତନ ପାଇଁ ପରାମର୍ଶ । ପୃଥ୍ୱୀ ସ’ଙ୍କ ସ୍ଥାନରେ ରାହୁଲଙ୍କୁ ଖେଳାଇବାକୁ ଗାଭାସ୍କରଙ୍କ ପରାମର୍ଶ ।
କନକ ବ୍ୟୁରୋ : ଆଡିଲେଡ ଟେଷ୍ଟର ଦ୍ୱିତୀୟ ଇନିଂସରେ ୩୬ରନର ସ୍କୋର ପରେ ଅଷ୍ଟ୍ରେଲିଆ ନିକଟରୁ ଭାରତର ଶୋଚନୀୟ ପରାଜୟ ହୋଇଛି । ଏଥିସହ ୪ମ୍ୟାଚ ବିଶିଷ୍ଟ ସିରିଜରେ ଭାରତ ୧-୦ରେ ପଛୁଆ ରହିଛି । ଏହି ପରାଜୟ ପରେ ଭାରତର ସମସ୍ୟା ବଢିଯାଇଛି । ମେଲବର୍ଣ୍ଣ ଟେଷ୍ଟରେ ପୃଥ୍ୱୀ ସଙ୍କ ସ୍ଥାନରେ କେଏଲ ରାହୁଲ ଖେଳିବା ଉଚିବ ବୋଲି କହିଛନ୍ତି ସୁନୀଲ ଗାଭାସ୍କର । ସେହିପରି ୱିକେଟ କିପର ରିଦ୍ଧିମାନ ଶାହାଙ୍କ ସ୍ଥାନରେ ଋଷଭ ପନ୍ଥଙ୍କୁ ଖେଳାଇବା ପାଇଁ ପରାମର୍ଶ ଦେଇଚନ୍ତି ଟିମ ଇଣ୍ଡିଆ ପୂର୍ବତନ ମୁଖ୍ୟ ଚୟନକର୍ତ୍ତା ଏମଏସକେ ପ୍ରସାଦ । ପ୍ରଥମ ଟେଷ୍ଟର ପରାଜୟକୁ ଭୁଲି ନୂଆ ଭାବେ ଆରମ୍ଭ କଲେ ଦଳ ପୁଣି ଥରେ ସିରିଜକୁ ଫେରିପାରିବ ବୋଲି କହିଛନ୍ତି ଇଂଲଲ୍ଡ ସ୍ପିନର ମଂଟି ପାନେସର ।
Kanak News is now on WhatsApp
Join and get latest news updates delivered to you via WhatsApp
ଅଷ୍ଟ୍ରେଲିଆ ଠାରୁ ଭାରତ ପ୍ରଥମ ଟେଷ୍ଟରେ ପରାଜୟ ହେବା ପରେ ଏବେ ଦ୍ୱିତୀୟ ଟେଷ୍ଟ ମ୍ୟାଚକୁ ନେଇ ବଢିଯାଇଛି ଚିନ୍ତା । କାରଣ ଦଳରେ ଏବେ କେତେକ ଗୁରୁତ୍ୱପୂର୍ଣ୍ଣ ପରିବର୍ତନ ହେବାକୁ ଯାଉଛି । ପ୍ରଥମ ଟେଷ୍ଟର ଦ୍ୱିତୀୟ ଇନିଂସରେ ଭାରତୀୟ ବ୍ୟାଟ୍ସମ୍ୟାନଙ୍କ ପ୍ରଦର୍ଶନ ଚିନ୍ତାକୁ ବଢାଇ ଦେଇଛି । ଏହାରି ଭିତରେ ପୂର୍ବତନ କ୍ୟାପଟେନ ସୁନୀଲ ଗାଭାସ୍କର ଟିମ୍ ଇଣ୍ଡିଆକୁ ପରାମର୍ଶ ଦେଇଛନ୍ତି । ସୁନୀଲ ଗାଭାସ୍କର କହିଛନ୍ତି, ମେଲବର୍ଣ୍ଣ ଟେଷ୍ଟରେ ପୃଥ୍ୱୀ ସ’ଙ୍କ ସ୍ଥାନରେ କେଏଲ ରାହୁଲ ଖେଳିବା ଆବଶ୍ୟକ । ଏବଂ ଭଲ ଫର୍ମରେ ଥିବା ଶୁଭମନ ଗିଲ, ୫ କିମ୍ବା ୬ନମ୍ବରରେ ପଡିଆକୁ ଓହ୍ଲାଇବାର ଆବଶ୍ୟକତା ରହିଛି । ନୂଆରୁ ଆରମ୍ଭ କଲେ ଖେଳକୁ ଫେରିପାରିବାର ସମ୍ଭାବନା ରହିଛି ।
ପ୍ରଥମ ଟେଷ୍ଟରେ ଶୋଚନୀୟ ପରାଜୟ ପରେ ଟିମରେ ପରିବର୍ତନକୁ ନେଇ ଅନେକ ପ୍ରଶ୍ନ ଉଠିଛି । ଏହାରି ଭିତରେ ୱିକେଟ କିପର ରିଦ୍ଧିମାନ ଶାହାଙ୍କ ସ୍ଥାନରେ ଋଷଭ ପନ୍ଥଙ୍କୁ ଖେଳାଇବା ପାଇଁ ଦାବି ଉଠିଛି । ଟିମ ଇଣ୍ଡିଆ ପୂର୍ବତନ ମୁଖ୍ୟ ଚୟନକର୍ତ୍ତା ଏମଏସକେ ପ୍ରସାଦ କହିଛନ୍ତି, କମିଟି ସେହି ସମୟରେ ସ୍ପଷ୍ଟ କରିଥିଲା ଯେ ଋଷଭ ପନ୍ଥ ଇଂଲଣ୍ଡ ଓ ଅଷ୍ଟ୍ରେଲିଆରେ ୱିକେଟ କିପର ବ୍ୟାଟ୍ସମ୍ୟାନ ଭାବେ ପ୍ରଥମ ପସନ୍ଦ ।
କେବଳ ଭାରତରେ ହେଉଥିବା ମ୍ୟାଚ ପାଇଁ ଆମକୁ ୬ନମ୍ବର ପରେ ବ୍ୟାଟ୍ସମ୍ୟାନଙ୍କ ଆବଶ୍ୟକତା ରହିଥାଏ । ଏଥିପାଇଁ ସେଠାରେ ଜଣେ ସ୍ପେଶାଲିଷ୍ଟ ୱିକେଟ କିପର ରଖିପାରିବେ । ମୋର ବିଶ୍ୱାସ ଅଛି ଯେ ଋଷଭ ଗତ ମାସ ନିଜ ଫ୍ୟାଟନେସକୁ ନେଇ କାମ କରିବା ସହ ଗୋଲାପୀ ବଲରେ ମଧ୍ୟ ପ୍ରାକ୍ଟିସ କରିଛନ୍ତି । ତେବେ ସେମାନେ ଯଦି ଋଷଭକୁ ପରବର୍ତ୍ତୀ ୩ଟି ମ୍ୟାଚ ପାଇଁ ଦଳରେ ସାମିଲ କରନ୍ତି ତେବେ ପରିଚାଳନା କମିଟି ସହିତ ମୁଁ ସହମତ ।
ସେପଟେ ଇଂଲଣ୍ଡ ସ୍ପିନର ମଂଟି ପାନେସର କହିଛନ୍ତି ଯେ, ପିଙ୍କ ବଲ ମ୍ୟାଚ ଏକ କଷ୍ଟକର ବ୍ୟାପାର । ତେବେ ଆଡିଲେଡ ଟେଷ୍ଟରେ ଭାରତର ପ୍ରଦର୍ଶନକୁ ଏକ ଦୁଃସ୍ୱପ୍ନ ଭାବି ଭୁଲିଯିବା ଉଚିତ । କାରଣ ଗୋଟିଏ ଗୋଟିଏ ଦିନ ଏମିତି ଥାଏ ଯାହା ଆପଣଙ୍କର ପ୍ଲାନ ଅନୁଯାୟୀ କାର୍ଯ୍ୟକାରୀ ହୁଏନାହିଁ । ତେଣୁ ଆଡିଲେଡ ଟେଷ୍ଟକୁ ଭୁଲିଯାଇ ଭାରତ ଏକ ନୂଆ ଆରମ୍ଭ କରିବାର ଆବଶ୍ୟକତା ରହିଛି । ଆଡିଲେଡରେ ଶୋଚନୀୟ ପରାଜୟ ପରେ ୨୬ତାରିଖରେ ଆରମ୍ଭ ହେବାକୁ ଥିବା ମେଲବର୍ଣ୍ଣ ଟେଷ୍ଟ ଉପରେ ସମସ୍ତଙ୍କ ନଜର ରହିଛି ।