କନକ ବ୍ୟୁରୋ : ମାନବପ୍ରେମୀ ଆଦିତ୍ୟ ସୁନ୍ଦର ଦାଶ ମୃତ୍ୟୁ ଘଟଣାରେ ଦୁଇ ଦିନ ଧରି ତନାଘନା ଚଳାଇଛି କ୍ରାଇମବ୍ରାଞ୍ଚ ଟିମ୍। ଦିନତମାମ ବିଭିନ୍ନ ସ୍ଥାନରେ ଛାନଭିନ୍ ଚଳାଇଥିବା ତଦନ୍ତକାରୀ ଟିମ୍ ଅପରାହ୍ଣରେ ଆଦିତ୍ୟଙ୍କ ପତ୍ନୀ ବିଦ୍ୟାଶ୍ରୀଙ୍କୁ ୪ ଘଣ୍ଟା ଜେରା କରିଛି। ତିନି ଜଣିଆ ଟିମ୍ ଅପରାହ୍ଣ ପ୍ରାୟ ୪ଟାରେ ଆଦିତ୍ୟଙ୍କ ଘରେ ପହଞ୍ଚି ବିଦ୍ୟାଶ୍ରୀଙ୍କୁ ଜେରା କରିଥିଲା। ଆଦିତ୍ୟ ଓ ତାଙ୍କ ଭିତରେ ବିବାହ ପରେ ସମ୍ପର୍କରେ ତିକ୍ତତା ଆସିଥିଲା କି? କିଛି ନିର୍ଦିଷ୍ଟ କାରଣରୁ ସେମାନଙ୍କ ଭିତରେ ମନୋମାଳିନ୍ୟ ରହିଥିଲା କି? ବୃଦ୍ଧାଶ୍ରମ ଅର୍ଥକୁ କେନ୍ଦ୍ର କରି କିଛି ପାଟିତୁଣ୍ଡ ହୋଇଥିଲା କି? ଯେଉଁ ୬ଦିନ ଆଦିତ୍ୟଙ୍କ ବାପା ଓ ମା’ ଘରେ ନ ଥିଲେ, ତାହା ଭିତରେ ଉଭୟଙ୍କ ମଧ୍ୟରେ କିଛି ଘଟିଥିଲା କି? ଏହି ସବୁ ଦିଗକୁ ଆଧାର କରି କ୍ରାଇମବ୍ରାଞ୍ଚ ବିଦ୍ୟାଶ୍ରୀଙ୍କୁ ଜେରା କରିଥିବା ଜଣାପଡ଼ିଛି। ବିଦ୍ୟାଶ୍ରୀଙ୍କୁ ଜେରା ପରେ ଆଦିତ୍ୟଙ୍କ ବାପା ଓ ମା’ଙ୍କୁ ମଧ୍ୟ ପଚରାଉଚରା କରାଯାଇଛି। ବିଦ୍ୟାଶ୍ରୀ ଓ ଆଦିତ୍ୟଙ୍କ ବାପା, ମା’ଙ୍କୁ ଅଲଗା ଅଲଗା ପଚରାଉଚରା କରାଯାଇଥିବା ଜଣାପଡ଼ିଛି।
Kanak News is now on WhatsApp
Join and get latest news updates delivered to you via WhatsApp
ସେହିପରି ପୂର୍ବାହ୍ନରେ ପିପୁଲ୍ସ ଫର୍ ସେବାର ସଦସ୍ୟ ତଥା ଆଦିତ୍ୟଙ୍କ ଘନିଷ୍ଠ ସହଯୋଗୀ ପପୁ, ବିକାଶ, ଦୀପୁ ଓ ପ୍ରୀତମଙ୍କୁ ଜେରା କରାଯାଇଛି। ସେମାନଙ୍କ ବୟାନ ରେକର୍ଡ କରିଛି କ୍ରାଇମବ୍ରାଞ୍ଚ ଟିମ୍। ଆଶ୍ରମକୁ ଯାଇ ମଧ୍ୟ ଖୋଳତାଡ଼ କରିଛି ତଦନ୍ତକାରୀ ଦଳ। ଆଶ୍ରମର ଆର୍ଥିକ କାରବାର ସମ୍ପର୍କରେ ତଥ୍ୟ ହାସଲ କରିଛି। ଏହି ଘଟଣା ସହ ପ୍ରତ୍ୟକ୍ଷ ଓ ପରୋକ୍ଷ ଭାବରେ ସମ୍ପୃକ୍ତ ଆଉ କିଛି ବ୍ୟକ୍ତିଙ୍କୁ ଜେରା କରାଯିବ ବୋଲି ଜଣାପଡ଼ିଛି। ସୂଚନାଯୋଗ୍ୟ, ଗତକାଲି ଡିଜିପିଙ୍କ ନିର୍ଦେଶ ପରେ କ୍ରାଇମବ୍ରାଞ୍ଚ ତଦନ୍ତ ଜାରି ରଖିଛି। ଜିଆରପି ଥାନାରୁ ସମସ୍ତ ଦସ୍ତାବିଜ୍, ସିସିଟିଭି ଫୁଟେଜ ସଂଗ୍ରହ କରିଛି।