ହିଣ୍ଡନବର୍ଗ ରିସର୍ଚ୍ଚ ରିପୋର୍ଟ ଦୋହଲାଇଦେଲା ଆଦାନୀ ଗ୍ରୁପର ସେୟାର, ୩ ଦିନରେ ୩.୪ ଲକ୍ଷ କୋଟିର କ୍ଷତି। ପଢନ୍ତୁ ପୂରା ଘଟଣାକ୍ରମ …
କନକ ବ୍ୟୁରୋ: ଅଦାନୀ ଗ୍ରୁପକୁ ଗୋଟିଏ ପରେ ଗୋଟିଏ ଝଟକା । ହିଣ୍ଡନବର୍ଗର ରିପୋର୍ଟ ପରେ କ୍ଷତିର ସାମ୍ନା କରିଛି ଗ୍ରୁପ । ଅଦାନୀ ଗ୍ରୁପର ୯ଟି ତାଲିକାଭୁକ୍ତ କମ୍ପାନୀର ସେୟାର ହ୍ରାସ ପାଇବାରେ ଲାଗିଛି । ବର୍ତ୍ତମାନ ସୁଦ୍ଧା ପାଖପାଖି ୩.୪ ଲକ୍ଷ କୋଟିର କ୍ଷତି ସହିସାରିଲାଣି କମ୍ପାନୀ । ସାଧାରଣରେ ପ୍ରଶ୍ନ ଉଠୁଛି କଣ ଏହି ରିପୋର୍ଟ ଯାହା ଏତେବଡ କମ୍ପାନୀର ସେୟାରକୁ ମାତ୍ର ଗୋଟିଏ ରିପୋର୍ଟ ପ୍ରକାଶ କରି ହ୍ରାସ କରିଦେଇପାରୁଛି । କଣ ଏହି ହିଣ୍ଡନବର୍ଗ ରିପୋର୍ଟ ଆସନ୍ତୁ ଜାଣିନେବା ।
Kanak News is now on WhatsApp
Join and get latest news updates delivered to you via WhatsApp
ହିଣ୍ଡନବର୍ଗ ରିସର୍ଚ୍ଚ ଅନୁସାରେ ଅଦାନୀ ଗ୍ରୁପ ସେୟାରକୁ ବୃଦ୍ଧି କରିବା ପାଇଁ ପରିବାରର ଟଙ୍କାକୁ ବିଦେଶରେ ନିବେଶ କରୁଥିଲା । ଅର୍ଥାତ କମ୍ପାନୀର ଟଙ୍କାକୁ ବିଦେଶକୁ ପଠାଯାଉଥିଲା ଏବଂ ସେହି ଟଙ୍କାକୁ ପୁଣି ବିଭିନ୍ନ ମାଧ୍ୟମରେ ଭାରତରେ ଥିବା କମ୍ପାନୀର ସେୟାରରେ ନିବେଶ କରାଯାଉଥିଲା ।
ସେହିଭଳି ଅଦାନୀ ଗ୍ରୁପର ସେୟାରର ଦର ବଢାଇ ରଖିବା ପାଇଁ ଅପରେଟରଙ୍କ ବ୍ୟବହାର କରୁଛି । ବଜାରରେ ଥିବା ବଡ ବଡ ଅପରେଟରଙ୍କୁ ଏଥିପାଇଁ କମ୍ପାନୀ ବ୍ୟବହାର କରୁଛି ।
ତୃତୀୟରେ ଯଦି ଦେଖିବା ଅଦାନୀ କମ୍ପାନୀ ଭୁଲ ଉପାୟରେ ଟଙ୍କାକୁ ବିଦେଶକୁ ପଠାଇଥିଲା ଏବଂ ନିଜ କାରବାରକୁ ବଢାଇ ଚଢାଇ ଦେଖାଇଥିଲା । ସଂଖ୍ୟା ଦୃଷ୍ଟିରୁ ଏହାକୁ ଅଧିକ ଦେଖାଯାଇଥିଲା ।
ଚତୁର୍ଥରେ ପରିବାରର ଅନେକ ସଦସ୍ୟ ବିବାଦରେ ଜଡିତ ରହିଥିଲେ । ଏବଂ ଏମାନଙ୍କ ମଧ୍ୟରୁ ଅନେକ ଜଣ ଗିରଫ ମଧ୍ୟ ହୋଇଛନ୍ତି । କିଛି ସ୍ଥାନରେ କଷ୍ଟମର ମାମଲା ଥିବା ବେଳେ କିଛି ସ୍ଥାନରେ ଅନ୍ୟକିଛି ମାମଲାରେ ସମସ୍ତେ ଛନ୍ଦି ହୋଇଯାଇଛନ୍ତି ।
ଏହା ସହ ବ୍ୟାଙ୍କର ଖାତା ଗୁଡିକ ମଧ୍ୟ ଠିକ୍ ନାହିଁ । ଯେଉଁ କାରଣରୁ ଗତ ୮ ବର୍ଷରେ କମ୍ପାନୀର ୪ ଜଣ ସିଏଫଓ ଇସ୍ତଫା ଦେଇସାରିଛନ୍ତି ।
ହିଣ୍ଡନବର୍ଗ ନିଜର ରିପୋର୍ଟ ଏହି ସବୁ ଅଭିଯୋଗ କମ୍ପାନୀ ବିରୋଧରେ ଆଣିଛି । ଏହା ପରେ ବୁଧବାରଠାରୁ ଲଗାତର କମ୍ପାନୀର ସେୟାର ହ୍ରାସ ହେବାରେ ଲାଗିଛି । କେବଳ ଅଦାନୀ ଗ୍ରୁପ ନୁହେଁ ଏହା ସହ ଜଡିତ ଅନେକ କମ୍ପାନୀ ସହ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଥିଲା ।
ଏବେ ପ୍ରଶ୍ନ ଯେ କିଏ ଏହି ହିଣ୍ଡନବର୍ଗ ରିସର୍ଚ୍ଚ ? ହିଣ୍ଡନବର୍ଗ ହେଉଛି ଏକ ସର୍ଟ ସେଲର ରିସର୍ଚ୍ଚ ଫାର୍ମ । ଏହାର ଶୁଭାରମ୍ଭ କରିଥିଲେ ନାଟେ ଆଣ୍ଡରସନ, ସିଏଫଏ, ସିଏଆଇଏ । ୨୦୨୦ ପରେ ଏହି ଫାର୍ମ ପାଖପାଖି ୩୦ଟି କମ୍ପାନୀର ରିପୋର୍ଟକୁ ସାର୍ବଜନୀନ କରିଛନ୍ତି । ଆଉ ଏହି ରିପୋର୍ଟର ପରଦିନ ହିଁ ସେହି ସବୁ କମ୍ପାନୀର ପାଖପାଖି ୧୫ ପ୍ରତିଶତର ସେୟାର ହ୍ରାସ ହୋଇଥାଏ । ପରବର୍ତ୍ତୀ ୬ ମାସରେ ସେହି ସମାନ କମ୍ପାନୀର ସେୟାର ୨୬ ପ୍ରତିଶତ ସେୟାର ହ୍ରାସ ଦେଖିବାକୁ ମିଳିଛି । ହିଣ୍ଡନବର୍ଗ ସେତେବେଳେ ଚର୍ଚ୍ଚାକୁ ଆସିଥିଲା ଯେତେବେଳେ ନିକୋଲା କମ୍ପାନୀ ଉପରେ ନିଜର ରିପୋର୍ଟ ପ୍ରସ୍ତୁତ କରିଥିଲା । ଏହା ପରେ କମ୍ପାନୀର ସେୟାର ୯୪ ପ୍ରତିଶତ ହ୍ରାସ ପାଇଥିଲା । ବିବାଦୀୟ ହେବା ପରେ ହିଣ୍ଡନବର୍ଗ ବିରୋଧରେ ୟୁଏସ ଡିପାର୍ଟମେଣ୍ଟ ଅଫ୍ ଜଷ୍ଟିସ ଯାଞ୍ଚ ଆରମ୍ଭ କରିଦେଇଛି । ଅଭିଯୋଗ ରହିଛି ଯେ ଏହି ସଂସ୍ଥା ଅନ୍ୟ ସଂସ୍ଥା ସହ ମିଳିତ ଭାବେ ସର୍ଟ ସେଲିଂ କରିଥାଏ ।
ରିପୋର୍ଟ ପବ୍ଲିକ କରିବା ପୂର୍ବରୁ ହିଣ୍ଡନବର୍ଗର ପାଖାପାଖି ୧୦ ନିବେଶକଙ୍କୁ ରିପୋର୍ଟ ପଠାଇଥାଏ । ଏହା ବାବଦରେ ସେମାନଙ୍କ ପାଖରୁ କମିଶନ ମଧ୍ୟ ହାସଲ କରିଥାଏ ।
ଶୁକ୍ରବାର ପୂରା ବଜାରରେ ଥିବା ଅଦାନୀ ଗ୍ରୁପର ପୁଞ୍ଜିରେ ୧୮.୫ ପ୍ରତିଶତର ହ୍ରାସ ହୋଇଛି । ମଙ୍ଗଳବାର ବଜାର ସମାପନ ପରଠାରୁ ଅଦାନୀ ସମୂହର ପୁଞ୍ଜିରେ ୪.୨ ଲକ୍ଷ କୋଟିର ହ୍ରାସ ଦେଖିବାକୁ ମିଳିସାରିଛି । ଶୁକ୍ରବାର ଅପରାହ୍ନ ୩ଟା ସୁଦ୍ଧା ଅଦାନୀ ସମୂହର ୯ଟି ସୂଚୀତ କମ୍ପାନୀର ସେୟାରରେ ହ୍ରାସ ଦେଖିବାକୁ ମିଳିଛି । ୪ଟି କମ୍ପାନୀରେ ବିଶେଷ ହ୍ରାସ ଦେଖିବାକୁ ମିଳିଛି । ସେହିଭଳି ଅଦାନୀ ଟ୍ରାନସମିଶନ, ଅଦାନୀ ଏବଂ ଅଦାନୀ ଟୋଟାଲ ଗ୍ୟାସର ସେୟାର ୨୦-୨୦ ପ୍ରତିଶତ ତଳକୁ ଖସିଛି । ଅଦାନୀ ଗ୍ରୀନ ଏନର୍ଜି ଏବଂ ଅଦାନୀ ଏଣ୍ଟରପ୍ରାଇଜେସରେ ଏହାର ସ୍ଥିତି ୧୯.୯ ଏବଂ ୧୯.୩ ପ୍ରତିଶତ ତଳକୁ ଖସିଆସିଛି । ଅଦାନୀ ପୋର୍ଟରେ ସେୟାର -୧୭.୭ ପ୍ରତିଶତ ଥିବା ବେଳେ ଅମ୍ବୁଜା ସିମେଣ୍ଟର ସେୟାର-୧୭.୩ ପ୍ରତିଶତ, ଏସିସି ସିମେଣ୍ଟର ସେୟାର ମୂଲ୍ୟ -୧୪.୩ ପ୍ରତିଶତ ତଳକୁ ଖସିଆସିଛି । ଅଦାନୀ ପାୱାର ଏବଂ ଅଦାନୀ ୱିଲମରର ସେୟାରରେ ମଧ୍ୟ ବ୍ୟାପକ କ୍ଷତି ଦେଖିବାକୁ ମିଳିଛି । ଉଭୟ କମ୍ପାନୀରେ ୫ ପ୍ରତିଶତର କ୍ଷତି ଦେଖିବାକୁ ମିଳିଛି ।