କନକ ବ୍ୟୁରୋ : ରଥ ଉପରେ ଅଣ ସେବାୟତ ଚଢିବା ପ୍ରସଙ୍ଗରେ ଆକ୍ସନ ମୋଡରେ ପ୍ରଶାସନ । ସଂପୃକ୍ତ ଅଣ ସେବାୟତଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ । ଏନେଇ ତଦନ୍ତ ପାଇଁ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଛି । ଏନେଇ ସୂଚନା ଦେଇଛନ୍ତି ଶ୍ରୀମନ୍ଦିରର ମୁଖ୍ୟ ପ୍ରଶାସକ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସୂଚନା ଥାଉକି ବଡ଼ ଠାକୁର ପହଣ୍ଡି ବେଳେ ଯେଉଁ ଅଘଟଣ ଘଟିଲା ତାହାକୁ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ କଡା ନିନ୍ଦା କରିଥିଲେ ଶ୍ରଦ୍ଧାଳୁ । ଏହାପରେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ବଦଳି କରାଯାଇ ତାଙ୍କ ସ୍ଥାନରେ ଅରବିନ୍ଦ ପାଢୀଙ୍କୁ ମୁଖ୍ୟ ପ୍ରଶାସକ ଭାବେ ନିଯୁକ୍ତ କରାଯାଇଥିଲା । ଅରବିନ୍ଦ ପାଢୀ ଦାୟିତ୍ୱ ନେବା ଦିନ ରଥ ଉପରକୁ ମୋବାଇଲ ନେବା ଉପରେ ବାରଣ କରିଥିଲେ । ଏହାସହ ବିନା ଅନୁମତିରେ କୌଣସି ଅଣ ସେବାୟତ ରଥ ଉପରକୁ ଚଢିବା ନେଇ କଟକଣା ଜାରି କରିଥିଲେ । ହେଲେ ଆଜି ବାହୁଡା ଯାତ୍ରାରେ କିଛି ସେବାୟତ ରଥ ଉପରକୁ ମୋବାଇଲ ନେଇଥିଲେ । ଏହାସହ କିଛି ଅଣ ସେବାୟତ ରଥ ଉପରେ ଚଢିଥିଲେ । ଜଣେ ଅଣ ସେବାୟତଙ୍କୁ ଚିହ୍ନଟ କରି ନିଜେ ଅରବିନ୍ଦ ପାଢୀ ତାଙ୍କୁ ରଥରୁ ଘୋଷାଡି ଆଣି ପୋଲିସ ଜିମା ଦେଇଥିଲେ । ଏନେଇ ସେମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ଅରବିନ୍ଦ ପାଢୀ ସୂଚନା ଦେଇଛନ୍ତି ।