ସୌମ୍ୟରଞ୍ଜନ ମୃତ୍ୟୁ ମାମଲାରେ ଆସିଲା ନୂଆ ମୋଡ । ଭାଇରାଲ ହେଉଛି ବିଦ୍ୟା ଭାରତୀଙ୍କ ହାତଲେଖା ଚିଠି ।
ଚିଠିରେ ଲେଖିଛନ୍ତି, ଏହି ବ୍ୟକ୍ତିଙ୍କୁ ଘୃଣା କରନ୍ତି । ଗୋଟିଏ ନିଷ୍ପତ୍ତି ତାଙ୍କ ଜୀବନକୁ ବରବାଦ କରିଦେଇଛି
କନକ ବ୍ୟୁରୋ: ପାରଳାଖେମୁଣ୍ଡି ଏସିଏଫ ସୌମ୍ୟରଞ୍ଜନ ମହାପାତ୍ରଙ୍କ ପତ୍ନୀ ବିଦ୍ୟାଭାରତୀଙ୍କ ଏକ ହାତଲେଖା ଚିଠି ଏବେ ଭାଇରାଲ ହେଉଛି । ସୌମ୍ୟଙ୍କ ମୃତ୍ୟୁର କିଛି ଦିନ ଆଗରୁ ଏହି ଚିଠି ଲେଖିଥିବା ମାନିଛନ୍ତି ବିଦ୍ୟାଭାରତୀ । ତେବେ ଚିଠିରେ ସେ ଲେଖିଛନ୍ତି ସେହି ବ୍ୟକ୍ତିଙ୍କୁ ସେ ଘୃଣା କରନ୍ତି, ଏକ ଭୁଲ ନିଷ୍ପତ୍ତି ଯୋଗୁଁ ତାଙ୍କ ଜୀବନ ବରବାଦ ହୋଇଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମୃତ ଏସିଏଫ ସୌମ୍ୟରଞ୍ଜନଙ୍କ ପତ୍ନୀ ବିଦ୍ୟାଭାରତୀ ଲେଖିଥିବା ଏହି ଚିଠି ହିଁ ବୟାନ କରୁଛି ସ୍ୱାମୀଙ୍କ ସହ ତାଙ୍କର ଭୀଷଣ ମନୋମାଳିନ୍ୟ ଥିଲା । ସୌମ୍ୟଙ୍କୁ ସେ ଘୃଣା କରୁଥିଲେ । ଏପରିକି ସୌମ୍ୟଙ୍କ ସହ ତାଙ୍କ ନାଁ ଯୋଡି ହୋଇଥିବାରୁ ସେ ପଶ୍ଚାତାପ କରୁଥିଲେ । ଗୋଟିଏ ଭୁଲ ନିଷ୍ପତ୍ତି କେମିତି ତାଙ୍କ ଜୀବନକୁ ନଷ୍ଟ କରିଦେଲା ସେହିକଥା ଚିଠିରେ କହିଥିଲେ । ଅନ୍ୟଜଣେ ଝିଅ ସହ ସୌମ୍ୟଙ୍କ ସମ୍ପର୍କ ଥିବା ଜାଣିବା ପରେ ଦୁଃଖରେ ଭାଙ୍ଗିପଡି ଏହି ଚିଠିଟିକୁ ଲେଖିଥିବା କହିଛନ୍ତି ବିଦ୍ୟାଭାରତୀ ।
ତେବେ ଚିଠିର ଏବେ କୌଣସି ମୂଲ୍ୟ ନଥିବା କହୁଛନ୍ତି ବିଦ୍ୟାଭାରତୀ । ଚିଠିଟି କେବେ ଲେଖାଯାଇଛି, ଜଣାପଡିନଥିଲେ ମଧ୍ୟ – ଏଥିରେ ଦିନ ତିନିଟା କେମିତି କଟିବ ବୋଲି କାହିଁକି ଲେଖିଛନ୍ତି ବିଦ୍ୟାଭାରତୀ? ଆଉ ୧୨ରୁ ୧୫ ଲେଖିବାର କ’ଣ ଉଦ୍ଦେଶ୍ୟ? ଜୁଲାଇ ୧୩ ତାରିଖରେ ସୌମ୍ୟରଞ୍ଜନଙ୍କ ମୃତ୍ୟୁ ହୋଇଥିବାରୁ ବିଦ୍ୟାଭାରତୀଙ୍କ ଚିଠିରେ ଲେଖାଥିବା – ଏହି ଦୁଇଧାଡି ଉପରେ ଏବେ ସନ୍ଦେହ ବଢିବାରେ ଲାଗିଛି ।
ଅନ୍ୟପଟେ ବୋହୂ ବିଦ୍ୟାଭାରତୀଙ୍କ ବିରୋଧରେ ସୌମ୍ୟଙ୍କ ପରିବାରର ଅନୈତିକ ସମ୍ପର୍କର ଅଭିଯୋଗ , ଆଉ ସୌମ୍ୟଙ୍କ ଅନ୍ୟଜଣେ ଝିଅ ସହ ସମ୍ପର୍କ ଥିବାନେଇ ପତ୍ନୀଙ୍କ ଅଭିଯୋଗ ଭିତରେ ସାମ୍ନାକୁ ଆସିଛି ଏକ କୋର୍ଟ ଏଗ୍ରିମେଣ୍ଟ । ଜୁଲାଇ ୯ ତାରିଖରେ ହୋଇଥିବା ଏହି ଏଗ୍ରିମେଣ୍ଟରେ ସୌମ୍ୟ ପାଉଥିବା ୫୮ ହଜାର ଟଙ୍କା ଦରମାଠାରୁ ଆରମ୍ଭ କରି ସମସ୍ତ ସମ୍ପତ୍ତିର ଉତ୍ତରାଧିକାରୀ ତାଙ୍କ ପତ୍ନୀ ବିଦ୍ୟାଭାରତୀ ହେବେ ବୋଲି ଏକ ଏଗ୍ରିମେଣ୍ଟ କରାଯାଇଛି । ତେବେ କାହିଁକି ଏଭଳି ଏଗ୍ରିମେଣ୍ଟ କରିବା ଆବଶ୍ୟକ ମନେକଲେ ସୌମ୍ୟରଞ୍ଜନ ତାହା ହିଁ ବଡପ୍ରଶ୍ନ ।
ଘଟଣା ଘଟିବା ଦିନ ଗୁରୁତର ଅବସ୍ଥାରେ ସୌମ୍ୟରଞ୍ଜନଙ୍କୁ ହସ୍ପିଟାଲ ଆଣିବା ପରେ ବ୍ୟତିବ୍ୟସ୍ତ ହୋଇପଡିଥିଲେ ପତ୍ନୀ ବିଦ୍ୟାଭାରତୀ । ସ୍ୱାମୀଙ୍କୁ ସବୁଠାରୁ ଭଲ ଚିକିତ୍ସା ଯୋଗାଇଦେବା ପାଇଁ କେଉଁଠାକୁ ନେଲେ ଭଲହେବ ବୋଲି କାହାରିକୁ ଫୋନ କରି ବାରମ୍ବାର ପ୍ରଶ୍ନ କରୁଥିଲେ । ଗୋଟିଏ ପଟେ ସ୍ୱାମୀଙ୍କ ପାଇଁ ଏଭଲି ବ୍ୟସ୍ତତା ଆଉ ଅନ୍ୟପଟେ ସ୍ୱାମୀଙ୍କ ମୃତ୍ୟୁ ପାଇଁ ତାଙ୍କୁ ଦାୟୀ କରି ଶ୍ୱଶୂରଘର ଲୋକଙ୍କ ଅଭିଯୋଗ ଭିତରେ ଏବେ ପ୍ରଶ୍ନ ଉଠୁଛି ଆସନ୍ତାକାଲି ସ୍ୱାମୀଙ୍କ ଦଶାହରେ ଯୋଗ ଦେବେ ତ ପତ୍ନୀ ବିଦ୍ୟାଭାରତୀ ?