ଏ କି ଅବ୍ୟବସ୍ଥା? ବର୍ଷା ପାଇଁ ବନ୍ଦ ହେଲା ଭାରତ-ଶ୍ରୀଲଙ୍କା ମ୍ୟାଚ୍ । ପିଚ୍ ଶୁଖାଇବା ପାଇଁ ଆସିଲା ହେୟାର ଡ୍ରାଏର ଓ ଆଇରନ, ଟ୍ୱିଟରରେ ଟ୍ରୋଲ କଲେ ପ୍ରଂଶସକ ।
ବର୍ଷା କାରଣରୁ ଗତକାଲି ଭାରତ-ଶ୍ରୀଲଙ୍କା ପ୍ରଥମ ଟି-ଟ୍ୱେଣ୍ଟି ମ୍ୟାଚ୍ ବାତିଲ ହୋଇଥିଲା । ତେବେ ଏହି ମ୍ୟାଚ୍ ରଦ୍ଦ ହେବା ପରେ ଆସାମ କ୍ରିକେଟ ସଂଘକୁ ଟାର୍ଗେଟ କରିଛନ୍ତି ପୂର୍ବତନ କ୍ରିକେଟର ଓ କ୍ରିକେଟ ପ୍ରଂଶସକ । ଏତେ କମ ବର୍ଷା ହେବା ସତ୍ତେ୍ୱ ମଧ୍ୟ କାହିଁକି ଖେଳ ହୋଇପାରିଲା ନାହିଁ ତାହାକୁ ନେଇ ଉଠିଛି ପ୍ରଶ୍ନ । କାରଣ ଏତେ କମ ବର୍ଷାରେ ଆଉଟଫିଲ୍ଡ ଶୁଖିଲା ଥିବା ବେଳେ ପିଚ୍ କିଭଳି ଓଦା ହେଲା । ଆଉ ସବୁଠୁ ବଡ କଥା ହେଲା, ପିଚକୁ ଶୁଖାଇବା ପାଇଁ ଭକ୍ୟୁମ କ୍ଲିନର, ଆଇରନ ଓ ହେୟାର ଡ୍ରାଏରର ବ୍ୟବହାର କରାଯିବାକୁ ନେଇ ଅନେକ କ୍ରିକେଟ ପ୍ରଂଶସକ ପ୍ରଶ୍ନ ଉଠାଇଛନ୍ତି । ଅନ୍ତର୍ଜାତୀୟ ମ୍ୟାଚ ପାଇଁ ଏଭଳି ବ୍ୟବସ୍ଥାକୁ ସମସ୍ତେ ନାପସନ୍ଦ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବ ଭାରତୀୟ କ୍ରିକେଟର ଜାହିର ଖାନ୍ ଏଭଳି ବ୍ୟବସ୍ଥା ପାଇଁ ଗ୍ରାଉଣ୍ଡ ଷ୍ଟାଫଙ୍କ ଉପରେ ବିରକ୍ତିଭାବ ପ୍ରକାଶ କରିଛନ୍ତି । ଜାହିର କହିଛନ୍ତି, ଯେତେବେଳେ ପିଚରେ ପାଣି ରୁହେ ସେତେବେଳେ ଅନେକ ଜିନିଷରେ ପରିବର୍ତ୍ତନ ଆସିଥାଏ । ତେବେ ଏତେ କମ ବର୍ଷା ହେବା ସତ୍ତେ୍ୱ ମଧ୍ୟ କିଭଳି ପିଚରେ ପାଣି ଜମିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ବୋଧହୁଏ ପିଚକୁ ଠିକ୍ ଭାବରେ ଘୋଡା ଯାଇନଥିଲା । ସେହିଭଳି ପୂର୍ବତନ କ୍ରିକେଟର ଭିଭିଏସ ଲକ୍ଷ୍ମଣ କହିଛନ୍ତି, କମ ବର୍ଷା କାରଣରୁ ମ୍ୟାଚ୍ ବନ୍ଦ ରଦ୍ଦ ହେବା ବେଶ ଦୁଭାଗ୍ୟପୂର୍ଣ୍ଣ । ବୋଧହୁଏ ଅନ୍ତର୍ଜାତୀୟ ମ୍ୟାଚ୍ ପାଇଁ ଗ୍ରାଉଣ୍ଡ ଷ୍ଟାଫ ଠିକ୍ ଭାବରେ ପ୍ରସ୍ତୁତ ନଥିଲେ ।
ଯେତେବେଳେ ଅନ୍ୟ ଦେଶରେ ବର୍ଷା ପରେ ପିଚ ଓ ଆଉଟଫିଲ୍ଡକୁ ଶୁଖାଇବା ପାଇଁ ଅତ୍ୟାଧୁନିକ ଜ୍ଞାନକୌଶଳର ବ୍ୟବହାର ହେଉଛି ସେତେବେଳେ ଆସାମ କ୍ରିକେଟ ବୋର୍ଡ ପିଚ୍ ଶୁଖାଇବା ପାଇଁ ଭକ୍ୟୁମ କ୍ଲିନର, ଆଇରନ ଓ ହେୟାର ଡ୍ରାଏରର ବ୍ୟବହାର କରିବାକୁ ନେଇ ଟ୍ୱିଟରରେ ଟ୍ରୋଲ କରାଯାଇଛି । ରବିବାର ଗୌହାଟୀରେ ଭାରତ-ଶ୍ରୀଲଙ୍କା ମଧ୍ୟରେ ହେବାକୁ ଥିବା ୨୦୨୦ର ପ୍ରଥମ ଟି-୨୦ ମ୍ୟାଚ୍ ବର୍ଷା କାରଣରୁ ରଦ୍ଦ ହୋଇଥିଲା । ଗୋଟିଏ ବି ବଲ୍ ପଡିବା ପୂର୍ବରୁ ଅମ୍ପାୟାର ମ୍ୟାଚକୁ ବାତିଲ କରିଥିଲେ । ଖେଳ ଆରମ୍ଭ ହେବାକୁ ଆଉ ଅଳ୍ପ କିଛି ସମୟ ବାକି ଥିବା ବେଳେ ବର୍ଷା ଆରମ୍ଭ ହୋଇଥିଲା । ତେବେ ଗ୍ରାଉଣ୍ଡ ଷ୍ଟାଫ୍ ଠିକ୍ ଭାବେ ପିଚକୁ ଘୋଡାଇ ନଥିବାରୁ ପିଚରେ ପାଣି ଜମି ଯାଇଥିଲା ।