ଅପହରଣର ପ୍ରାୟ ୯ ମାସ ପରେ ମାଆ କୋଳକୁ ଫେରିଲା ୧୮ ମାସର ଶିଶୁ କନ୍ୟା : ଅଭିଯୁକ୍ତ ଦମ୍ପତିକୁ ଗିରଫ କରି କୋର୍ଟ ଚାଲଣ କଲା ପୁଲିସ; ଗତବର୍ଷ ଡିସେମ୍ବର ମାସରେ ଜୟପୁର ବସଷ୍ଟାଣ୍ଡରୁ ଶିଶୁ କନ୍ୟାକୁ ଅପହରଣ କରିଥିଲେ ଅଭିଯୁକ୍ତ
କନକ ବ୍ୟୁରୋ : ଅପହରଣର ପ୍ରାୟ ୯ ମାସ ପରେ ମାଆ କୋଳକୁ ଫେରିଛି ୧୮ ମାସର ଶିଶୁ କନ୍ୟା । ଅଭିଯୁକ୍ତ ଦମ୍ପତିକୁ ଗିରଫ କରି କୋର୍ଟ ଚାଲଣ କରିଛି ପୁଲିସ । ଜୟପୁର ପୁଲିସର ଉଦ୍ୟମ ଯୋଗୁଁ ଝିଅକୁ ଫେରି ପାଇବା ଆଶା ଛାଡି ଦେଇଥିବା ମାଆ ଆଖିରୁ ଖୁସିରେ ଝରି ପଡିଛି ଲୁହ । ଶିଶୁକନ୍ୟାକୁ ହରାଇ ଦୁଃଖରେ ଭାଙ୍ଗି ପଡ଼ିଥିବା ଏହି ଅସହାୟ ମହିଳା ଜଣଙ୍କ ହେଉଛନ୍ତି ଗଜପତି ଜିଲ୍ଲା ମହାଗଣ୍ଡା ଅଂଚଳର ଦୁଃଖୀ ମଲ୍ଲିକ । ସ୍ୱାମୀଙ୍କ ନିର୍ଯାତନା ପାଇବା ପରେ ନିଜର ଦେଢ଼ ବର୍ଷର ଝିଅକୁ ଧରି ଭିକ୍ଷା ମାଗି ଚଳୁଥିଲେ ଦୁଃଖୀ ।
Kanak News is now on WhatsApp
Join and get latest news updates delivered to you via WhatsApp
ଗତବର୍ଷ ଡିସେମ୍ବର ୨୮ ତାରିଖରେ ଜୟପୁର ବସଷ୍ଟାଣ୍ଡ ନିକଟରେ କାଳିମେଳାର ଜଣେ ଦମ୍ପତି କୌଶଳ କ୍ରମେ ପ୍ରଥମେ ମାଆ-ଝିଅଙ୍କୁ ଅଲଗା କରିବା ପରେ ଝିଅକୁ ଅପହରଣ କରି ନେଇଥିଲେ । ଝିଅକୁ ହରାଇ ପାଗଳ ପ୍ରାୟ ହୋଇ ଯାଇଥିଲେ ଦୁଃଖୀ ମଲ୍ଲିକ । ସ୍ଥାନୀୟ କିଛି ଲୋକଙ୍କ ସହାୟତାରେ ସେ ଜୟପୁର ଟାଉନ ଥାନାରେ ଏ ନେଇ ଏତଲା ଦେଇଥିଲେ । ଏହାପରେ ପୁଲିସ ତନାଘନା ଆରମ୍ଭ କରିଥିଲା । ଶେଷରେ ମୋବାଇଲ ଟ୍ରାକିଂ କରି ଆନ୍ଧ୍ରପ୍ରଦେଶର ଚିନ୍ତୁରରୁ ଝିଅକୁ ଉଦ୍ଧାର କରିବା ସହ ଅଭିଯୁକ୍ତ ବଦ୍ରୁ ନାୟକ ଓ ତାଙ୍କ ସ୍ତ୍ରୀ ଶିବାନୀ ନାୟକଙ୍କୁ ଗିରଫ କରି କୋର୍ଟ ଚାଲାଣ କରିଛି ଟାଉନ ଥାନା ପୁଲିସ ।