ମୁହଁ ଟାଣ କଲେ ଅଭୟକାନ୍ତ ପାଠକ : କହିଲେ, କିଛି ଠକେଇ ହୋଇନି, ସବୁ ଠିକ୍ ଅଛି; ମୋ ପୁଅର ମାସିକ ଦରମା ୧ କୋଟି

ମୋ ପଇସାରେ ଅୟସ କରୁନଥିଲା ପୁଅ, ସମୟ ଆସିଲେ ସବୁ କାଗଜପତ୍ର ଦେବି

802

କନକ ବ୍ୟୁରୋ : ଚୋର ମୁହଁଟାଣ ପରି ଆଇଏଫଏସ ଅଭୟକାନ୍ତ ପାଠକ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି, ଯେ କିଛି ଠକେଇ ହୋଇନି, ସବୁ ଠିକ୍ ଅଛି । ସେ ଆହୁରି ମଧ୍ୟ କହିଥିଲେ ଯେ ପୁଅ ଆକାଶ ତାଙ୍କ ଟଙ୍କାରେ ଅୟସ କରୁନଥିଲା, କାରଣ ପୁଅର ମାସିକ ଦରମା କୋଟିଏ । ଖାଲି ସେତିକି ନୁହେଁ, ବିଭାଗରେ ଥାଇ ସେ କୌଣସି ଅର୍ଥ ହଡ଼ପ କରିନାହାନ୍ତି ବୋଲି ବି ଜୋର୍ ଦେଇ କହିଛନ୍ତି ଅଭୟକାନ୍ତ ।

ସେପଟେ, ଅଭୟ ପାଠକଙ୍କ ଗିରଫଦାରୀ ଆଶଙ୍କା ବୃଦ୍ଧି ପାଇଛି । ଆଜି ତାଙ୍କୁ କୋଭିଡ ପରୀକ୍ଷା ପାଇଁ କ୍ୟାପିଟାଲ ହସ୍ପିଟାଲ ନେଇଛି ଭିଜିଲାନ୍ସ । ତାଙ୍କ ପୁଅ, ପୁତୁରା ଓ ଡ୍ରାଇଭରଙ୍କୁ ମଧ୍ୟ କ୍ୟାପିଟାଲ ହସ୍ପିଟାଲକୁ ନେଇ ସ୍ୱାସ୍ଥ୍ୟ ପରୀକ୍ଷା କରାଯାଉଛି । ଏହାପରେ ୪ ଜଣଙ୍କୁ କୋର୍ଟରେ ହାଜର କରିବ ତଦନ୍ତକାରୀ ସଂସ୍ଥା । ଆୟ ବର୍ହିଭୁତ ସମ୍ପତି ଠୁଳ ଅଭିଯୋଗରେ ଯାଂଚ ଚାଲିଥିବା ବେଳେ ବାପ- ପୁଅଙ୍କୁ ମୁହାଁମୁହିଁ ବସାଇ ସାରା ରାତି ଜେରା କରିଥିଲା ଭିଜିଲାନ୍ସ । ଭୁବନେଶ୍ୱର ଭିଜିଲାନ୍ସ ସେଲ ଶାଖା କାର୍ଯ୍ୟାଳୟରେ ଅଭୟକାନ୍ତ ପାଠକ, ପୁଅ ଆକାଶ ପାଠକ, ପୁତୁରା ହର୍ଷ ପାଠକ ଏବଂ ଡ଼୍ରାଇଭରଙ୍କୁ ଜେରା କରାଯାଇଛି । ଏପରିକି ୪ଜଣଙ୍କୁ ଏକାଠି ବସାଇ ମୁହାଁମୁହିଁ ଜେରା କରିଛି ଭିଜିଲାନ୍ସ । ଜେରାରେ ଭିଜିଲାନ୍ସର ବଛାବଛା ଅଧିକାରୀ ନିୟୋଯିତ ହୋଇଥିଲେ । ପାଠକଙ୍କ ପ୍ରାୟ ୯କୋଟି ଟଙ୍କାର ଆୟ ବର୍ହିଭୁତ ସମ୍ପତ୍ତି ଠାବ ହୋଇଛି ।

ସୂଚନାଯୋଗ୍ୟ, ଭିଜିଲାନ୍ସର ଚଢାଉ ସମୟରେ ବାବୁ ଅଭୟକାନ୍ତ ପାଠକଙ୍କଠାରୁ ଯେଉଁ ସମ୍ପତ୍ତି ଜବତ ହୋଇଛି, ତାରା ତାଲିକା ବେଶ ଲମ୍ବା ରହିଛି । ଭୁବନେଶ୍ୱର, ମୁମ୍ବାଇ, ପୁନେ, ଉଦୟପୁରରେ ଏହି ଚଢାଉ ସମୟରେ ଘରୁ ମିଳିଛି ପ୍ରାୟ ୬୦ଲକ୍ଷ ଟଙ୍କା କ୍ୟାସ । ୮୦୦ଗ୍ରାମର ସୁନା ଅଳଙ୍କାର ମିଳିବା ସହିତ ୨୩ ଲକ୍ଷ ଟଙ୍କାର ସୁନାଗହଣା କିଣାଯାଇଥିବାର କାଗଜପତ୍ର ଜବତ ହୋଇଛି । ବଡ କଥା ହେଲା ଅଭୟକାନ୍ତଙ୍କ ପୁଅ ଆକାଶଙ୍କ ଆକାଉଂଟରେ ୯.୪ କୋଟି ଟଙ୍କା ଜମା ହୋଇଛି । ଏହି ଟଙ୍କା ମଧ୍ୟରୁ କେବଳ ଭୁବନେଶ୍ୱରରେ ଜମା ହୋଇଛି ୮.୪ କୋଟି ଟଙ୍କା । ଅଧିକାଂଶ ଟଙ୍କା ଭୁବନେଶ୍ୱରର ସହିଦ ନଗର ଏବଂ ନୟାପଲ୍ଲୀରେ ଥିବା ଏଟିଏମ ମାଧ୍ୟମରେ ଜମାହୋଇଛି । ପୁଅ ଆକାଶ ନାଁରେ ରହିଛି ୩ଟି ଦାମି ଗାଡି । ମର୍ସିଡେଜ, ବିଏମଡବ୍ଲୁ, ଟାଟା ହାରିୟର । ସେହିପରି ୩ଟି ୟାମାହା ଏଫଜେଡଏସ ମୋଟରସାଇକେଲ ମଧ୍ୟ ଆକାଶ ନାଁରେ ରହିଛି ।

ଏହା ଛଡା ଦାମି ଗାଡି ମଧ୍ୟ ଭଡାରେ ନେଉଥିଲେ ଆକାଶ । ପୁନେରେ ଚଢାଉ ସମୟରେ ୨ଟି ମର୍ସିଡିଜ ସମେତ ୩ଟି ଗାଡି ଭଡାରେ ନେଇଥିବା ମଧ୍ୟ ଜଣାପଡିଥିଲା । ଗାଡି ଭଡା ବାବଦକୁ ଖର୍ଚ୍ଚ ହୋଇଛି ୨୫ ଲକ୍ଷ ଟଙ୍କା । ସେହିପରି ଫ୍ଲାଟ ଓ ଘର ଭଡା ବାବଦକୁ ୧ କୋଟି ଟଙ୍କା ଖର୍ଚ୍ଚ ହୋଇଛି । ମୁମ୍ବାଇର ତାଜ ମହଲ ପ୍ୟାଲେସ ହୋଟେଲରେ ହୋଟେଲ ବିଲ ହୋଇଛି ୯୦ ଲକ୍ଷ ଟଙ୍କା । ସେହିପରି ରାଜସ୍ଥାନ ଉଦୟପୁର ତାଜ ଲେକ ପ୍ୟାଲେସରେ ଆଡଭାନ୍ସ ବାବଦକୁ ଦିଆହୋଇଛି ୨୦ଲକ୍ଷ ଟଙ୍କା । ଚାଟାର୍ଡ ଫ୍ଲାଇଟରେ ଭ୍ରମଣରେ ଖର୍ଚ୍ଚ ହୋଇଛି ୩ କୋଟି ଟଙ୍କା । ମାଲେସିଆ, ହଂକଂ, ବ୍ରିଟେନ୍, ୟୁଏଇ, ମାସଡିଭସକୁ ଭ୍ରମଣ କରିଥିବା ଜଣାପଡିଛି । ପୁନେ, ଭୁବନେଶ୍ୱର, ପାଟନା, ଜୁହୁ, ମୁମ୍ବାଇ, ଜାମସେଦପୁର ଏବଂ ଦିଲ୍ଲୀକୁ ମଧ୍ୟ ଚାଟାର୍ଡ ଫ୍ଲାଇଟରେ ଭ୍ରମଣ କରିଥିବା ଜଣାପଡିଛି ।

Comments are closed.