କନକ ବ୍ୟୁରୋ: ଆତଙ୍କବାଦୀ ସଂଗଠନ ଅଲକାଇଦା ସହ ଜଡିତ ଥିବା ଅଭିଯୋଗରେ ଦୋଷୀ ସାବ୍ୟସ୍ତ ହୋଇଥିବା, ଓଡିଶାର ଅବଦୁର ରେହେମାନକୁ ଦଣ୍ଡାଦେଶ ଦେଇଛନ୍ତିି ଦିଲ୍ଲୀ ପଟିଆଲା ହାଉସ୍ କୋର୍ଟ । ଆତଙ୍କବାଦୀ ଷଡଯନ୍ତ୍ରରେ ଲିପ୍ତ ଥିବା ଅଭିଯୋଗରେ ଅବଦୁରକୁ ୭ବର୍ଷ ୫ମାସ ସଶ୍ରମ କାରାଦଣ୍ଡାଦେଶ ସହ, ୨୫ ହଜାର ଟଙ୍କା ଜରିମାନା କରାଯାଇଛି । ଅନ-ଲ-ଫୁଲ ଆକ୍ଟିଭିଟିଜ୍ ପ୍ରିଭେନସନ ଆକ୍ଟର ଧାରା ୧୮ ଏବଂ ୧୮-ବିରେ ଦଣ୍ଡାଦେଶ ଦେଇଛନ୍ତି କୋର୍ଟ । ଅବଦୁର ରେହେମାନ ସହ ଦେଶ ବିରୋଧୀ ଷଡଯନ୍ତ୍ରରେ ଲିପ୍ତ ଥିବା ଅନ୍ୟ ତିନି ଅଭିଯୁକ୍ତ, ମହମ୍ମଦ ଆସିଫ, ଜାଫର ମାସୁଦ ଓ ଅବଦୁଲ ସାମିଙ୍କୁ ମଧ୍ୟ କୋର୍ଟ ସମାନ ଦଣ୍ଡାଦେଶ ଦେଇଛନ୍ତିି ।
Kanak News is now on WhatsApp
Join and get latest news updates delivered to you via WhatsApp
ଅବଦୁର ଆତଙ୍କବାଦୀ କାର୍ଯ୍ୟକଳାପରେ ଲିପ୍ତ ଥିବା ଅଭିଯୋଗ ପ୍ରମାଣିତ ହେବା ପରେ, କିଛି ଦିନ ତଳେ ଦିଲ୍ଲୀ ପଟିଆଲା ହାଉସ କୋର୍ଟ ତାକୁ ଦୋଷୀ ସାବ୍ୟସ୍ତ କରିଥିଲେ । ଆଉ ଏବେ ଦଣ୍ଡାଦେଶ ଶୁଣାଇଛନ୍ତି ।
୨୦୧୫ରେ ଦିଲ୍ଲୀ ପୁଲିସର ସ୍ପେଶାଲ ସେଲ ଅବଦୁର ରେହେମାନଙ୍କୁ କଟକ ଜଗତପୁର ଅଂଚଳରୁ ଗିରଫ କରିଥିଲା । ଏହି ଘଟଣା ସେତେବେଳେ ସାରା ରାଜ୍ୟରେ ଚହଳ ସୃଷ୍ଟି କରିଥିଲା । ଓଡିଶାରୁ କେହି ଆତଙ୍କବାଦୀ କାର୍ଯ୍ୟରେ ଲିପ୍ତ ହେବା ପ୍ରଥମ ଘଟଣା ହୋଇଥିବାରୁ ଗଣମାଧ୍ୟମର ପ୍ରମୁଖ ଖବର ପାଲଟିଥିଲା । ଆଉ ସେବେଠାରୁ ଅବଦୁରକୁ ଗିରଫ କରି ନେବା ସହ ତା ବିରୋଧରେ ପ୍ରମାଣ ସଂଗ୍ରହ କରୁଥିଲା ଦିଲ୍ଲୀ ପୁଲିସ ଓ ଏନଆଇଏ । ଆଉ ତଦନ୍ତବେଳେ ଯାହା ଜଣାପଡିଥିଲା ତାହା ସମସ୍ତଙ୍କୁ ଚମକାଇ ଦେଇଥିଲା । ଜଣାପଡିଥିଲା, ଅବଦୁର ବେଆଇନ ଭାବେ ପାକିସ୍ତାନ ଯାଇଥିଲା । ସେଠାରେ ପାକିସ୍ତାନ ଆତଙ୍କୀ ସଂଗଠନର ସଦସ୍ୟଙ୍କୁ ଭେଟିଥିଲା । ଆତଙ୍କବାଦୀ ଟ୍ରେନିଂ ନେଇଥିଲା । ଏପରିକି ଆତଙ୍କବାଦୀ ସଂଗଠନ ଅଲକାଏଦା ସହ ଅବଦୁରର ସମ୍ପର୍କ ଥିଲା ବୋଲି ଚାର୍ଜସିଟ ଦାଖଲ କରିଥିଲା ଦିଲ୍ଲୀ ପୁଲିସ ।
ଗିରଫ ହେବା ପୂର୍ବରୁ ମଦ୍ରାସାରେ ଧର୍ମଗୁରୁ ସାଜି ପିଲାମାନଙ୍କୁ ଜିହାଦ ପାଇଁ ଶିକ୍ଷା ଦେଉଥିଲା ଅବଦୁର । ପାଠ ପଢ଼ାଇବା ନାଁରେ ଛୋଟ ଛୋଟ ପିଲାମାନଙ୍କ ମୁଣ୍ଡରେ ଆତଙ୍କବାଦୀ କଥାକୁ ଭର୍ତି କରୁଥିିଲା । ହେଲେ ବେଶୀ ଦିନ ତିଷ୍ଠି ପାରିନଥିଲା ଅବଦୁରର ଏହି ଚାଲ, ଧରାପଡି ଯାଇଥିଲା ଦେଶ ବିରୋଧୀ ଷଡଯନ୍ତ୍ର ।