ପାକିସ୍ଥାନ ମୁହଁରେ ଲାଗିଥିବା କଳଙ୍କକୁ ସୁଧାରୁଛନ୍ତି ହମ୍ମାଦ୍ ! କଥାରେ ରହିଛି ଯାଦୁ ଯେ କେହିବି ହୋଇଯାଆନ୍ତି ମନ୍ତ୍ରମୁଗ୍ଧ ।
ସବୁ ବେଳେ ଅଶାନ୍ତି ଏବଂ କଳହ କରିବାକୁ ନେଇ ଚର୍ଚ୍ଚାରେ ରହୁଥିବା ପାକିସ୍ତାନ ଏବେ ଏକ ନୂଆ କଥା ପାଇଁ ଚର୍ଚ୍ଚାର ପରିସରକୁ ଆସିଛି । କମ ବୟସରେ ପ୍ରଫେସର ହୋଇ ଜଣେ ୧୧ବର୍ଷିୟ ବାଳକ ଇତିହାସ ସୃଷ୍ଟି କରିଛନ୍ତି । ୧୧ବର୍ଷିୟ ହମ୍ମାଦଙ୍କ କଥା ଶୁଣିବା ଏବଂ ତାଙ୍କ ଠାରୁ କିଛି ଶିଖିବା ପାଇଁ ହଜାର ହଜାର ଲୋକ ତାଙ୍କ ପାଖରେ ପହଞ୍ଚନ୍ତି । ହମ୍ମାଦଙ୍କ ଏପରି କାମ ପାକିସ୍ତାନ ପ୍ରତି ଲୋକମାନଙ୍କର ଥିବା ଚିନ୍ତାଧାରାକୁ ପରିବର୍ତ୍ତନ କରିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ବଡ଼ ବଡ଼ ବିଶ୍ୱବିଦ୍ୟାଳୟକୁ ଯାଇ ହମ୍ମାଦ୍ ନିଜ ବୟସ ଠାରୁ ଅଧିକ ବୟସ୍କ ଲୋକମାନଙ୍କୁ ପଢ଼ାଉଥିବା ବେଳେ ତାଙ୍କର ଅନେକ ଭିଡ଼ିଓ ୟୁ ଟ୍ୟୁବରେ ଭାଇରାଲ ହେବାରେ ଲାଗିଛି । ହମ୍ମାଦଙ୍କ ଆତ୍ମବିଶ୍ୱାସ ସମସ୍ତଙ୍କୁ ଅନୁପ୍ରାଣିତ କରୁଥିବା ବେଳେ ନିଜ ଠାରୁ ବଡ଼ ପିଲାମାନଙ୍କୁ ସେ ସ୍ପୋକନ୍ ଇଂରାଜି ପାଠ ପଢ଼ାଉଛନ୍ତି । କିପରି ସମସ୍ତେ ଭଲ ଭାବରେ ଇଂରାଜି କହି ପାରିବେ ସେ ନେଇ ୧୧ ବର୍ଷିୟ ହମ୍ମାଦ୍ ଚେଷ୍ଟା ଚଳାଇଥିବା ଜଣାପଡ଼ିଛି ।
ୟୁ ଟ୍ୟୁବରେ ତାଙ୍କର ଭିଡ଼ିଓ ଭାଇରାଲ ହେଉଥିବା ବେଳେ ଧୀରେ ଧୀରେ ତାଙ୍କର ସବସ୍କ୍ରାଇବର ସଂଖ୍ୟା ମଧ୍ୟ ବଢ଼ୁଥିବାର ଦେଖିବାକୁ ମିଳୁଛି । କିଛି ପିଲା ସୋସିଆଲ ମିଡ଼ିଆରେ ତାଙ୍କ ଭାଷଣ ଶୁଣି ନିଜ ଜୀବନର ବଞ୍ଚିବା ଶୈଳୀରେ ପରିବର୍ତ୍ତନ ଆଣିଥିବା ବେଳେ କିଛି ପିଲା ହମ୍ମାଦଙ୍କୁ ଭଗବାନଙ୍କ ଏକ ରୂପ ବୋଲି କହିଛନ୍ତି । ତାଙ୍କ ଭାଷଣ ଶୁଣିବା ପରେ ଯେ କେହି ବି ତାଙ୍କ ପ୍ରତି ଅନୁପ୍ରାଣିତ ହେବେ ବୋଲି ତାଙ୍କ ଭିଡ଼ିଓ ଦେଖୁଥିବା ଦର୍ଶକ କହିବା ଆରମ୍ଭ କରିଛନ୍ତି । ବିଲାଲ ଖାନ୍ ନାମକ ଜଣେ ଯୁବକଙ୍କ ଚାକିରି ହେଉ ନ ଥିବାରୁ ସେ ଆତ୍ମହତ୍ୟା କରିବେ ବୋଲି ଭାବି ନେଇଥିଲେ । ଏହି ସମୟରେ ସେ ହମ୍ମାଦଙ୍କ ଭିଡ଼ିଓ ଦେଖିଥିଲେ । ଯାହା ତାଙ୍କ ଚିନ୍ତାଧାରାରେ ପରିବର୍ତ୍ତନ ଆଣିଥିଲା । ଅନ୍ୟ ପକ୍ଷରେ ହମ୍ମାଦଙ୍କୁ ଇଂରାଜି ଶିଖାଇଥିବା ଶିକ୍ଷକଙ୍କ କହିବା ଅନୁଯାୟୀ ହମ୍ମାଦ୍ ସାରା ବିଶ୍ୱରେ ପାକିସ୍ତାନର ଏକ ସକରାତ୍ମକ ଛବି ସୃଷ୍ଟି କରିବା ଆରମ୍ଭ କରିଛନ୍ତି । ତାଙ୍କ କହିବା ଶୈଳୀରେ ହିଁ ଯାଦୁ ରହିଛି ।