ଶୁଣ ସରକାର ! ସ୍ୱୀକୃତିଙ୍କ ଆଖିରୁ ଶୁଖୁନି ଲୁହ, ବନ୍ଧବାଡ ମାନୁନି କଷ୍ଟ ଯନ୍ତ୍ରଣାର କୋହ । ଝାଟିମାଟି ଘର ପୋଡି ଯିବା ପରେ ୪ ହାତିଆ ପାଇଖାନା ଘରେ ବିତୁଛି ମାଆ ପୁଅଙ୍କ ଜୀବନ…
କନକ ବ୍ୟୁରୋ: ମୁଁ ପାଇଖାନା ଘରେ ରହୁଛି… ଘର ଖଣ୍ଡେ ନାହିଁ ବୋଲି ଏଇ ପାଇଖାନାରେ ଜୀବନ ବିତୁଛି… ୪ ହାତ ପାଇଖାନାରେ ମାଆପୁଅ ମରିମରି ବଞ୍ଚୁଛନ୍ତି । ଆଉ ଦୁହିଁଙ୍କ ଦୁଃଖ କହିବା ବେଳେ ଆଖିରୁ ଝରି ପଡୁଛି ଲୁହର ଧାର, ଥରି ଯାଉଛି କଣ୍ଠ । ଜୀବନର ଅପରାହ୍ଣରେ ମୁଣ୍ଡ ଗୁଂଜିବା ପାଇଁ କେତେ ଯେ ସଂଘର୍ଷ କରିବାକୁ ପଡେ ତାହା ଆଠଗଡର ସ୍ୱୀକୃତି ମଙ୍ଗୁଆଳଙ୍କୁ ଦେଖିଲେ ସ୍ପଷ୍ଟ ବାରି ହୋଇପଡୁଛି ।
Kanak News is now on WhatsApp
Join and get latest news updates delivered to you via WhatsApp
ଝାଟି ମାଟିର କୁଡିଆ ପୋଡି ଯିବା ପରେ ଘରଟିଏ ପାଇଁ ସରପଂଚଙ୍କ ଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କ ଯାଏଁ ସମସ୍ତଙ୍କୁ ନେହୁରା ହୋଇଛନ୍ତି ସ୍ୱୀକୃତି । ସମସ୍ତେ ଆସି ସ୍ୱୀକୃତିଙ୍କ ସତ ପରଖିଛନ୍ତି, ହେଲେ କିଛି ଲାଭ ନାହିଁ । ଆଜି ବି ମାନସିକ ବିକାରଗ୍ରସ୍ତ ପୁଅକୁ ଆଶ୍ରା କରି ପାଇଖାନା ଘରେ ଆଶ୍ରୟ ନେଇଛନ୍ତି ସ୍ୱୀକୃତି ।
ତେବେ ସ୍ୱୀକୃତିଙ୍କ କାହାଣୀରୁ ଆଠଗଡ଼ରେ ଆବାସ ଯୋଜନା କେତେ କାର୍ଯ୍ୟକାରୀ ହୋଇଛି ତାର ବାସ୍ତବ ଚିତ୍ର ଏବେ ସାମ୍ମାକୁ ଆସିଛି । ବିକାଶ ପଥରେ ଆଗେଇଥିବା ଆଠଗଡ଼ରେ ବିକାଶର ବାସ୍ତବ ଚିତ୍ର ବୟାନ କରୁଛି ବାଳି ଗାଁ ସ୍ୱୀକୃତି ମଙ୍ଗୁଆଳଙ୍କ ଅଖିର ଲୁହ ।
୨୦୦୮ ମସିହାରେ ସ୍ୱୀକୃତି ଇନ୍ଦିରା ଆବାସ ଯୋଜନାରେ ଘର ପାଇଥିଲେ । ପ୍ରଥମ କିସ୍ତିରେ ମାତ୍ର ୧୦ହଜାର ଟଙ୍କା ପାଇ ଘର ଆରମ୍ଭ କରିଥିଲେ, ହେଲେ ଦ୍ୱିତୀୟ କିସ୍ତି ପାଇଁ ଯିବା ବେଳେ ବ୍ଲକ ଅଧିକାରୀ କହିଲେ ଫାଇଲ ହଜିଯାଇଛି । ସେହି ଦିନଠାରୁ ଅଧାରେ ପଡିରହିଛି ସ୍ୱୀକୃତିଙ୍କ ଇନ୍ଦିରା ଆବସ । ଆଉ ପରିଣତ ବୟସରେ ରାତି କଟୁଛି ପାଇଖାନା ଘରେ । ତେବେ ସ୍ୱୀକୃତିଙ୍କ କଷ୍ଟକୁ ପ୍ରଶାସନ ଅନୁଭବ କରି ଖୁବଶୀଘ୍ର ସମାଧାନ କରୁ ଆଉ ତାଙ୍କୁ ଘରଟିଏ ଯୋଗାଇ ଦେଉ ବୋଲି ଦାବି ହୋଇଛି ।