କମୁଥିଲା ଅମ୍ଳଜାନ, ସରୁଥିଲା ଆୟୁଷ… ହସ୍ପିଟାଲ ହାତ ଟେକି ଦେବା ପରେ ସ୍ୱାମୀ ମୁହଁରେ ଜୀବନ ଫୁଙ୍କୁଥିଲା ସ୍ତ୍ରୀ । ଅଟୋ ଭିତରେ ଚାଲିଥିଲା ନିଶ୍ୱାସ-ବିଶ୍ୱାସର ଖେଳ…
କନକ ବ୍ୟୁରୋ: ତମେ ବଞ୍ଚିବ ନିଶ୍ଚୟ ବଞ୍ଚିବ… ମୋ ନିଶ୍ୱାସ ନେଇ ତମେ ବଞ୍ଚିବ, ମୋ ଜୀବନ ନେଇ ତମେ ଜିଇଁବ… ମୁଁ ଥାଉ ଥାଉ ତମେ ମରି ପାରିବନି, ମତେ ଛାଡି କୁଆଡେ ଯାଇପାରିବନି… ? ହାରିଯିବ ଯମ, ହାରିଯିବ କରୋନା… ତମେ ବଞ୍ଚିବ, ନିଶ୍ଚୟ ବଞ୍ଚିବ…
Kanak News is now on WhatsApp
Join and get latest news updates delivered to you via WhatsApp
ସରି ଆସୁଥିଲା ସ୍ୱାମୀଙ୍କ ଆୟୁଷ, କମି ଆସୁଥିଲା ଅକ୍ସିଜେନ । ମୃତ୍ୟୁ ମୁହାଁ ହେଉଥିବା ନିଜର ମଣିଷ, ନିଶ୍ୱାସ ବିନା ଅଟୋରେ ଛଟପଟ ହେଉଥିଲେ । ଆଉ ଏତିକି ବେଳେ ଯମ ମୁହଁରୁ ସ୍ୱାମୀଙ୍କ ଜୀବନ ବଞ୍ଚାଇବାକୁ ନିଜ ମୁହଁକୁ ସ୍ୱାମୀଙ୍କ ମୁହଁରେ ଲଗାଇ ଫୁଙ୍କିବାରେ ଲାଗିଥିଲେ ସ୍ତ୍ରୀ । ପତିଙ୍କ ପ୍ରାଣ ବଞ୍ଚାଇବାକୁ ପ୍ରାଣମୂର୍ଚ୍ଛା ଉଦ୍ୟମ କରିଥିଲେ ପତ୍ନୀ । ସ୍ୱାମୀଙ୍କ ଆୟୁଷ ସରୁଥିଲା, କିନ୍ତୁ ସରୁନଥିଲା ସ୍ତ୍ରୀଙ୍କ ଆପ୍ରାଣ ଚେଷ୍ଟା । ନିଜ ସିନ୍ଦୂରକୁ ବଞ୍ଚାଇବାକୁ ଶହେ ଚେଷ୍ଟା କରି ଶେଷ ବିଫଳ ହେଲେ ସ୍ତ୍ରୀ । ମରିଗଲେ ସ୍ୱାମୀ, ହାରିଗଲେ ସ୍ତ୍ରୀ । ପତ୍ନୀର କୋଳରେ ପ୍ରାଣତ୍ୟାଗ କଲେ ପତି । ଆଉ ଯମ ସହ ଲଢେଇ କରି କରି ସ୍ତ୍ରୀଟିଏ ସାଜିପାରିଲାନି ଏ ଯୁଗର ସାବିତ୍ରୀ…
ଅକ୍ସିଜେନର ଅଭାବର ଏ ଭୟଙ୍କର ଆଁ ଭିତରେ ୟୁପି ଆଗ୍ରାରୁ ଆସିଛି ଏ ଛାତିଥରା କାହାଣୀ । ଯେଉଁଠି ସ୍ତ୍ରୀର ଶତ ଚେଷ୍ଟା ପରେ ସ୍ୱାମୀ ପାଲଟିଗଲା ଶବ । ତେବେ ଆଗ୍ରାର ବିକାଶ କଲୋନୀ ସେକ୍ଟର ୭ରେ ରହୁଥିବା ରେଣୁ ସିଙ୍ଘଲ ନିଜ ପତିଙ୍କୁ ହସ୍ପିଟାଲ ନେଇ ଆସିଥିଲେ । ସ୍ୱାମୀ ରବି ସିଙ୍ଘଲଙ୍କ ହଠାତ ଦେହ ଖରାପ ହେବା ସବ ନିଶ୍ୱାସ ନେବାରେ ଅସୁବିଧା ହେଲା । ଆଉ ତାପରେ ସ୍ୱାମୀଙ୍କୁ ଏକ ଅଟୋରେ ବସାଇ ମେଡିକାଲ ଆଣିଥିଲେ ସ୍ତ୍ରୀ । କିନ୍ତୁ ହସ୍ପିଟାଲରେ ଆଡମିଶନ ପୂର୍ବରୁ ହିଁ ଅଣନିଶ୍ୱାସୀ ହୋଇ ଛଟପଟ ହୋଇଥିଲେ ରବି । ବାସ ତାପରେ ସ୍ୱାମୀଙ୍କର ଏମିତି ଅବସ୍ଥା ଦେଖି ନିଜ ମୁହଁକୁ ସ୍ୱାମୀଙ୍କ ମୁହଁରେ ଲଗାଇ ନିଶ୍ୱାସ ଦେବାକୁ ଚେଷ୍ଟା କରିଥିଲେ ବି ଶେଷରେ ଅକ୍ସିଜେନ ଅଭାବରେ ସ୍ତ୍ରୀ କୋଳରେ ଆଖିବୁଜିଥିଲେ ସ୍ୱାମୀ ।
ଅକ୍ସିଜେନ ପାଇଁ ଏବେ ସବୁଠି ହାହାକାର । ନିଶ୍ୱାସ ନିଅଣ୍ଟ ହେଉଥିବାରୁ ଏବେ ଅଣନିଶ୍ୱାସୀ ଭାରତ । ମହାମାରୀ ଦେଶରେ ମୃତ୍ୟୁର ତାଣ୍ଡବ ରଚୁଥିବା ବେଳେ ଅକ୍ସିଜେନର ଅଭାବ ମୃତ୍ୟୁ ଦୁଆର ଦେଖାଉଛି । ଯାହାର ବଡ ଉଦାହରଣ ଆଗ୍ରାର ଏ ହୃଦୟ ଦୋହଲା କାହାଣୀ । ସ୍ୱାମୀ-ସ୍ତ୍ରୀଙ୍କ ଅସହାୟତାର ଏ ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ସରକାରଙ୍କ ଅଲ ଇଜ ୱେଲ କଥା ବାହାସ୍ଫୋଟ ବୋଲି ସ୍ପଷ୍ଟ ପ୍ରମାଣିତ ହେଉଛି । ଆଉ ଉତ୍ତରପ୍ରଦେଶର ଛାତି ଉପରେ ଛିଡା ହୋଇଥିବା ଏ ଅଟୋରୁ ଶବ ସରକାରଙ୍କୁ ଉତ୍ତର ମାଗୁଛି…?