ଅଭାବ ଭିତରେ ଆଶାର ଆଲୋକ ବୁଣିଲେ ବିଶ୍ୱଜିତ୍ । ମାଟ୍ରିକରେ ରଖିଲେ ୯୦%ରୁ ଅଧିକ ମାର୍କ । ଛାତିଫୁଲାଇ ଦେବ କରୋନା କାଳରେ ଚାକିରି ହରାଇଥିବା ଜଣେ ବାପାର ଟପ୍ପର ପୁଅର ଏହି କାହାଣୀ ।
କନକ ବ୍ୟୁରୋ : ଗାଁ ପାଇଁ ଗୌରବ ଆଣିଲା ଗରିବ ବାପାର ସୁନା ପୁଅ । କରୋନା କାଳରେ ଚାକିରି ହରାଇଥିବା ଜଣେ ବାପାର ଟପ୍ପର ପୁଅର ଏହି କାହାଣୀ ଶୁଣିଲେ ଯେକେହିବି ଭାବବିହ୍ୱଳ ହୋଇଯିବ । ଅଭାବ ଅନଟନର ଅନ୍ଧାର ଭିତରେ ଆଶାର ଆଲୋକ ବୁଣିଦେଇଛନ୍ତି ବିଶ୍ୱଜିତ୍ । ବାପାଙ୍କ ଅକ୍ଳାନ୍ତ ପରିଶ୍ରମର ମୂଲ ରଖି ମାଟ୍ରିକ୍ ପରୀକ୍ଷାରେ ଆଣିଛନ୍ତି ୯୦ ପ୍ରତିଶତରୁ ଅଧିକ ମାର୍କ ।
Kanak News is now on WhatsApp
Join and get latest news updates delivered to you via WhatsApp
ମାଟ୍ରିକ ପରୀକ୍ଷା ରେଜଲ୍ଟକୁ ନେଇ ସାରା ରାଜ୍ୟରୁ ଅଶାନ୍ତିର ବିଭିନ୍ନ ଖବର ଆସୁଥିବା ବେଳେ କଟକ ଜିଲ୍ଲା ନିଆଳି କୃଷ୍ଣପ୍ରସାଦ ଗାଁରୁ ଆସିଛି, କରୋନା କାଳରେ କମ୍ପାନୀରୁ ଚାକିରି ହରାଇଥିବା ଜଣେ ଗରିବ ବାପାର ଟପ୍ପର ପୁଅର କାହାଣୀ । ଚଳିତ ବର୍ଷ ମାଟ୍ରିକ ପରୀକ୍ଷାରେ ୫୪୫ ନମ୍ବର ରଖି କଟକ କଲେଜଛକ ସରସ୍ୱତୀ ଶିଶୁ ବିଦ୍ୟାମନ୍ଦିରର ଟପ୍ପର ହୋଇଛନ୍ତି ବିଶ୍ୱଜିତ୍ ରାଉତ ।
ବିଶ୍ୱଜିତଙ୍କ ବାପା ଦେବେନ୍ଦ୍ର ରାଉତ ଏକ କମ୍ପାନୀରେ କାମ କରୁଥିଲେ । ମାସକୁ ଯାହା କିଛି ରୋଜଗାର ହୁଏ ସେଥିରେ ପରିବାର ଚଳାଇ ପୁଅର ପାଢପଢା ଖର୍ଚ୍ଚ ବହନ କରିବା କଷ୍ଟକର । ଅଭାବ ଭିତରେ ବି କେବେ ହେଲେ ପୁଅର ପାଠପଢାରେ ସେ ଅବହେଳା କରିନାହାନ୍ତି । ହେଲେ ୨ ବର୍ଷ ହେବ କରୋନା କଟକଣା ପାଇଁ କମ୍ପାନୀ ବନ୍ଦ ହୋଇଯିବାରୁ ଚାକିରୀ ହରାଇ ଦୁଃଖରେ ଦିନ କାଟୁଛନ୍ତି ଦେବେନ୍ଦ୍ର । ପରିବାର ଚଳାଇବା କଷ୍ଟ ହୋଇପଡିବାରୁ ନିଜ ସ୍ତ୍ରୀ ଏବଂ ପୁଅକୁ ଗାଁକୁ ପଠେଇଦେଇ ରୋଜଗାର ଆଶାରେ ଏବେ କଟକରେ ସଂଘର୍ଷ କରୁଛନ୍ତି ।
ପିଲାଟି ଦିନରୁ ଭଲ ପାଠ ପଢନ୍ତି ବିଶ୍ୱଜିତ୍ । ଆଉ ସେଥିପାଇଁ ପୁଅ ଏବଂ ସ୍ତ୍ରୀଙ୍କୁ ଗାଁରୁ ଆଣି କଟକରେ ରଖିଥିଲେ ଦେବେନ୍ଦ୍ର । ପିଲାଟି ଦିନରୁ ଅନେକ ମେଧାବୃତ୍ତି ପାଇଛନ୍ତି ବିଶ୍ୱଜିତ୍ । ତେବେ ବିଶ୍ୱଜିତ୍ ମାଟ୍ରିକ୍ ପରୀକ୍ଷା ହୋଇଥିଲେ ଆଉ ଟିକେ ଅଧିକ ନମ୍ବର ରଖିଥାନ୍ତେ ବୋଲି କହିଥିବା ବେଳେ, ପୁଅର ଏପରି ସଫଳତା ବାପା ମାଙ୍କୁ ଗର୍ବିତ କରିଛି ।
କଥାରେ ନାହିଁ, ମନରେ ଦୃଢ ଇଚ୍ଛାଶକ୍ତି ଆଉ ଆତ୍ମବିଶ୍ୱାସ ଥିଲେ, ସବୁ କାମ ସମ୍ଭବ ହୋଇପାରିବ । ଏହାକୁ ପ୍ରମାଣ କରିଛନ୍ତି ବିଶ୍ୱଜିତ୍ । ଆଉ ଦରିଦ୍ରତା ଭିତରେ ବି ଆଶାର କିରଣ ସାଜିଛନ୍ତି । ତେବେ ଆଗକୁ ଯୁକ୍ତ ୨ରେ ମଧ୍ୟ ଭଲ ନମ୍ବର ରଖି ଜଣେ ଏରୋସ୍ପେସ୍ ଇଞ୍ଜିନିୟର ହେବାକୁ ଲକ୍ଷ୍ୟ ରଖିଛନ୍ତି ବିଶ୍ୱଜିତ ।