ଭାଙ୍ଗି ଯାଇଛି ଘର, ଉଡିଯାଇଛି ଚାଳ । ଫନୀ ପରେ ବି ମିଳିନି ସହାୟତା, ପିପିଲିକୁ ମାଳ ମାଳ ନେତାମନ୍ତ୍ରୀ ଯାଉଛନ୍ତି । ହେଲେ କାହାରି ଆଖିରେ ପଡୁନି ରବି ମାଷ୍ଟ୍ରେଙ୍କ ଦୁଃଖ…
କନକ ବ୍ୟୁରୋ: ପେଟ ପାଇଁ ପାଦ ମାଡେ ପେଡାଲ. ଘାଇ ଘାଇ ଘୁରେ ଚକ । ପରିଣତ ବୟସରେ ପରିବାର ପୋଷିବାକୁ ଛୁଞ୍ଚି ସୂତା ସହ ନିତିଇ ଚାଲେ ସମ୍ପର୍କ ଗଢା । ରଙ୍ଗୀନ ସୂତାରେ ସିନା ସେ ସିଇଁ ଦିଅନ୍ତି ଅନ୍ୟର ପୋଷାକ, ହେଲେ ନିଷ୍ଠୁର ସମୟକୁ ପାରନ୍ତିନି ସିଲେଇ । ପରର ଚିରା ଫଠା ଜାମା ଯୋଡି ଦିଅନ୍ତି କିନ୍ତୁ ଯୋଡି ପାରନ୍ତିନି ନିଜର ଭାଗ୍ୟ । ଏଇ ପୁରୁଣା ମେସିନ, ଭଙ୍ଗା କେବିନରେ ବସି କପଡା ସହ କସରତ କରି ଘର ଚଳାନ୍ତି ଦରିଦ୍ର ଦର୍ଜୀ । କାରଣ ଚକ ନଚାଲିଲେ ପରିବାର ଚଳିବନି, ସିଲେଇ ନକଲେ ଦାନା ମିଳିବନି…
Kanak News is now on WhatsApp
Join and get latest news updates delivered to you via WhatsApp
ସେଇଠି କପଡା, ସେଇଠି ମେସିନ, ସେଇଛି ମାଠିଆ, ସେଇଠି ସାଇକେଲ । ଘର ଭାଙ୍ଗିଯାଇଛି, ଛପର ଉଡିଯାଇଛି, ଚାଳ ଉଲୁରି ପଡିଛି । ତଥାପି ସେ ଅସଜଡା ଘରେ କିନ୍ତୁ ଅନ୍ୟର ବେଶ ସଜାଡୁଛନ୍ତି ରବି ମାଷ୍ଟ୍ରେ । ସେ ସାର୍ଟ ହେଉ କି କୁର୍ତ୍ତା, ପାଇଜାମା ହେଉ କି ପ୍ୟାଣ୍ଟ , ତିଆରି କରିବେ ତ ରବି ମାଷ୍ଟ୍ରେ କରିବେ । ତେଣୁ ପୁରୀ ଡେଲାଙ୍ଗ ସୁଜନପୁର ରଙ୍ଗଣୀ ସାହିର ରବିନାରାୟଣ ସାହୁଙ୍କ ଏହି ରାସ୍ତା କଡ କେବିନକୁ କପଡା ଧରି ଆସନ୍ତି ଲୋକେ । ଭଲ କାମ ପାଇଁ ଆଖପାଖ ଅଞ୍ଚଳରେ ରବି ମାଷ୍ଟ୍ରେ ବେଶ୍ ଜଣାଶୁଣା । ଆଉ ହାତ ତିଆରି ପୋଷାକ ପିନ୍ଧିବାକୁ ଲୋକଙ୍କର ବି ଭିଡ ଜମେ । ହେଲେ ଏହି ଭଙ୍ଗା ଘର ପାଇଁ ଏବେ ଧିରେଧିରେ କମିଲାଣି ଲୋକଙ୍କ ଆସିବା ।
ଗତ ଫନୀର ପବନରେ ଭାଙ୍ଗିଯାଇଥିଲା ରବିଙ୍କ ଦୋକାନ ଘର । ଆଉ ୟାରି ଭିତରେ ଫନୀ ଫେରିଯିବାକୁ ୨ ବର୍ଷ ବିତିଲାଣି । କ୍ଷତିଗ୍ରସ୍ତଙ୍କୁ ସହାୟତା ବି ମିଳିଲାଣି । ହେଲେ ରାସ୍ତା ପାଖରେ ଥାଇ ମଧ୍ୟ ସରକାରୀ ବାବୁଙ୍କ ନଜରୁ ଖସିଯାଇଥି ରବିଙ୍କ ପେଟପୋଷା କେନ୍ଦ୍ର । ଘରେ ଚାରି ଚାରିଟି ପ୍ରାଣୀ । ଯାହା ଏଉଠୁ ରୋଜଗାର ହୁଏ ସେଥିରେ ସମସ୍ତଙ୍କ ପାଇଁ ତେଲ, ଲୁଣ ଯାଏ । ଅନଲାଇନ ଯୁଗରେ ଲୋକେ ଫ୍ଲିପକାର୍ଡ, ଆମାଜନ, ମିନତ୍ରା ଆଦି ସପିଂ ସାଇଟରୁ ପୋଷାକ କିଣୁଥିଲେ ବି ରବି ମାଷ୍ଟ୍ରେଙ୍କ ହାତ ତିଆରି କପଡାର ନାଁ ଡାକରା ରହିଛି ସ୍ଥାନୀୟ ଅଞ୍ଚଳରେ । ହେବେ ଦୋକାନ ଭାଙ୍ଗିଯାଇଥିବାରୁ ପୋଷାକ ସିଲେଇ ପାଇଁ ଆସୁ ନାହାନ୍ତି ଲୋକେ । ଚାଳ କଣା ଥିବାରୁ କାଳେ ବର୍ଷା ପାଣି, ଧୂଳି ପଶି ପୋଷାକ ନଷ୍ଟ ହେବ ସେ ଆଶଙ୍କାରେ କେହି ବି ଏବେ ମାଷ୍ଟ୍ରେଙ୍କ କେବିନ ମାଡୁନାହାନ୍ତି । ତେଣୁ ଭଙ୍ଗା ଭାଗ୍ୟକୁ ନେଇ ସୂତା ସହ ସଙ୍ଘର୍ଷ କରି ଚାଲିଛନ୍ତି ରବି ।
ଅନ୍ୟପଟେ ଗାଁରୁ ୧୫ କିମି ସାଇକେଲରେ ଆସି ଏହି କେବିନରେ କାମ କରୁଥିବା ରବି ମଉସା ଦିନରେ ପଖାଳ ଶାଗରେ ପେଟ ପୂରାନ୍ତି । ଜମିବାଡି କିଛି ନାହିଁ, ଏଇ ଟେଲର ହିଁ ଏକମାତ୍ର ଭରସା ବୋଲି ସରକାରୀ ବାବୁଙ୍କୁ ସହଯୋଗ ଲୋଡିଲେଣି ଅନେକ ଥର । ହେଲେ କେହି ରବିଙ୍କୁ ଆଡଆଖିରେ ବି ଦେଖୁନାହାନ୍ତି ।
ପିପିଲି ଉପନିର୍ବାଚନ ପାଇଁ ମାଳମାଳ ନେତା ମନ୍ତ୍ରୀଙ୍କର ପାଦ ଏବେ ସେ ଅଞ୍ଚଳରେ ପଡୁଛି । ପ୍ରଚାର ପାଇଁ ଯେମିତି ବି ହେଉ ନେତାମାନେ ରବିଙ୍କ କେବିନ ଦେଇ ଯାଉଥିବେ, ତାଙ୍କୁ ଭୋଟ ମାଗୁଥିବେ । ହେଲେ କେମିତି ସେମାନଙ୍କ ଆଖି ଏ ଭଙ୍ଗା ଦୋକାନ ଉପରେ ପଡିଲାନି । ଭୋଟ ମାଗିବା ବେଳେ ଓ ପରେ କଣ ନେତାଏ ଅନ୍ଧ ପାଲଟି ଯାଆନ୍ତି । ସରକାରୀ ବ୍ୟବସ୍ଥା ଓ ନିର୍ବାଚନୀ ସ୍ୱାର୍ଥକୁ ପ୍ରଶ୍ନ ପଚାରୁଛି ରବି ମାଷ୍ଟ୍ରେଙ୍କ ଛୁଞ୍ଚି ସୂତା …