ଗାଧୋଇବା ବେଳେ ନଦୀରେ ଭାସିଗଲେ ବୃଦ୍ଧା, ଲଟାବୁଦାକୁ ଧରି ୨୪ ଘଣ୍ଟା ପାଣି ସହ କଲେ ସଂଘର୍ଷ, ଦିନକ ପରେ ହେଲେ ଉଦ୍ଧାର ।
କନକ ବ୍ୟୁରୋ: ରଖେ ହରି ତ ମାରେ କିଏ? ଭାସିଗଲା ବେଳେ କୁଟାଖିଅ ଆଶ୍ରା ହୋଇଥାଏ । ବଂଶଧାରା ନଦୀରେ ଭାସି ଯାଇଥିବା ଜଣେ ବୃଦ୍ଧା ଉଦ୍ଧାର ହେବା ପରେ ଏହି ଦୁଇ କଥା ପୁଣି ଥରେ ପ୍ରମାଣିତ ହୋଇଛି । ଗଜପତି ଜିଲ୍ଲା କାଶୀନଗର ବଂଶଧାରା ନଦୀରେ ନିଖୋଜ ଥିବା ଜଣେ ବୃଦ୍ଧାଙ୍କୁ ୨୪ ଘଂଟା ଧରି ଲଟାବୁଦାକୁ ଆଶ୍ରା କରି ଭାସି ରହିବା ପରେ ଆଶ୍ଚର୍ଯ୍ୟଜନକ ଭାବେ ଜୀବିତ ଭାବେ ଉଦ୍ଧାର କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, କାଶୀନଗର ବାସିନ୍ଦା ରତନ ପାତ୍ର ନାମକ ଜଣେ ବୃଦ୍ଧା ଶୁକ୍ରବାର ହନୁମାନ ମନ୍ଦିର ନିକଟ ବଂଶଧାରା ନଦୀକୁ ଗାଧୋଇବା ପାଇଁ ଯାଇଥିଲେ । ତେବେ ଗାଧୋଇବାବେଳେ ସେ ନଦୀର ପ୍ରଖର ସ୍ରୋତରେ ପଡି ଭାସି ଯାଇଥିଲେ । ଗ୍ରାମବାସୀ ଓ ଦମକଳବାହିନୀ ବିଳମ୍ବିତ ରାତି ପର୍ଯ୍ୟନ୍ତ ଖୋଜାଖୋଜି କରିଥିଲେ ମଧ୍ୟ ତାଙ୍କର କୌଣସି ପତା ମିଳିନଥିଲା ।
ଆଉ ତାପରଦିନ ଅର୍ଥାତ୍ ଶନିବାର ପୂର୍ବାହ୍ନରେ ପୁଣି ଖୋଜାଖୋଜି ଆରମ୍ଭ ହୋଇଥିଲା । ହେଲେ ଅପରାହ୍ନ ୫ଟାରେ ନୂଆ କାଶୀନଗର ନିକଟ ଏକ ଲଟାବୁଦାକୁ ଧରି ବୃଦ୍ଧା ଜଣକ ପଡି ରହିଥିବା ଗ୍ରାମାବାଦୀ ଦେଖିବାକୁ ପାଇଥିଲେ । ଏନେଇ ଦମକଳବାହିନୀକୁ ଖବର ଦେଇଥିଲେ ଗ୍ରାମାବାସୀ । ତାପରେ ଦମକଳବାହିନୀର କର୍ମଚାରୀ ଓ ଗ୍ରାମବାସୀ ମିଳିତ ଭାବେ ବୃଦ୍ଧାଙ୍କୁ ଅତି ମୁମୂର୍ଷ ଅବସ୍ଥାରେ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତି କରିଥିଲେ । ତେବେ ନଖାଇ ନପିଇ ଦୀର୍ଘ ୨୪ ଘଂଟା ପାଣି ଭିତରେ ଲଟାବୁଦା ସାହାରାରେ ବଂଚି ରହିବା ସମସ୍ତଙ୍କୁ ଚକିତ କରିଛି ।