କନକ ବ୍ୟୁରୋ: ହାତରେ ପେଡାଲ ମାରି ମାରି ଆଉ ରାସ୍ତାରେ ପରିଶ୍ରମ କରିବେନି ଦିବ୍ୟାଙ୍ଗ କି ଉଠାଣି ଜାଗାରେ ଦମ ଲଗାଇ ଅଣନିଶ୍ୱାସୀ ହୋଇଯିବେନି ଦିବ୍ୟାଙ୍ଗ ବ୍ୟକ୍ତି । କାରଣ ସେମାନଙ୍କ ସବୁ ସମସ୍ୟାର ସମାଧାନ କରିବ ଏ ବ୍ୟାଟେରୀ ଚାଳିତ ଟ୍ରାଇସାଇକେଲ । ଯେଉଁଥିଲେ ବାଇକ ଭଳି ଚାବି ଅନ କରି ଖାଲି ଏକ୍ସିଲେଟର ମୋଡିଦେଲେ ରାସ୍ତାରେ ଗିଡି ଗିଡି ହୋଇ ଗଡିଯିବ ଦିବ୍ୟାଙ୍ଗଙ୍କ ପାଇଁ ନିର୍ମାଣ ହୋଇଥିବା ଏହି ମୋଟରାଇଜ ଟ୍ରାଇସାଇକେଲ । ଯାହା ଦିବ୍ୟାଙ୍ଗଙ୍କ ଯାତାୟତକୁ ସୁବିଧା ଓ ସୁଗମ କରିବ ।
Kanak News is now on WhatsApp
Join and get latest news updates delivered to you via WhatsApp
ତେବେ ଦିବ୍ୟାଙ୍ଗମାନଙ୍କ କଷ୍ଟ ଯନ୍ତ୍ରଣାକୁ ପ୍ରତିଦିନ ପାଖରୁ ଦେଖି ସେମାନଙ୍କ ପାଇଁ ସୁବିଧା କରିବାକୁ ଭିନ୍ନ କିଛି ଚିନ୍ତା କରି ଏହି ବ୍ୟାଟେରୀ ଚାଳିତ ତିନି ଚକିଆ ସାଇକେଲ ନିର୍ମାଣ କରିଛନ୍ତି କଟକ ଯୋବ୍ରା ଅଞ୍ଚଳର ମେକାନିକ ରାଜେନ୍ଦ୍ର ବେହେରା । ସାଧାରଣ ସାଇକେଲରେ ଯନ୍ତ୍ରାଂଶ ଖଞ୍ଜି ୬୦ ବର୍ଷର ରାଜେନ୍ଦ୍ର ଦିବ୍ୟାଙ୍ଗମାନଙ୍କ ପାଇଁ ନୂଆକିଛି କରିଦେଖାଇଛନ୍ତି । ଦୀର୍ଘ ୨ ମାସ ଭିତରେ ଏହି ଟ୍ରାଇସାଇକେଲ ତିଆରି ହୋଇଛି ଯାହାକୁ ଦୁଇ ଗୋଡ, ଗୋଟିଏ ହାତ ଅଚଳ ଥିବା ଲୋକ ବି ଆରାମରେ ଗୋଟିଏ ହାତରେ ଚଲାଇ ପାରିବେ ।
ବ୍ୟାଟେରୀ ଚାଳିତ ଏହି ତିନିଚକିଆ ଗାଡିରେ ଗୋଟିଏ ପଟରେ ହିଁ ଏକ୍ସିଲେଟର, ବ୍ରେକ, ଚାବି ଏବଂ ହ୍ୟାଣ୍ଡେଲ ରହିଛି । ଥରକେ ଦୁଇରୁ ଅଢେଇ ଘଣ୍ଟା ଚାର୍ଜ କଲେ ଏହି ମୋଟରାଇଜ ସାଇକେଲ ୪୦ରୁ ୫୦ କିଲୋମିଟର ଯାଏଁ ଚାଲିପାରିବାର କ୍ଷମତା ରଖିଛି । ତେବେ ଏହାର ବେଗ ୨୨ରୁ ୨୫ ଥିବା ବେଳେ ଦିବ୍ୟାଙ୍ଗଙ୍କ ସୁରକ୍ଷା ଦୃଷ୍ଟିରୁ ଏହାକୁ କମାଇ ୧୫ରୁ ୧୮ରେ ପରିଣତ କରିଛନ୍ତି ରାଜେନ୍ଦ୍ର । ଖାଲି ଦିନ ନୁହେଁ ରାତିରେ ଚଳପ୍ରଚଳ ପାଇଁ ମଧ୍ୟ ଟ୍ରାଇସାଇକେଲରେ ଲାଇଟ ଲାଗିଛି । ଏହାସହ ଜିନିଷପତ୍ର ବୁହାବୁହି ପାଇଁ ପଛରେ ଏକ ବାସ୍କେଟ ବି ଲଗାହୋଇଛି ।
ଟ୍ରାଇସାଇକେଲ ତିଆରି ପାଇଁ ରାଜେନ୍ଦ୍ରଙ୍କୁ ୨୦ରୁ ୨୨ ହଜାର ଟଙ୍କା ଖର୍ଚ୍ଚ କରିବାକୁ ପଡିଛି । ଯଦି କେହି ପୁରୁଣା ଟ୍ରାଇସାଇକେଲକୁ ଏମିତି ବ୍ୟାଟେରୀ ଚାଳିତ କରିବାକୁ ଚାହୁଁଛନ୍ତି ତେବେ ୧୭ରୁ ୧୮ ହଜାର ଟଙ୍କା ଖର୍ଚ୍ଚ ହେବ । ଆଉ ଯଦି କେହି ଅର୍ଡର କରିବାକୁ ଚାହୁଁଛନ୍ତି ତେବେ ଏହି ନମ୍ବର ୯୯୩୭୦୩୬୪୬୮ରେ ଯୋଗାଯୋଗ କରି ଅର୍ଡର କରିପାରିବେ । ଯାହା ଦୁଇ ଦିନ ଭିତରେ ଡେଲିଭରି ହୋଇଯିବ । ଏବଂ ଏହି ବ୍ୟାଟେରୀ ଚାଳିତ ଟ୍ରାଇସାଇକେଲ ନେଇ ଜଣେ ଦିବ୍ୟାଙ୍ଗ ବିଭିନ୍ନ ବ୍ୟବସାୟ କରି ଆତ୍ମନିର୍ଭର ହୋଇପାରିବ ।