ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବାକୁ ୨୨ ଦିନରେ ୭୫୦ କିଲୋମିଟର ପଦଯାତ୍ରା କଲେ ବୃଦ୍ଧ । ପଢନ୍ତୁ, କେମିତି କଲେ ସାକ୍ଷାତ…
କନକ ବ୍ୟୁରୋ: ପ୍ରଧାନମନ୍ତ୍ରୀ ମୋଦୀଙ୍କୁ ଭେଟ କରିବାକୁ ୭୫୦ କିଲୋମିଟର ପଦଯାତ୍ରା । କଥାଟି ଆପଣଙ୍କୁ ଆଶ୍ଚର୍ଯ୍ୟ ଲାଗୁଥିଲେ ବି ସତ । ମଧ୍ୟପ୍ରଦେଶର ଜଣେ ବ୍ୟକ୍ତି ପ୍ରଧାନମନ୍ତ୍ରୀ ମୋଦୀଙ୍କୁ ଭେଟି କରିବାକୁ ୨୨ ଦିନରେ ଚାଲି ଚାଲି ଅତିକ୍ରମ କରିଛନ୍ତି ୭୫୦ କିଲୋମିଟର ରାସ୍ତା । ଆଉ ଶେଷରେ ତାଙ୍କର ଇଚ୍ଚା ପୂରଣ ହୋଇଛି । ପ୍ରଧାନମନ୍ତ୍ରୀ ମୋଦୀ ନିଜେ ଆସି ତାଙ୍କ ସହିତ ଦେଖା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମଧ୍ୟପ୍ରଦେଶର ଦେବରୀ ସାଗର ଜିଲ୍ଲାରେ ରହୁଥିବା ୬୩ ବର୍ଷୀୟ ଛୋଟେଲାଲ ଅହିରବାର ମୋଦୀଙ୍କୁ ଦେଖା କରିବାକୁ ପଦଯାତ୍ରା ଆରମ୍ଭ କରିଥିଲେ । ଦୀର୍ଘ ୨୨ ଦିନର ଯାତ୍ରା ପରେ ସେ ଦିଲ୍ଲୀରେ ଯାଇ ପହଞ୍ଚିଥିଲେ । ହେଲେ ଏହାପରେ ତାଙ୍କୁ ପ୍ରଧାନମନ୍ତ୍ରୀଙ୍କ ସହିତ ଦେଖା କରିବାର ସୁଯୋଗ ମିଳିନଥିଲା । ହେଲେ ଯେତେବେଳେ ଏହି ଖବର କେନ୍ଦ୍ରମନ୍ତ୍ରୀ ପ୍ରହଲ୍ଲାଦ ସିଂହ ପଟେଲଙ୍କ କାନକୁ ଯାଇଥିଲା , ସେ ନିଜେ ଛୋଟେଲାଲଙ୍କୁ ନିଜ ଆବାସକୁ ଡାକିଥିଲେ ଓ ତାଙ୍କ ରହଣୀର ବ୍ୟବସ୍ଥା କରିଥିଲେ ।
ଏହାପରେ କେନ୍ଦ୍ରମନ୍ତ୍ରୀ ପ୍ରହଲ୍ଲାଦ ସିଂହ ପଟେଲ ଏନେଇ ପ୍ରଧାନମନ୍ତ୍ରୀଙ୍କ ଆବାସ ସହିତ ଯୋଗାଯୋଗ କରିଥିଲେ । ଆଉ ଶେଷରେ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିଥିଲେ ୬୩ ବର୍ଷୀୟ ତାଙ୍କର ଏହି ଫ୍ୟାନ୍ ଛୋଟେଲାଲ ଅହରିବାର । ମୋଦୀଙ୍କୁ ଭେଟିବା ପରେ ଛୋଟେଲାଲ ତାଙ୍କ ସହିତ କିଛି ସମୟ ଅତିବାହିତ କରିଥିଲେ । ଏହି ସମୟରେ ମୋଦୀ ତାଙ୍କୁ ପ୍ରଶ୍ନ କରିଥିଲେ, ମୋତେ ସାକ୍ଷାତ କରିବାକୁ ଦିଲ୍ଲୀକୁ ଚାଲି ଚାଲି ଆସିବା କଣ ଦରକାର ଥିଲା ? ଏହାର ଜବାବରେ ଛୋଟେଲାଲ କହିଥିଲେ, ଯଦି ସେ ଚାଲି ଚାଲି ଦିଲ୍ଲୀ ଆସିନଥାନ୍ତେ ତେବେ ବୋଧହୁଏ ସେ ପ୍ରଧାନମନ୍ତ୍ରୀଙ୍କୁ ଭେଟି ପାରିନଥାନ୍ତେ । ଏହି କଥା ଶୁଣିବା ପରେ ପ୍ରଧାନମନ୍ତ୍ରୀ ଛୋଟେଲାଲଙ୍କୁ କୋଳେଇ ନେଇଥିଲେ ।
ପ୍ରଧାନମନ୍ତ୍ରୀ ମୋଦୀଙ୍କ ସହିତ ଏହି ସାକ୍ଷାତ ସମୟରେ ଛୋଟେଲାଲ ତାଙ୍କ ଅଞ୍ଚଳରେ ଦେଖାଯାଉଥିବା ବିଭିନ୍ନ ସମସ୍ୟା ନେଇ ଆଲୋଚନା କରିଥିଲେ । ଦେବରୀ କ୍ଷେତ୍ରରେ ଏକ କାରଖାନା ପ୍ରତିଷ୍ଠା ପାଇଁ ବହୁଦିନରୁ ଦାବି ହୋଇ ଆସୁଥିବା ନେଇ ସେ ମୋଦୀଙ୍କୁ ଜଣାଇଥିଲେ । ଖାଲି ସେତିକି ନୁହେଁ, ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବା ପରେ ଛୋଟେଲାଲ ତାଙ୍କୁ ଓ କେନ୍ଦ୍ରମନ୍ତ୍ରୀ ପ୍ରହଲ୍ଲାଦ ସିଂହ ପଟେଲଙ୍କୁ ଧନ୍ୟବାଦ ଦେଇଛନ୍ତି ।