କେନ୍ଦୁଝର ହାଟଡିହି ବ୍ଲକରେ ଅଭାବ ପାଇଁ ୩ମାସର ଶିଶୁ ବିକ୍ରି କରୁଛି ଅସହାୟ ମାଆ। ତଦନ୍ତ କରି ସହାୟତା ପାଇଁ ପ୍ରତିଶ୍ରୁତି ଦେଲେ ଉପଜିଲ୍ଲାପାଳ।

କନକ ବ୍ୟୁରୋ: କୁହାଯାଏ ଅଭାବେ ସ୍ୱଭାବ ନଷ୍ଟ । ନିଜର ଅଭାବୀ ପରିସ୍ଥିତି ପାଇଁ ୩ ମାସର କଅଁଳ ଛୁଆଙ୍କୁ ବିକ୍ରି କରିଦେବାକୁ ପଛଘୁଞ୍ଚା ଦେଉନି ମାଆ । ଏଭଳି ଏକ ବିଚଳିତ କଲାଭଳି ଖବର କେନ୍ଦୁଝର ଜିଲ୍ଲା ହାଟଡିହି ବ୍ଲକର ବିଷ୍ଣୁପୁର ଗାଁରୁ ଆସିଛି । ସକାଳୁ ସକାଳୁ ନିଜ ଛୁଆକୁ ଧରି ଘର ଘର ବୁଲି ବିକ୍ରି ପାଇଁ ମୂଲଚାଲ କରୁଥିଲେ ମାଆ । ସାତ ମାସ ତଳୁ ଏକ ଦୁର୍ଘଟଣାର ନିଜ ସ୍ୱାମୀ ଓ ଶାଶୁଙ୍କୁ ହରାଇ ସଂପୂର୍ଣ୍ଣ ଅସହାୟ ହୋଇଯାଇଥିଲେ ମହିଳା । କିନ୍ତୁ ତାଙ୍କୁ କୌଣସି ସରକାରୀ ସହାୟତା ଆଜି ପର୍ଯ୍ୟନ୍ତ ମିଳିନି । ପୂର୍ବରୁ ୩ଟି ସନ୍ତାନ ଥିବା ବେଳେ ବଡ଼ପୁଅକୁ ଅନ୍ୟ ଏକ ସ୍ଥାନରେ ଶିଶୁ ଶ୍ରମିକଭାବେ କାମ କରିବାକୁ ଛାଡ଼ି ଦେଇଛନ୍ତି ଅସହାୟ ମାଆ । ବର୍ତମାନ ପୁଣି ଏକ କନ୍ୟା ସନ୍ତାନର ବୋଝ ବୋହିବାକୁ ଅସମର୍ଥ ହେଉଥିବା କହି ବିକ୍ରି କରିବାକୁ ବାଧ୍ୟ ହେଉଛି ମାଆ । ଏଭଳି ଘଟଣା ଜଣାପଡ଼ିବା ପରେ ଆନନ୍ଦପୁର ଉପଜିଲ୍ଲାପାଳ ତଦନ୍ତ କରି ସାହାଯ୍ୟ ଯୋଗାଇବା ପାଇଁ ଫୋନ ଯୋଗେ ପ୍ରତିଶ୍ରୁତି ଦେଇଛନ୍ତି । ଅନ୍ୟପଟେ ଚାଇଲ୍ଡ ଲାଇନ ସଦସ୍ୟ ମହିଳାଙ୍କ ନିକଟରେ ପହଂଚିବା ସହ ଉଭୟଙ୍କୁ ସୁରକ୍ଷା ଦେବା ପାଇଁ ପ୍ରୟାସ ଆରମ୍ଭ କରିଛି ।