ଆକସ୍ମିତ ମୃତ୍ୟୁ ପରେ ମହିଳାଙ୍କୁ ଝୁରୁଛନ୍ତି କୁକୁର, ଶବପାଖେ ଜଗି ବସିଛନ୍ତି । ସମ୍ବଲପୁରରୁ ଆସିଲା ପଶୁ-ମଣିଷର ପ୍ରୀତିଭରା ସମ୍ପର୍କ
କନକ ବ୍ୟୁରୋ: ତାଙ୍କର କେହି ନଥିଲେ..ନା ପରିବାର, ନା ସମ୍ପର୍କୀୟ । ଏକାନ୍ତ ଜୀବନରେ ଶୂନ୍ୟତା ହିଁ ଥିଲା ସବୁକିଛି । କିନ୍ତୁ ଏ କୁକୁରମାନେ ହିଁ ତାଙ୍କ ଜୀବନକୁ କରିଥିଲେ ରଙ୍ଗୀନ । ନିଜେ ମାଗିଯାଚି ଖାଉଥିଲେ ବି ପେଟରୁ କାଟି କୁକୁରଙ୍କୁ ଖୁଆଉଥିଲେ । ଆଉ ଅପରିଚିତା ମହିଳାଙ୍କ ଆତ୍ମୀୟତା ଭିତରେ ମଣିଷଠୁ ମମତା ପାଉଥିଲେ କୁକୁର । ସେଇଥିପାଇଁ ତ ମହିଳାଙ୍କ ମୃତ୍ୟୁ ପରେ ତାଙ୍କୁ ମଶାଣୀ ନଛାଡିବାକୁ ମାଟିରେ ଗୋଡ କଚାଡି ମନା କରୁଛନ୍ତି ଏ କୁକୁରମାନେ । ଶବ ପାଖରେ ନିଜ ସ୍ନେହୀ ମାକୁ ହରାଇ କାନ୍ଦୁଛନ୍ତି କୁକୁରମାନେ..
Kanak News is now on WhatsApp
Join and get latest news updates delivered to you via WhatsApp
ତେବେ ସମ୍ବଲପୁର ବୁର୍ଲା ନେତାଜୀ କ୍ଲବରେ ରହୁଥିଲେ ଜଣେ ଅପରିତା ମହିଳା । ୨୦-୨୫ ବର୍ଷ ହେବ ଉକ୍ତ କ୍ଲବରେ କାମଧନ୍ଦା କରି ଆସୁଥିବା କୁଦଙ୍କୁ ସେହି କ୍ଲବର ଯୁବକମାନେ ଯାହା ଦିଅନ୍ତି ତାକୁ ଖାଇ ସେହି କ୍ଲବରେ ରୁହନ୍ତି । ତେବେ ପରହାତ ପତାରେ ପେଟକୁ ଗଣ୍ଡେ ଦାନା ଦେଉଥିବା ଏ ମହିଳା ନିଜ ଖାଦ୍ୟରୁ କୁକୁରଙ୍କ ଖାଇବାକୁ ଦିଅନ୍ତି । ଏମିତି କି ରାତିରେ ମହିଳାଙ୍କ ପାଖରେ କୁକୁରମାନେ ବି ଶୁଅନ୍ତି । ମଣିଷ-କୁକୁରଙ୍କ ଏ ପ୍ରେମ କାହାଣୀ ସେତେବେଳେ ସମାଜ ଦେଖିଛି ଯେତେବେଳେ ଉକ୍ତ ମହିଳାଙ୍କ ମୃତ୍ୟୁ ହୋଇଛି ଆଉ ତାଙ୍କୁ ନେତାଜୀ କ୍ଲବର ଯୁବକମାନେ ମଶାଣୀ ନେଉଛନ୍ତି ସେତେବେଳେ ମହିଳାଙ୍କ ଶବଗାଡିକୁ ଛାଡିବାକୁ ନାରାଜ କୁକୁରମାନେ । ଯାହା ଏ ଚିତ୍ର ହିଁ ବୟାନ କରୁଛି । ଏମିତି ଲାଗୁଛି ସତେକି କୁକୁରମାନେ ଶେଷନିଦ୍ରାରେ ଶୋଇଥିବା ମହିଳାଙ୍କୁ ମାଟିରେ ଗୋଡ କଚାଡି କଚାଡି ଉଠ ଉଠ ବୋଲି କହୁଛନ୍ତି ।
ଏତିକିରେ ସରି ନଥିଲା ମଣିଷ-କୁକୁରର ସ୍ନେହ ମମତାର ସମ୍ପର୍କ । ମଶାଣୀରୁ ସିନା କୁକୁର ନିରାଶ ହୋଇ ଫେରିଲା କାଳେ ସେ ରହୁଥିବା କ୍ଲବରେ ତାଙ୍କ ମଣିଷ ମାଆ ଥିବ ସେଇ ଆଶାରେ କ୍ଲବ ଆଗରେ ଘୁରିବୁଲୁଛନ୍ତି କୁକୁର । ଆଉ କୁକୁରଙ୍କ ଏ ଦୁଃଖ ଦେଖିନପାରି ଖାଇବାକୁ ଦେଇଛନ୍ତି କ୍ଲବର ପିଲାମାନେ । ତେବେ ପଶୁ କେମିତି ମଣିଷର ସ୍ନେହରେ ବାନ୍ଧି ହୋଇ, ମୃତ୍ୟୁ ପରେ ମାଆ ଛେଉଣ୍ଡ ହୋଇଯାଏ ତାହା ସମ୍ବଲପୁରରୁ ଆସିଥିବା ଏହି ଘଟଣାରୁ ଜାଣି ହେଉଛି ।