ବଡ ଦୁର୍ଘଟଣାରୁ ବର୍ତିଲା ବିଶାଖାପାଟଣା-କୋର୍ବା ଏକ୍ସପ୍ରେସ ! ଭାଙ୍ଗି ଯାଇଥିବା ଟ୍ରାକ ଉପରକୁ ଆସିବା ପୂର୍ବରୁ ଅଟକିଲା
କନକ ବ୍ୟୁରୋ : କୋରାପୁଟ ଜୟପୁରରେ ଅଳ୍ପକେ ବର୍ତିଲା ବଡ ଧରଣର ଟ୍ରେନ ଦୁର୍ଘଟଣା । ଗତକାଲି ବିଳମ୍ବିତ ରାତିରେ ବିଶାଖାପାଟଣା-କୋର୍ବା ଏକ୍ସପ୍ରେସ ଏକ ବଡ ଦୁର୍ଘଟଣାରୁ ବର୍ତି ଯାଇଛି । ଭଙ୍ଗା ଟ୍ରାକ ଉପରକୁ ଆସିବା ଆଗରୁ ଅଟକି ଯାଇଥିଲା ବିଶାଖାପାଟଣା-କୋର୍ବା ଏକ୍ସପ୍ରେସ । ଟ୍ରେନ ଗନ୍ତବ୍ୟସ୍ଥଳରେ ପହଞ୍ଚିବାର କିଛି ସମୟ ପୂର୍ବରୁ ଟ୍ରାକରେ ଏକ ଭୟଙ୍କର ଶବ୍ଦ ଶୁଣା ଯାଇଥିଲା । ସଙ୍ଗେ ସଙ୍ଗେ ରେଳ କର୍ମଚାରୀ ସେହି ସ୍ଥାନକୁ ଯାଇ ଟ୍ରାକଟି ଫାଟି ଯାଇଥିବାର ଦେଖିଥିଲେ । ପରେ କର୍ମଚାରୀ ମାନେ ରେଳବିଭାଗକୁ ଏହି ସୂଚନା ଦେବା ପରେ ଅଟକି ଯାଇଥିଲା ବିଶାଖପାଟଣା-କୋର୍ବା ଏକ୍ସପ୍ରେସ ।
Kanak News is now on WhatsApp
Join and get latest news updates delivered to you via WhatsApp
ରେଳ କର୍ମଚାରୀଙ୍କ ଉପସ୍ଥିତି ବୁଦ୍ଧି ଯୋଗୁଁ ଏକ ବଡ ଧରଣର ରେଳ ଦୁର୍ଘଟଣାରୁ ରକ୍ଷା ପାଇ ଯାଇଛନ୍ତି ଯାତ୍ରୀ । ଟ୍ରାକରେ ଫାଟ ସୃଷ୍ଟି ହେବା ପରେ ଯୁଦ୍ଧକାଳୀନ ଭିତ୍ତିରେ ଏହାର ମରାମତି କରାଯାଇଥିଲା । ମରାମତି କାର୍ଯ୍ୟ ସମାପ୍ତ ହେବା ପର୍ଯ୍ୟନ୍ତ ଷ୍ଟେସନରେ ଅଟକି ଥିଲା ଟ୍ରେନ । ଅଢେଇ ଘଣ୍ଟାର ଟ୍ରାକ ମରାମତି ପରେ ବିଶାଖାପାଟଣା- କୋର୍ବା ମୁନିଗୁଡା ଷ୍ଟେସନ ଛାଡିଥିଲା । ତେବେ ଏତେ ବଡ ଘଟଣା ଘଟିଥିଲେ ମଧ୍ୟ ଯାତ୍ରୀ ମାନେ ଏହାର ଟିକିଏ ବି ସୁରାକ ପାଇ ନଥିଲେ । କିନ୍ତୁ ଏଠି ପ୍ରଶ୍ନ ଉଠୁଛି ବାରମ୍ବାର ରେଳ ଦୁର୍ଘଟଣା ହେଉଛି କଣ ପାଇଁ । ସାଧାରଣ ଲୋକଙ୍କ ପାଇଁ ରେଳଯାତ୍ରା କେତେ ସୁରକ୍ଷିତ ତାହାକୁ ନେଇ ପ୍ରଶ୍ନ ଉଠିଛି ।