ନେତା ଅବତାରରେ ପାୱାରଫୁଲ ବାବୁ: ଭୁବନେଶ୍ୱର କ୍ଲବ ସଭାପତି ପାଇଁ ଅସିତ-ବିଜୟଙ୍କ ମଧ୍ୟରେ ମହାଲଢ଼େଇ
କନକ ବ୍ୟୁରୋ: ଆସନ୍ତା ୨୫ ଏବଂ ୨୬ରେ ଭୁବନେଶ୍ୱର କ୍ଲବ ପାଇଁ ପଡିବ ଭୋଟ୍ । ହାଇପ୍ରୋଫାଇଲ ଲୋକଙ୍କୁ ନେଇ ରାଜଧାନୀର ପୋସ୍ ଏରିଆରେ ଥିବା କ୍ଲବର ନିର୍ବାଚନ ଉପରେ କ୍ଷମତାଶାଳୀ ଗୋଷ୍ଠୀଙ୍କ ନଜର ରହିଛି, କାରଣ ଦୀର୍ଘ ବର୍ଷ ପରେ ସଭାପତି ପଦ ପାଇଁ ଏଠି ଭୋଟ୍ ପଡିବାକୁ ଯାଉଛି । ସାମ୍ବାସାମ୍ନି ହୋଇଛନ୍ତି ଅସିତ୍ ତ୍ରିପାଠୀ ଏବଂ ବିଜୟ ପଟ୍ଟନାୟକ ।
ଠିକ୍ ନେତାଙ୍କ ଭଳି ଏହି ନିର୍ବାଚନ ପାଇଁ ବି ପ୍ରତିଶ୍ରୁତି ଦିଆଯାଉଛି । ପୂର୍ବତନ ମୁଖ୍ୟଶାସନ ସଚିବ ତଥା ମୁଖ୍ୟମନ୍ତ୍ରୀଙ୍କ ପରାମର୍ଶଦାତା ଅସିତ ତ୍ରିପାଠୀ ସଦସ୍ୟଙ୍କୁ ପ୍ରତିଶ୍ରୁତି ଦେଇ କହିଛନ୍ତି,
-କ୍ଲବର ରୂପାନ୍ତରଣ ପାଇଁ ସେ ଓ ତାଙ୍କ ଟିମ୍ ସଦସ୍ୟ କାର୍ଯ୍ୟ କରିବେ
-ବର୍ତ୍ତମାନ କ୍ଲବ ଯେଉଁ ସ୍ଥିତିରେ ରହିଛି ତାର ଉନ୍ନତୀକରଣ ହେବ
-ଘାଟିକିଆ ନିକଟରେ ତିଆରି ହେଉଥିବା ନୁଆ କ୍ଲବ ପାଇଁ ଆଗୁଆ ପଦକ୍ଷେପ ନିଆଯିବ
-ସହର ମଝିରେ ଥିଲେ ବି କ୍ଲବ ଚେହେରା ଅତି ଦୟନୀୟ, ଏଥିରେ ଉନ୍ନତି ଆସିବ
-ମେଟ୍ରୋ ସହରରେ ଥିବା କ୍ଲବ ଭଳି ଭୁବନେଶ୍ୱର କ୍ଲବର ରୂପରେଖ ହେବ
Kanak News is now on WhatsApp
Join and get latest news updates delivered to you via WhatsApp
କିଛି ଏଭଳି ପ୍ରତିଶ୍ରୁତି ସହ ପାଖାପାଖି ୨୫୦୦ ସଦସ୍ୟଙ୍କ ଭରସା ଜିତିବାକୁ ଚେଷ୍ଟା କରିଛନ୍ତି ଅସିତ୍ ତ୍ରିପାଠୀ । ଏକଦା ଶାସନ କଳର ସବୁଠାରୁ ଶୀର୍ଷରେ ଥିବା ଏହି ଅଧିକାରୀ ଏବେ କ୍ଲବର ଶୀର୍ଷ ଆସନ ଦଖଲ କରିବାକୁ ଚେଷ୍ଟା ଚଳାଇଛନ୍ତି ।
ଅସିତଙ୍କ ସାମ୍ନାରେ ରହିଛି ବିଜୟ ଚ୍ୟାଲେଞ୍ଜ । ଏକଦା ପାୱାରଫୁଲ ଅଫିସର୍ ଥିବା ବିଜୟ ପଟ୍ଟନାୟକ ମଧ୍ୟ ସଦସ୍ୟଙ୍କ ଭୋଟ୍ ପାଇବା ପାଇଁ ଉଦ୍ୟମ ଚଳାଇଛନ୍ତି । କ୍ଲବ ମେମ୍ବରଙ୍କୁ ମେସେଜ୍ ପଠାଇ ସେ ଲେଖିଛନ୍ତି, ଭୁବନେଶ୍ୱର କ୍ଲବ ହୃଦୟର ଅତି ନିକଟତର । ଏହି କ୍ଲବକୁ ଏକ ଆକର୍ଷଣୀୟ ସ୍ଥାନ କରିବାକୁ ସେ ତାଙ୍କ ସମୟ ଉତ୍ସର୍ଗ କରିବେ । ସଭାପତି ଭାବେ ତାଙ୍କୁ ନିର୍ବାଚିତ କରିବାକୁ ବିଜୟ ଅପିଲ୍ କରିଛନ୍ତି ।
ଅସିତଙ୍କ ଭଳି ବିଜୟ ପ୍ରତିଶ୍ରୁତିର ପାହାଡ ଦେଇନାହାନ୍ତି, ହେଲେ କ୍ଲବ ପ୍ରତି ଥିବା ତାଙ୍କ ଭଲପାଇବାକୁ ଦର୍ଶାଇବା ସହ ସଦସ୍ୟଙ୍କ ସହଯୋଗ ଲୋଡିଛନ୍ତି । ପ୍ରଶାସନିକ ଅଭିଜ୍ଞତାରେ ପ୍ରତିପକ୍ଷଙ୍କ ଠାରୁ ଆଗରେ ଥିବା ବିଜୟ, ଏହି ରେସରେ ବାଜି ମରୁଛନ୍ତି କି ନାହିଁ, ତା ଉପରେ ନଜର ରହିଛି ।
କେବଳ ସଭାପତି ପଦ ପାଇଁ ଲଢେଇ ରୋଚକ ସ୍ଥିତିରେ ରହିଛି ତାହା ନୁହେଁ, ବରଂ ଉପ ସଭାପତି, ସମ୍ପାଦକଙ୍କ ଠାରୁ ଆରମ୍ଭ କରି କମିଟି ସଦସ୍ୟ ଯାଏଁ ଚାଲିଛି ଜୋରଦାର କ୍ୟାମ୍ପେନିଂ । ସଂପାଦକ ରେସରେ ଅଛନ୍ତି, ଅର୍ଥ ସଚିବ ବିଶାଳ ଦେବ, ପାର୍ଥସାରଥୀ ପାଣିଗ୍ରାହୀ, ଦେବାଶଙ୍କର ତ୍ରିପାଠୀଙ୍କ ସମେତ ୬ ଜଣ । ସେହିଭଳି ଉପ-ସଭାପତି ପାଇଁ ୫ ଜଣ, ଯୁଗ୍ମ ସଂପାଦକ ପଦ ପାଇଁ ୩ ଜଣ, କମିଟି ସଦସ୍ୟ ପାଇଁ ୨୨ ଜଣ ରେସରେ ଅଛନ୍ତି ।
ନିଜ କାର୍ଯ୍ୟକାଳ ସମୟରେ ଦୁଇ ପୁର୍ବତନ ମୁଖ୍ୟ ଶାସନ ସଚିବ ଅନେକ ନିର୍ବାଚନ ପରିଚାଳନା ବି କରିଛନ୍ତି । ହେଲେ ଏବେ ଉଭୟେ ନିର୍ବାଚନ ରେସକୁ ଓହ୍ଲାଇଛନ୍ତି । ଶୁଣିବାକୁ ମିଳୁଛି, ନିଜ ଅନୁଗତଙ୍କୁ ନେଇ ତୁହାକୁ ତୁହା ବୈଠକ କରୁଛନ୍ତି, କାରଣ ସମ୍ମାନର ଏହି ଲଢେଇରେ କେହି ପଛରେ ରହିବାକୁ ଚାହୁଁନାହାନ୍ତି ।