ଯକୃତ ରୋଗରେ ଆକ୍ରାନ୍ତ ହୋଇ ଶଯ୍ୟାସାୟୀ ଘରର ରୋଜଗାରିଆ ପୁଅ। କେମିତି ଚଳିବ ପରିବାର, କେମିତି ହେବ ଚିକିତ୍ସା ଚିନ୍ତାରେ ପରିବାର
କନକ ବ୍ୟୁରୋ: ଅର୍ଥ ଅଭାବରୁ ହୋଇପାରୁନି ଚିକିତ୍ସା । ମୃତ୍ୟୁ ସହ ସଂଗ୍ରାମ କରୁଛନ୍ତି ଚିଲିକା ଅଞ୍ଚଳର କାହ୍ନୁ ବେହେରା । ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ୍ ଅନ୍ତର୍ଗତ ସାନ ନଇରି ଗ୍ରାମ ପାଲା ପଡିଆ ସାହିରେ ତାଙ୍କ ଘର । ଘରର ମେରୁଦଣ୍ଡ ତଥା ଜଣେ ମାତ୍ର ରୋଜଗାରିଆ ପୁଅ ଏବେ ଘରେ ଶଯ୍ୟାସାୟୀ ଅବସ୍ଥାରେ ପଡ଼ିରହିଛନ୍ତି । ଦିନ ଥିଲା କାହ୍ନୁ ଚିଲିକାରେ ଡଙ୍ଗା ଚଳାଇ ମାଛ ମାରି ନିଜ ପରିବାର ପ୍ରତିପୋଷଣ କରୁଥଲେ । ବେଶ ହସ ଖୁସିରେ ଚଳୁଥିଲା ତାଙ୍କ ପରିବାର । ସ୍ତ୍ରୀ, ଛୁଆ, ବାପା ଓ ମା’ଙ୍କୁ ନେଇ ଖୁସିର ଚଳୁଥିଲେ । ହସଖୁସିର ସଂସାର ଉପରେ ଘୋଟିଗଲା କଳା ବାଦଲ । ୫ବର୍ଷ ତଳେ ହଠାତ ଲିଭର ଜନିତ ରୋଗରେ ଆକ୍ରାନ୍ତ ହୋଇ କଟକ, ଭୁବନେଶ୍ୱର ଓ ବ୍ରହ୍ମପୁର ଅଂଚଳର ବିଭିନ୍ନ ଚିକିତ୍ସାଳୟ ଯାଇ ଚିକିତ୍ସା କରାଇସାରିଲେଣି । ଚିକିତ୍ସା ପାଇଁ ନିଜ ଘର ଓ ଡଙ୍ଗା ବନ୍ଧା ପଡ଼ିଥିବା ବେଳେ ଘରେ ଥିବା ସମସ୍ତ ଅଳଙ୍କାର ବିକ୍ରି କରିସାରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ସରକାରଙ୍କ ପକ୍ଷରୁ ଯୋଗାଇ ଦିଆଯାଇଥିବା ବିଜୁ ସ୍ୱାସ୍ଥ୍ୟ ବୀମାକୁ ବ୍ୟବହାର କରିସାରିଛନ୍ତି । କଟକ ବଡ ମେଡିକାଲରେ ଅପରେସନ୍ ହୋଇସାରିଥିବା ବେଳେ ସେଥିରୁ କୌଣସି ସୁଫଳ ମିଳିନାହିଁ । ଡାକ୍ତରଙ୍କ ପରାମର୍ଶ କ୍ରମେ କାହ୍ନୁ ଦୀର୍ଘ ୬ ମାସ ହେଲା ନିଜ ଘରେ ରହି ଚିକିତ୍ସା ହେଉଛନ୍ତି । ଦୈନିକ ଦୁଇରୁ ତିନି ହଜାର ଟଙ୍କା ଖର୍ଚ୍ଚ କରି ଅକ୍ସିଜେନ ଓ ମେଡ଼ିସିନ୍ ନେଉଛନ୍ତି । ଏବେ ଚିକିତ୍ସା ହେବା ଏକ ପ୍ରକାର କଷ୍ଟକର ହୋଇପଡ଼ିଲାଣି । ନିଜର ବୃଦ୍ଧ, ବାପା, ମା, ସ୍ତ୍ରୀ ଓ ଶିଶୁ କନ୍ୟା ଅଧିକାଂଶ ସମୟ ଭୋକରେ ରହି କାହ୍ନୁଙ୍କର ଚିକିତ୍ସା କରୁଥିବା ବେଳେ ରାଜ୍ୟ ସରକାର ଜିଲ୍ଲା ପ୍ରଶାସନ ଓ କୌଣସି ବଦାନ୍ୟ ବ୍ୟକ୍ତି ସହାୟତାର ହାତ ବଢାଇଲେ କାହ୍ନୁ ବଞ୍ଚିଯିବା ସହିତ ନିଜ ପରିବାରକୁ ବଞ୍ଚାଇବ ବୋଲି ପରିବାର ପକ୍ଷରୁ ଆକୁଳ ନିବେଦନ କରିଛନ୍ତି । ତାଙ୍କୁ ସାହାଯ୍ୟ କରିବାକୁ ଚାହୁଥିଲେ କାହ୍ନୁ ବେହେରା । ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ । ତାଙ୍କ ଆକାଉଂଟ ନମ୍ବର ହେଲା ୪୦୦୮୬୧୪୫୦୮୫ । ଆଇଏଫଏସସି କୋଡ- ଏସବିଆଇଏନ୦୦୦୩୩୧୭ । ଏହି ନମ୍ବରରେ ସହାୟତା କରିପାରିବେ ।