ଅଜଣା ରୋଗରେ ପୀଡିତ ଯୁବକ: ବିଛଣାରେ ପଡି ରହିଛନ୍ତି ୩୫ ବର୍ଷୀୟ ଯୁବକ, ଅର୍ଥ ଅବାବରୁ ହୋଇ ପାରୁନି ଚିକିତ୍ସା

କନକ ବ୍ୟୁରୋ: ଇଚ୍ଛାଥିଲା ପାଠପଢି ବଡ ଚାକିରି କରିବେ ଏବଂ ଘରର ଅଭାବ ଦୁର କରିବେ, ସେଥିପାଇଁ ଦିନ ରାତି ଏକ କରି ପଠା ପଢୁଥିଲେ। ମାତ୍ର +୨ ପାସ କରିବା ପରେ ଅଜଣା ରୋଗରେ ପୀଡିତ ହୋଇ ଶର୍ଯ୍ୟାସାୟୀ ବାଲେଶ୍ୱର ବସ୍ତା ବ୍ଲକ ପାଲସାହି ଗ୍ରାମର ଅନନ୍ତ ପାତ୍ର । ପୁଅର ଏଭଳି ଅବସ୍ଥା ଦେଖି ବାପା ମାଆଙ୍କ ଆଖିରୁ ଶୁଖୁନି ଲୁହ ।

ବିଛଣାରେ ସମାଧି ନେଇଛି ସ୍ୱପ୍ନ। ଯନ୍ତ୍ରଣାରେ ଛଟପଟ ହେଉଛି ଭେଣ୍ଡିଆ ପୁଅ। କାନ୍ଦିକାନ୍ଦ ବାପାମା’ଙ୍କ ଆଖିରୁ ଶୁଖିଲାଣି ଲୁହ। ବାଲେଶ୍ୱର ବସ୍ତା ବ୍ଲକ ପାଳସାହିର ଦୈତାରୀ ପାତ୍ରଙ୍କ ପୁଅ ଅନନ୍ତ ପାତ୍ର। ଜଣେ ମେଧାବୀ ଛାତ୍ର। ପାରିବାରିକ ଆର୍ଥିକ ଅନଟନ ଭିତରେ +୨ ପାସ କରି ଉଚ୍ଚଶିକ୍ଷା ପାଇଁ ସ୍ୱପ୍ନ ଦେଖିବା ବେଳେ ଅନନ୍ତଙ୍କ ଜୀବନକୁ ମାଡ଼ି ଆସିଲା ଅଜଣା ରୋଗ।ହଠାତ୍ ଅଚଳ ହୋଇଗଲା ହାତଗୋଡ଼। ଜମି ବାଡ଼ି ବିକି, ପୁଅର ଚିକିତ୍ସାରେ ୫ ଲକ୍ଷ ଟଙ୍କା ଖର୍ଚ୍ଚ କରି ସାରିଛନ୍ତି ବାପା। ଏବେ ଆଉ ପାଖରେ କାଣି କଉଡିଟିଏ ନାହିଁ । ତେଣୁ ଭାଗ୍ୟକୁ ଆଦରି ପୁଅକୁ ଘରେ ରଖିଛନ୍ତି ।

ଡାକ୍ତର ଜାଣିପାରୁନାହାନ୍ତି ଅନନ୍ତଙ୍କୁ କେଉଁ ରୋଗ ହୋଇଛି, ସେପଟେ ମୁଲ ଲାଗି ପରିବାର ପୋଷୁଥିବା ବାପା ନିରୁପାୟ। ଚିକିତ୍ସା ପାଇଁ ପୁଅକୁ ବାହାରକୁ ନେବାକୁ ଅସମର୍ଥ। ପୁଅ ପାଇଁ ଔଷଧ କିଣି ପାରୁ ନାହାନ୍ତି । ଜୀବନ ମରଣ ସହ ସଂଗ୍ରାମ କରୁଛନ୍ତି ଅନନ୍ତ। ଗୋଡ ହାତ ପତଳା ହେବା ସହ ମୁହଁ ଫୁଲୁଛି। କାନ୍ଦି କାନ୍ଦି ପୁଅର ଜୀବନ ବଞ୍ଚାଇବା ପାଇଁ ନେହୁରା ହେଉଛନ୍ତି ବୁଢା ବାପା ମାଆ ।

ଅଜଣା ରୋଗରେ ପୀଡିତ ଅନନ୍ତଙ୍କୁ ସରକାରୀ ସହାୟତା କିଛି ମିଳିନାହିଁ। ୩୫ କେଜି ଚାଉଳ ଏବଂ ବ୍ୟଟେରୀ ଚାଳିତ ତିନି ଚକିଆ ସାଇକେଲ ପାଇଁ ବାରମ୍ବାର ପ୍ରଶାସନ ଜଣାଇଥିଲେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି । ଯଦି ସରକାର ଅନନ୍ତଙ୍କ ଚିକିତ୍ସା ଖର୍ଚ୍ଚ ଯୋଗଇ ଦିଅନ୍ତେ ତେବେ ଜଣେ ଯୁବକଙ୍କ ଜୀବନ ବଞ୍ଚି ପାରନ୍ତା ।
ଅନନ୍ତ ପାତ୍ର
ଘର- ବସ୍ତା ବ୍ଲକ ପାଲସାହି
ଫୋନ ପେ ନଂ-୬୩୭୦୦୨୧୪୮୭
ଫୋନ ନଂ-୭୩୭୭୭୭୫୯୫୫