ସରକାରୀ ଯୋଜନାର ପ୍ରଚାର ଓ ପ୍ରସାର ଓ ବିଜ୍ଞାପନ ବାବଦକୁ ୫ ବର୍ଷକୁ ଖର୍ଚ୍ଚ ହୋଇଛି ୮୩ କୋଟି । ବିଧାନସଭାରେ ଉତ୍ତର ରଖିଲେ ବିଭାଗୀୟ ମନ୍ତ୍ରୀ ।

କନକ ବ୍ୟୁରୋ : ପ୍ରଚାର ପ୍ରସାରରେ କେତେ ଖର୍ଚ୍ଚ କରିଛନ୍ତି ସରକାର। ଏନେଇ ବିଧାନସଭାରେ ଲିଖିତ ଉତ୍ତର ରଖିଛନ୍ତି ସୂଚନା ଓ ଲୋକସମ୍ପର୍କ ମନ୍ତ୍ରୀ ପ୍ରଦୀପ ଅମାତ । ବିଜେପି ବିଧାୟକ ମୁକେଶ ମହାଲିଙ୍ଗଙ୍କ ପ୍ରଶ୍ନର ଉତ୍ତର ଦେଇ ପ୍ରଦୀପ କହିଛନ୍ତି, ୨୦୨୩-୨୪ ଆର୍ଥିକ ବର୍ଷରେ ସରକାରୀ ଓ ବେସରକାରୀ ଯୋଜନାର ପ୍ରଚାର ପ୍ରସାର ଓ ବିଜ୍ଞାପନ ଖର୍ଚ୍ଚ ବାବଦକୁ ୭୪ କୋଟି ୮୦ ଲକ୍ଷ ଟଙ୍କା ବ୍ୟୟବରାଦ କରାଯାଇଥିଲା । ତେବେ ଚଳିତ ଆର୍ଥିକ ବର୍ଷରେ ଜାନୁଆରୀ ଶେଷ ସୁଦ୍ଧା ପ୍ରାୟ ୨୦ କୋଟି ଟଙ୍କା ଖର୍ଚ୍ଚ କରିଛନ୍ତି ସରକାର । ନିର୍ବାଚନୀ ବର୍ଷ ହୋଇଥିବାରୁ ପୂର୍ବ ବର୍ଷ ଗୁଡିକ ଅପେକ୍ଷା ଚଳିତ ବର୍ଷର ଖର୍ଚ୍ଚ ବଢିଛି ।

ଚଳିତବର୍ଷରେ ଜାନୁଆରୀ ଶେଷ ସୁଦ୍ଧା ୧୯ କୋଟି ୭୨ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି ସରକାର । ସରକାରୀ ଯୋଜନାର ପ୍ରଚାର ପ୍ରସାର ବାବଦକୁ ମୁଦ୍ରିତ ଗଣମାଧ୍ୟମକୁ ୧୭ କୋଟି ୪୩ ଲକ୍ଷ ଓ ବୈଦ୍ୟୁତିକ ଗଣମାଧ୍ୟମକୁ ମାତ୍ର ୩୧ ଲକ୍ଷ ଏବଂ ହୋର୍ଡିଙ୍ଗ ଓ ଆଉଟଡୋର ବ୍ରାଣ୍ଡିରେ ୧ କୋଟି ୯୩ ଲକ୍ଷ ଟଙ୍କା ଖର୍ଚ୍ଚ କରିଛି ସୂଚନା ଓ ଲୋକସମ୍ପର୍କ ବିଭାଗ ।

ସେହିଭଳି ଗତ ୫ ବର୍ଷରେ ପ୍ରଚାର ପ୍ରସାର ବାବଦକୁ କେବଳ ସୂଚନା ଓ ଲୋକସଂପର୍କ ବିଭାଗ ଖର୍ଚ୍ଚ କରିଛି ପ୍ରାୟ ୮୩ କୋଟି ଟଙ୍କା। ୨୦୧୯-୨୦ରେ ୩୦ କୋଟି, ୨୦୨୦-୨୧ରେ ୧୨ କୋଟିରୁ ଅଧିକ, ୨୦୨୧-୨୨ରେ ପ୍ରାୟ ୧୦ କୋଟି, ୨୦୨୨-୨୩ରେ ପ୍ରାୟ ୧୧ କୋଟି ଟଙ୍କା ଖର୍ଚ୍ଚ ହୋଇଛି ।