ବାତ୍ୟା ପୀଡିତଙ୍କ ପାଇଁ ସହାୟତାର କୁନି ହାତ ବଢାଇଲା କୁନି ଝିଅ ସମୀକ୍ଷା । ନିଜ ସ୍କଲାରସିପ୍ ଅର୍ଥକୁ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ କଲା ଦାନ ।
କନକ ବ୍ୟୁରୋ : କୁହାଯାଏ, ସାନ ସିନା ଦାନ ତା ମହାନ । ବାତ୍ୟା ‘ଫୋନି’ର ତାଣ୍ଡବରେ ଉପକୂଳ ଓଡିଶା ଛାରଖାର ହୋଇଯାଇଥିବା ବେଳେ ଅନେକ ଧନଜୀବନ ପ୍ରଭାବିତ ହୋଇଛି । ଫୋନି ଚାଲିଯାଇଚି ସତ, କିନ୍ତୁ ଯେଉଁ ଚିହ୍ନ ଛାଡିଯାଇଛି, ତାହା କେବେ ଯେ ଲିଭିବ, ଆକଳନ କରିବା ମଧ୍ୟ ମୁସ୍କିଲ । ତେବେ ଏହାରି ଭିତରେ ଓଡିଶାକୁ ପୁଣି ଥରେ ଗଢିତୋଳିବା ପାଇଁ ଅଣ୍ଟା ଭିଡିଛନ୍ତି ରାଜ୍ୟ ସରକାର । ଆଉ ବାତ୍ୟା ପୀଡିତଙ୍କ ପାଇଁ ଏବେ ସହାୟତାର ହାତ ବଢାଇଛି ସପ୍ତମ ଶ୍ରେଣୀରେ ପଢୁଥିବା ଏକ କୁନି ଝିଅ ।
Kanak News is now on WhatsApp
Join and get latest news updates delivered to you via WhatsApp
ବାତ୍ୟା ଫୋନି ପ୍ରଭାବରେ ଅଧା ଓଡିଶା ଧ୍ୱସ୍ତବିଧ୍ୱସ୍ତ ହୋଇଥିବା ବେଳେ, ଏହାକୁ ପୁଣି ଥରେ ସଜାଡିବାକୁ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ପ୍ରତିଦିନ ବିଭିନ୍ନ ମହଲରୁ ଅର୍ଥରାଶି ଦାନ କରାଯାଉଛି । ଏହି କ୍ରମରେ ଆଜି ବ୍ରହ୍ମପୁର ବାସୁଦେବ ନଗର ସ୍ଥିତ ସରସ୍ୱତୀ ଶିଶୁ ବିଦ୍ୟାମନ୍ଦିର ସପ୍ତମ ଶ୍ରେଣୀ ଛାତ୍ରୀ ସମୀକ୍ଷା ମହାନ୍ତି, ନିଜର ସ୍କଲାରସିପ୍ ବାବଦ ଅର୍ଥରାଶିକୁ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ଦାନ କରିଛନ୍ତି । ଷଷ୍ଠ ଶ୍ରେଣୀରେ ସର୍ବୋଚ୍ଚ ନମ୍ବର ରଖି ୨୦୧୮-୧୯ ଶିକ୍ଷାବର୍ଷ ପାଇଁ ସ୍କଲାରସିପ ବାବଦରେ ପାଇଥିବା ୨୪ ଶହ ଟଙ୍କାର ଚେକ୍ ବାତ୍ୟା ପୀଡିତଙ୍କ ଉଦ୍ଦେଶ୍ୟରେ ଦାନ କରିଛନ୍ତି ଏହି କୁନି ଝିଅ ।
ରଙ୍ଗେଇଲୁଣ୍ଡା ବ୍ଲକ ଶିକ୍ଷାଧିକାରୀଙ୍କୁ ଭେଟି ସମୀକ୍ଷା ଏହି ଚେକ୍ ପ୍ରଦାନ କରିଛନ୍ତି । ଏହି ଅବସରରେ ସ୍କୁଲର ଶିକ୍ଷକମାନଙ୍କ ସମେତ ସମୀକ୍ଷାଙ୍କ ବାପା ରବି ନାରାୟଣ ମହାନ୍ତି ମଧ୍ୟ ଉପସ୍ଥିତ ଥିଲେ । ଝିଅର ଏଭଳି ଚିନ୍ତାଧାରରେ ଅତ୍ୟନ୍ତ ଗର୍ବ ଅନୁଭବ କରୁଥିବା କହିଛନ୍ତି ସମୀକ୍ଷାଙ୍କ ବାପା । ସୂଚନାଯୋଗ୍ୟ, କୁନି ଝିଅ ସମୀକ୍ଷା, ପ୍ରଥମ ଶ୍ରେଣୀ ଠାରୁ ନେଇ ସପ୍ତମ ଶ୍ରେଣୀ ପର୍ଯ୍ୟନ୍ତ ପ୍ରଥମ ସ୍ଥାନ ଅଧିକାର କରି ଗୌରବ ଅର୍ଜନ କରିଛନ୍ତି । ସମୀକ୍ଷାଙ୍କ ବାପା ବ୍ରହ୍ମପୁର ଡିଭିଜନରେ ମେଲଗାର୍ଡ ଥିବାବେଳେ ମା’ ଜଣେ ସୁଲେଖିକା ଭାବେ ପରିଚିତ ।