ଦିଲ୍ଲୀକୁ କେନ୍ଦ୍ର ସରକାରଙ୍କ ଅକ୍ସିଜେନ ଯୋଗାଣରେ ଅବହେଳା । ଦିଲ୍ଲୀ ହାଇକୋର୍ଟ ପରେ କେନ୍ଦ୍ର ସରକାରଙ୍କୁ ସୁପ୍ରିମକୋର୍ଟର କଡା ନିର୍ଦ୍ଦେଶ । କୌଣସି ପରିସ୍ଥିତିରେ ବି ଦିଲ୍ଲୀକୁ ଦୈନିକ ଯୋଗାଇବାକୁ ହେବ ୭ ଶହ ମେଟ୍ରିକ୍ ଟନ୍ ଅକ୍ସିଜେନ ।
କନକ ବ୍ୟୁରୋ : ପରବର୍ତ୍ତୀ ଆଦେଶ ପର୍ଯ୍ୟନ୍ତ କେନ୍ଦ୍ର ସରକାରଙ୍କୁ କୋଭିଡ୍-୧୯ ରୋଗୀଙ୍କ ଚିକିତ୍ସା ନିମନ୍ତେ ଦିଲ୍ଲୀ ପାଇଁ ଦୈନିକ ୭୦୦ ମେଟ୍ରିକ୍ ଟନ୍ ତରଳ ମେଡିକାଲ୍ ଅକ୍ସିଜେନ୍ ଯୋଗାଇ ଦେବାକୁ ପଡ଼ିବ ବୋଲି ଆଜି ସୁପ୍ରିମ୍ କୋର୍ଟ କହିଛନ୍ତି।
Kanak News is now on WhatsApp
Join and get latest news updates delivered to you via WhatsApp
ଆଜି ବିଚାରପତି ଡିୱାଇ ଚନ୍ଦ୍ରଚୂଡ଼ଙ୍କ ନେତୃତ୍ବାଧୀନ ଖଣ୍ଡପୀଠ ଜାତୀୟ ରାଜଧାନୀ ଅଞ୍ଚଳରେ ‘ତରଳ ମେଡିକାଲ୍ ଅକ୍ସିଜେନ୍’ ନିଅଣ୍ଟ ସଂକ୍ରାନ୍ତରେ ଦିଲ୍ଲୀ ସରକାର ଦାଖଲ କରିଥିବା ଆବେଦନର ଶୁଣାଣି କରିଥିଲେ। ଚେତାବନୀ ଦେଇ ଖଣ୍ଡପୀଠ କହିଛନ୍ତି ଯେ, ଦୈନିକ ୭୦୦ ମେଟ୍ରିକ୍ ଟନ୍ ‘ତରଳ ମେଡିକାଲ୍ ଅକ୍ସିଜେନ୍’ ଯୋଗାଣ ନ ହେଲେ ସମ୍ପୃକ୍ତ ସରକାରୀ ଅଧିକାରୀମାନଙ୍କ ବିରୋଧରେ ଆଦେଶ ଜାରି ହେବ।
ଦିଲ୍ଲୀ ସରକାରଙ୍କ ତରଫରୁ ପ୍ରତିନିଧିତ୍ବ କରି ବରିଷ୍ଠ ଆଡ୍ଭୋକେଟ୍ ରାହୁଳ ମେହେରା ପୂର୍ବରୁ ଦିଲ୍ଲୀ ସରକାର ଗ୍ରହଣ କରୁଥିବା ଅକ୍ସିଜେନ୍ ପ୍ରସଙ୍ଗରେ ସୁପ୍ରିମ୍ କୋର୍ଟଙ୍କୁ ଅବଗତ କରାଇଥିଲେ। ଶୁକ୍ରବାର ସକାଳ ୯ଟା ସୁଦ୍ଧା ୮୬ ମେଟ୍ରିକ୍ ଟନ୍ ଅକ୍ସିଜେନ୍ ପାଇଥିବା ଏବଂ ଆଉ ୧୬ ମେଟ୍ରିକ୍ ଟନ୍ ଅମ୍ଳଜାନ ଆସୁଥିବା କଥା ମଧ୍ୟ ସେ ଲିଖିତ ଭାବେ ଖଣ୍ଡପୀଠଙ୍କୁ ଜଣାଇଥିଲେ।
ବିଚାରପତି ଚନ୍ଦ୍ରଚୂଡ଼ କହିଲେ, ଆମେ ଚାହୁଁ ଦିଲ୍ଲୀକୁ ୭୦୦ ମେଟ୍ରିକ୍ ଟନ୍ ଯୋଗାଇ ଦିଆଯାଉ। ଆମେ ଗୁରୁତ୍ବର ସହ ଏକଥା କହୁଛୁ କି, ଅକ୍ସିଜେନ୍ ଯୋଗାଇ ଦିଆଯାଉ। ଆମେ ବଳ ପ୍ରୟୋଗ କରିବାକୁ ଚାହୁଁନା। ଖଣ୍ଡପୀଠ ଆହୁରି ମଧ୍ୟ ଗୁରୁତ୍ବାରୋପ କରି କହିଛନ୍ତି, ଦିଲ୍ଲୀକୁ ଅକ୍ସିଜେନ୍ ଯୋଗାଣ ସଂକ୍ରାନ୍ତ ଆଦେଶ ଆଜି ଅପରାହ୍ଣ ସୁଦ୍ଧା ଅପ୍-ଲୋଡ୍ ହେବା ଉଚିତ।
ସେହିଭଳି କର୍ଣ୍ଣାଟକ ସରକାରଙ୍କ ଅକ୍ସିଜେନ ଯୋଗାଣ ଉପରେ ସୁପ୍ରିମକୋର୍ଟରେ ଦାଖଲ ହୋଇଥିବା ମାମଲା ଶୁଣାଣି ବି ହୋଇଛି । ଏହି ମାମଲାର ଶୁଣାଣି କରି କୋର୍ଟ କହିଛନ୍ତି କି କେନ୍ଦ୍ର ସରକାର ଏଭଳି କାର୍ଯ୍ୟ ନକରନ୍ତୁ ଯାହା ଫଳରେ ସରକାରଙ୍କ ବିରୋଧରେ କଡା କାର୍ଯ୍ୟାନୁଷ୍ଟାନ ଗ୍ରହଣ କରିବାକୁ କୋର୍ଟ ବାଧ୍ୟ ହେବ । କହିରଖୁ କି କର୍ଣ୍ଣାଟକ ହାଇକୋର୍ଟ କେନ୍ଦ୍ରସରକାରଙ୍କୁ କର୍ଣ୍ଣାଟକ ପାଇଁ ଦୈନିକ ୧୨ ଶହ ମେଟ୍ରିକ୍ ଟନ ଅକ୍ସିଜେନ ଯୋଗାଇ ଦେବାକୁ ନିର୍ଦ୍ଦେଶ ଦେଇଥିଲେ । ମାତ୍ର ଏହାର ଉତରରେ କେନ୍ଦ୍ର ସରକାର କହିଥିଲେ କି ଏତେଶୀଘ୍ର ଏତେମାତ୍ରାର ଅକ୍ସିଜେନ ଯୋଗାଇ ଦେବା ସମ୍ଭବ ନୁହେଁ । ଏନେଇ ମାମଲା ସୁପ୍ରିମ କୋର୍ଟରେ ପହଂଚବା ପରେ କୋର୍ଟ କହିଛନ୍ତି କି କର୍ଣ୍ଣାଟକରେ ବର୍ତମାନ ଆକ୍ଟିଭ କେସ ୩.୯୫ ଲକ୍ଷ । ଏହି ଅନୁସାରେ ରାଜ୍ୟକୁ କେନ୍ଦ୍ର ୧୭ ଶହ ମେଟ୍ରିିକ୍ ଟନ୍ ଅକ୍ସିଜେନ ଯୋଗାଇ ଦେବା କଥା । ହେଲେ ସର୍ବନିମ୍ନ ୧୧ ଶହ ମେଟ୍ରିକ୍ ଟନ୍ ଅକ୍ସିଜେନ କେନ୍ଦ୍ର ସରକାର ଯୋଗାଇ ଦିଅନ୍ତୁ ।