ବଂଶୀ ବଜାଉଛି ମୁଁ ରିକ୍ସାବାଲା… ଅଭାବ ମଣିଷକୁ କିଛି ବି ସଜେଇଦିଏ । କଳାକୁ ମିଳିଲାନି ସମ୍ମାନ, ପେଟ ପୋଷିବାକୁ କାଳିଆ ଦୂଆରେ ରିକ୍ସାବାଲା ସାଜିଲେ ବଂଶୀବାଦକ ।
ଏ ବୃଦ୍ଧ, ପେଟ ପାଇଁ ପେଡାଲ ମାରୁଛନ୍ତି, ମନ ପାଇଁ ବଜାଉଛନ୍ତି ବଂଶୀ । ବେଉସା ସରିଲେ ବଡଦାଣ୍ଡରେ ବଂଶୀଟିଏ ଧରି ବେସୁରା ଜୀବନକୁ ସୁରିଲା କରନ୍ତି ଆଉ ସବୁ ଅବସୋସକୁ ଚକାଆଖି ଆଗରେ ଅର୍ପଣ କରନ୍ତି...
କନକ ବ୍ୟୁରୋ; ବଡଦାଣ୍ଡରୁ ଭାସି ଆସୁଛି ବଂଶୀର ସ୍ୱର । ସାଆନ୍ତ କ୍ଷେତ୍ରରେ ଶୁଭୁଛି ବୟସ୍କ ବଂଶୀର ସୁରିଲା ସୁରିଲା ସୁର । ଏ ସ୍ୱର ଶାନ୍ତି ଦେଇପାରେ, ମନକୁ ମୁଗ୍ଧ କରିପାରେ, ଆତ୍ମକୁ ଆନନ୍ଦ ବି ଦେଇପାରେ । ହେଲେ ଏ ବୃଦ୍ଧ, ପେଟ ପାଇଁ ପେଡାଲ ମାରୁଛନ୍ତି, ମନ ପାଇଁ ବଜାଉଛନ୍ତି ବଂଶୀ । ବେଉସା ସରିଲେ ବଡଦାଣ୍ଡରେ ବଂଶୀଟିଏ ଧରି ବେସୁରା ଜୀବନକୁ ସୁରିଲା କରନ୍ତି ଆଉ ସବୁ ଅବସୋସକୁ ଚକାଆଖି ଆଗରେ ଅର୍ପଣ କରନ୍ତି…
Kanak News is now on WhatsApp
Join and get latest news updates delivered to you via WhatsApp
ପୁରୀର ପୂର୍ଣ୍ଣଚନ୍ଦ୍ର ଗୋଚ୍ଛାୟତ । କେବେ ସେ ରିକ୍ସାବାଲା ତ କେବେ ବଂଶୀବାଲା । ପେଟ ଛାଖଣ୍ଡକ ପାଇଁ ସେ ରିକ୍ସା ଟାଣନ୍ତି । କାରଣ ଚକ ନଗଡିଲେ ପେଟ ପୂରିବନି, ଆଉ ବଂଶୀ ନବାଜିରେ ମନ ବୁଝିବନି । ସେଇଥିପାଇଁ ତ କାମରୁ ଟିକେ ଫୁରସତ ପାଇଲେ କାଳିଆ ଦାଣ୍ଡରେ ରିକ୍ସା ଉପରେ ବସି ବଇଁଶୀରୁ ମଧୂର ମୁର୍ଚ୍ଛନା କାଢନ୍ତି ପୂର୍ଣ୍ଣ ।
୬୫ ବର୍ଷର ଏ ବୃଦ୍ଧଙ୍କର ପେଶା ରିକ୍ସା ଟାଣିବା, କିନ୍ତୁ ନିଶା ବଂଶୀ ବାଦନ । ଅଭାବୀର ଅନ୍ଧାରୀ ଗଳିରେ ସିନା ପୂର୍ଣ୍ଣଙ୍କ ବଂଶୀର ସ୍ୱର ବନ୍ଦୀ ହୋଇଗଲା ହେଲେ ଦିନ ଥିଲା ଏଇ ସ୍ୱର ଶୁଣିବାକୁ ଲୋକ ଚାହିଁ ରହୁଥିଲେ । ବିଭିନ୍ନ ମଞ୍ଚରେ ସେ ନିଜର କଳା ପ୍ରଦର୍ଶନ କରିଛନ୍ତି । ଅନେକ ଟେଲିଭିଜନ ସୋ’ ରେ ମଧ୍ୟ ସେ ବଂଶୀ ବାଦନ କରିଛନ୍ତି । ଏମିତିକି ସେ ନେପାଳ, କାଠମାଣ୍ଡୋ, ଦିଲ୍ଲୀ, କୋଲକାତା ଆଦି ସ୍ଥାନରେ କଳା ପ୍ରତି ଥିବା ନିପୁଣ ନିଶାର ନିଦର୍ଶନ ସାଜିଛନ୍ତି । ହେଲେ ଏବେ… ଏବେ ସେ ସମ୍ପୂର୍ଣ୍ଣ ଅଲୋଡା । କଳା ପାଇଁ କୂଳ ପାଇଁ । ତେଣୁ ତ କାଳିଆ କାନରେ ବଂଶୀର ସ୍ୱର ପହଞ୍ଚାଉଛନ୍ତି ଏ ବୃଦ୍ଧ ।
ପୁରୀ ମାର୍କଣ୍ଡସ୍ୱର ସାହିରେ ରହୁଥିବା ପୂର୍ଣ୍ଣଚନ୍ଦ୍ରଙ୍କର ସାନ ଭାଇକୁ ଛାଡିଦେଲେ ନିଜର ବୋଲି କେହି ନାହିଁ । ୩ ମାସ ତଳେ ରିକ୍ସାଟାଣି ନେବା ବେଳେ ଅଟୋ ସହ ଧକ୍କା ହେବା ପରେ ତାଙ୍କ ଗୋଡରେ ଆଘାତ ଲାଗିଥିଲା । ଆଉ ଏହି ସହୃଦୟ ବ୍ୟକ୍ତିମାନେ ତାଙ୍କ ଦୁଃଖ ଦେଖି ତାଙ୍କୁ ସାହାଯ୍ୟ କରିଛନ୍ତି ଆଉ ମେଡିକାଲ ଆଣିଛନ୍ତି । ତେବେ କଷ୍ଟରେ ଥାଇ ବି ସେ ବଂଶୀକୁ ଛାଡି ପାରି ନାହାନ୍ତି । କାରଣ ତାଙ୍କ ଭିତରେ ଗୋଟେ କଳାକାର ଆତ୍ମ ରହିଛି । ସୁଯୋଗଟିଏ ମିଳିଲାନି ବୋଲି ସିନା ନିଶାକୁ ପେଶା କରିପାରିଲେନି ହେଲେ ଏବେ ନିସଙ୍ଗ ଜୀବନ ବିତେଇବାକୁ ବଡଦାଣ୍ଡରେ ଏ ବଂଶୀ ହିଁ ସାଜିଛି ସାଥୀ…