ସମ୍ବଳ ନଥିବାରୁ ବାସ ଖଣ୍ଡେ ପାଇବା ପାଇଁ ସଂଘର୍ଷ କରୁଛନ୍ତି ୬୦ ବର୍ଷିୟା ସୁକାନ୍ତି : ୫ ବର୍ଷ ହେଲାଣି ଭଙ୍ଗାଘରେ କଟୁଛି ଜୀବନ…

କନକ ବ୍ୟୁରୋ: ବୟସର  ଅପରାହ୍ନରେ ଘରଟିଏ ପାଇଁ ସଂଘର୍ଷ କରୁଛନ୍ତି ଜଣେ ୬୦ ବର୍ଷିୟ ବୃଦ୍ଧା । ଆଗକୁ ପଛକୁ ଆହା କରିବାକୁ କେହି ନାହାଁନ୍ତି । ମୁଣ୍ଡ ଗୁଂଜିବାକୁ ଘରଟିଏ ବି ନାହିଁ । ପ୍ରାୟ ୪-୫ ବର୍ଷ ହେଲା ଝଡ ବତାସରେ ଘର ଭଙ୍ଗି ଯାଇଛି । ହେଲେ ଘର କରିବାକୁ ଆଉ ସମ୍ବଳ ନଥିବାରୁ ଭଙ୍ଗାଘରେ ରହୁଛନ୍ତି ବୃଦ୍ଧା । ଦେଖନ୍ତୁ ଏହି ରିପୋର୍ଟ ।

କନ୍ଧମାଳ ଖଜୁରିପଡା ବ୍ଲକ ପାଣ୍ଡାବାଡି ଗାଁରେ ରୁହନ୍ତି ସୁକାନ୍ତି ସାହାଣୀ । ବୟସ ୬୦ ପାର ହେଲାଣି । ସ୍ୱାମୀ ଆରପରିରେ,  ଝିଅ ତିନୋଟି ବାହାହୋଇ ଶାଶୁୁ ଘରେ । ସମସ୍ତେ ସମସ୍ତଙ୍କ ବାଟରେ ଚାଲିଯିବା ପରେ  ଏବେ ଏକାକି ସୁକାନ୍ତି । ସରକାରୀ ଯୋଜନାରେ ମିଳୁଥିବା ଚାଉଳ ଓ ୫ଶହ ଟଙ୍କାର ବିଧବା ଭତ୍ତାରେ ପେଟ ପୁରୁଛି, ହେଲେ ଭଙ୍ଗା ଘରେ ଦିନ ବିତୁଛି । ଘରର କାନ୍ଥ ଫାଟି  ଆଁ କରିଛି  । ଚାଳ କଣା ହୋଇ ସୂର୍ଯ୍ୟ ଚନ୍ଦ୍ର ଦେଖାଯାଉଛନ୍ତି । ଏମିତି ଅବସ୍ଥାରେ ରହୁଛନ୍ତି ସୁକାନ୍ତି  ।

ବର୍ଷା ଦିନ ଆ-ତା ପିଣ୍ଡାରେ କଟୁଥିବା ବେଳେ ବିଡିଓ କହିଛନ୍ତି ସ୍କୁଲ ଘରେ ରାତି କାଟିବା ପାଇଁ । କିନ୍ତୁ ଚାଲି ନପାରିବାରୁ ସ୍କୁଲ ଘରକୁ ନଯାଇ ସେହି ଭଙ୍ଗା ଘରେ ହିଁ ରହୁଛନ୍ତି ବୃଦ୍ଧା । ଏତେ ପରେ ବି ଆଶା ରଖିଛି ସରକାର ତାଙ୍କ ଦୁଃଖ ଶୁଣିିବେ ଆଉ ଘରଟି ତିଆରି କରିଦେବେ  । ଗ୍ରାମବାସୀଙ୍କ ସାହାର୍ଯ୍ୟ,  ସହଯୋଗ ରେ ଚଳି ଆସୁଛନ୍ତି ସୁକାନ୍ତୀ । ତେବେ ଦେଖିବା ଆଗକୁ ସୁକାନ୍ତୀଙ୍କ ପାଇଁ ସରକାର କେବେ ଘରଟିଏ ତିଆରି କରୁଛନ୍ତି ।