କନକ ବ୍ୟୁରୋ: ମହାନଦୀ ଉପର ମୁଣ୍ଡରେ ବର୍ଷା ପରେ ଖୋଲିଛି ହୀରାକୁଦ ଗେଟ୍ । ଅପରାହ୍ନ ୫ଟାରୁ ପର୍ଯ୍ୟାୟକ୍ରମେ ହୀରାକୁଦ ଗେଟ୍ ଖୋଲାଯାଇଛି । ଆଉ ଅନ୍ୟପଟେ ଆଜି ଅପରାହ୍ମ ସୁଦ୍ଧା ଗଭୀର ଅବପାତଟି ଦୁର୍ବଳ ହୋଇ ଅବପାତରେ ପରିଣତ ହୋଇଛି । ଏହା ଉତ୍ତର ଛତିଶଗଡ ଏବଂ ନିକଟବର୍ତ୍ତୀ ଉତ୍ତର ଆଭ୍ୟନ୍ତରୀଣ ଓଡିଶା ଉପରେ ଅତିକ୍ରମ କରି କ୍ରମଶଃ ଦୁର୍ବଳ ହେଉଛି । ତେଣୁ ଓଡିଶାରେ ବର୍ଷାର ପରିମାଣ କମିବା ସହ ଛତିଶଗଡରେ ମହାନଦୀ ଉପରମୁଣ୍ଡରେ ବର୍ଷା ଲାଗିରହିଛି ।
Kanak News is now on WhatsApp
Join and get latest news updates delivered to you via WhatsApp
ଅପରାହ୍ନ ୩ଟା ସୁଦ୍ଧା ନରାଜଠାରେ ମହାନଦୀର ଜଳସ୍ତର ୨୪. ୬୨ ମିଟର ଏବଂ ଆଳିପିଙ୍ଗଳଠାରେ ୪.୨୬ ମିଟର ରହିଛି । ତେବେ ନରାଜରେ ମହାନଦୀର ବିପଦ ସଙ୍କେତ ୨୬.୪୧ ମିଟର ଥିବାବେଳେ ଆଳିପିଙ୍ଗଳରେ ବିପଦ ସଙ୍କେତ ରହିଛି ୧୧.୭୬ ମିଟର । ଅନ୍ୟ ପକ୍ଷରେ ହୀରାକୁଦରୁ ଛଡା ଯାଇଥିବା ବନ୍ୟାଜଳ କଟକର ମୁଣ୍ଡଳୀରେ ପହଞ୍ଚିବାକୁ ୩୬ ଘଣ୍ଟା ଲାଗିବ । ତେଣୁ ମହାନଦୀ ଉପରେ ସତର୍କ ନଜର ରଖାଯାଇଥିବା କହିଛନ୍ତି ଜଳସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଧୀରେନ ସାମଲ ।
ତେବେ ମହାନଦୀରେ ବନ୍ୟା ସମ୍ଭାବନା କମ୍ ଥିବା କହିଛନ୍ତି ସ୍ୱତନ୍ତ୍ର ରିଲିଫ କମିଶନର । ବର୍ଷା ଓ ସମ୍ଭାବ୍ୟ ବନ୍ୟା ସ୍ଥିତିର ସମୀକ୍ଷା ପରେ ଏହି ସୂଚନା ଦେଇଛନ୍ତି ଏସଆରସି । ସେ କହିଛନ୍ତି, ରାଜ୍ୟରେ ସେପ୍ଟେମ୍ବରରେ ୧୫୪ ପ୍ରତିଶତ ଅଧିକ ବର୍ଷା ହୋଇଛି । ନବରଙ୍ଗପୁର ଜିଲ୍ଲାକୁ ଛାଡିଦେଲେ ବାକିସବୁ ଜିଲ୍ଲାରେ ସ୍ୱାଭାବିକଠାରୁ ଅଧିକ ବର୍ଷା ରେକର୍ଡ କରାଯାଇଛି । ଅସ୍ତରଙ୍ଗ, କାକଟପୁର , ବୀର ମହାରାଜପୁରରେ ୫ ଶହ ମିଲିମିଟର ବର୍ଷା ହୋଇଛି । ୬ଟି ବ୍ଲକରେ ୪ ଶହ ମିଲିମିଟର ବର୍ଷା ହୋଇଥିବାବେଳେ ୫୬ଟି ବ୍ଲକରେ ୨ଶହରୁ ୩ଶହ ମିଲିମିଟର ବର୍ଷା ହୋଇଛି । ମଥାନିଠାରେ ଜଳକା ଓ ଆଖୁଆପଦାରେ ବୈତରଣୀ ବିପଦ ସଙ୍କେତ ଉପରେ ପ୍ରବାହିତ ହେଉଛି ।
ତେବେ ବର୍ତ୍ତମାନ ବନ୍ୟା ଆଶଙ୍କା ନଥିବା କହିଛନ୍ତି ସରକାର । ହେଲେ ଛତିଶଗଡ ଉପରେ ଥିବା ଅବପାତଟି ଧୀରେଧୀରେ ଲଘୁଚାପରେ ପରିଣତ ହେବା ସହ ଆଗାମୀକାଲି ଯାଏଁ ମହାନଦୀ ଉପରମୁଣ୍ଡରେ ବର୍ଷା କରାଇବ । ଯାହାର ପ୍ରଭାବରେ ମହାନଦୀ ଓ ଏହାର ଶାଖା ନଦୀରେ ବନ୍ୟା ଆଶଙ୍କାକୁ ଏଡାଇ ହେବନାହିଁ । ଏପଟେ ଉତ୍ତର-ବଙ୍ଗୋପସାଗରରେ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ହେଉଥିବା କହିଛି ପାଣିପାଗ ବିଭାଗ । ଯାହା ୧୯ ତାରିଖ ବେଳକୁ ଲଘୁଚାପର ରୂପ ନେଇପାରେ । ବର୍ତ୍ତମାନ ସୁଦ୍ଧା ଏହାର ପ୍ରଭାବ କିଭଳି ରହିବ ଜଣାପଡିନଥିଲେ ମଧ୍ୟ ଆଗକୁ ସତର୍କ ରହିବାକୁ ପଡିବ ବୋଲି ଅନୁମାନ କରାଯାଉଛି ।