କନକ ବ୍ୟୁରୋ: ବାସ କିଛି ସମୟର କଥା ବାର୍ତ୍ତା ଆଉ ଏତିକି ହେଲା ପରେ, ମାତ୍ର କେଇ ମିନିଟରେ, ଆପଣଙ୍କ ଆକାଉଣ୍ଟ ଖାଲି ହୋଇସାରିଥିବ । କଲ ଆସିଥିବା ନମ୍ବରକୁ ଆପଣ ଯେତେ କଲ ବ୍ୟାକ୍ କଲେ ବି ଆଉ ସେ ନମ୍ବର ଲାଗିବନି । ସାଇବର ଠକଙ୍କ ଜାଲରେ ଫସିଥିବା ସମସ୍ତଙ୍କର ସମାନ କାହାଣୀ । ସାଇବର ଅପରାଧି ମାନେ ଲୁଟିବା ପୂର୍ବରୁ ନକଲି ସିମ୍ ବ୍ୟବହାର କରନ୍ତି । ଲୋକଙ୍କୁ ଠକିବା ପରେ ସେହି ସିମକୁ ଆଉ ବ୍ୟବହାର କରନ୍ତି ନାହିଁ । କିନ୍ତୁ ଏଣିକି ସାଇବର ଅପରାଧ ରୋକିବା ପାଇଁ ଅଣ୍ଟା ଭିଡିଛି ଦୂରସଂଚାର ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ସାଇବର ଅପରାଧ ରୋକିବା ପାଇଁ ଓଡିଶାର ସନ୍ଦିଗ୍ଧ ୫୧ ହଜାର ୨୬୦ ନକଲି ସିମ୍ କାର୍ଡ ରଦ୍ଦ କରିଛି ଦୂର ସଂଚାର ବିଭାଗ । ଏଥିସହ ୨ ହଜାର ୪୧୭ ସିମ୍ ବିକ୍ରେତାଙ୍କୁ କଳା ତାଲିକାଭୁକ୍ତ କରିଛି ବିଭାଗ । ଠକ ସିମ୍ ବିକ୍ରେତା ଓ କ୍ରେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ପୋଲିସ ଡିଜିଙ୍କୁ ଚିଠି ଲେଖିଛି ଦୁର ସଂଚାର ବିଭାଗ ।
ନକଲି ସିମକୁ ଚିହ୍ନଟ ପାଇଁ ଦୂରସଞ୍ଚାର ବିଭାଗ, ଆର୍ଟିଫିସିଆଲ ଇଣ୍ଟେଲିଜେନ୍ସ ବା ଏ-ଆଇ ଆଧାରିତ ଫେସିଆଲ ରେକଗନାଇଜେସନ ଟୁଲ ବ୍ୟବହାର କରିଛି । ଓଡିଶାର ବିଭିନ୍ନ ଟେଲିକମ ଅପରେଟରଙ୍କ ଦ୍ୱାରା ଜାରି କରାଯାଇଥିବା ୫୨ ହଜାର ୮୮ ସନ୍ଦିଗ୍ଧ ମୋବାଇଲ ସଂଯୋଗକୁ ଏଏସଟିଆର ଚିହ୍ନଟ କରିଛି । ସେଥିରୁ ଜଣାପଡିଛି ଓଡିଶାରେ ୫୧ ହଜାର ୨୬୦ ନକଲି ସିମ୍ କାର୍ଡ ରହିଛି । ସେ ସବୁକୁ ରଦ୍ଦ କରିଛି ବିଭାଗ । ଜଣକ ନାଁରେ ୨୦୦ରୁ ୪୦୦ ସିମ୍ ଥିବା ବିଭାଗ କହିଛି ।
ସାରା ଭାରତରେ ୪୨ ଲକ୍ଷ ନକଲି ସିମ୍ ରଦ୍ଦ ହୋଇଛି । ତେବେ ଦୂର ସଂଚାର ବିଭାଗର ଏହି ପ୍ରୟାସ ସାଇବର ଠକାମୀ ରୋକିବାରେ ସହାୟକ ହେବ ବୋଲି ବିଶେଷଜ୍ଞ କହିଛନ୍ତି ।