ଦେଶରେ ବେକାବୁ ହେଲାଣି କରୋନା ସ୍ଥିତି । ୫ ମାସ ପରେ ପୁଣି ଗୋଟିଏ ଦିନରେ ୫୦ ହଜାର ପାର କଲା ସଂକ୍ରମିତଙ୍କ ସଂଖ୍ୟା । ହୋଲି ପୂର୍ବରୁ ଏଭଳି ସଂକ୍ରମଣ ବୃଦ୍ଧିକୁ ନେଇ ଚିନ୍ତାରେ ସରକାର
କନକ ବ୍ୟୁରୋ : ଦେଶରେ କରୋନା ଭୁତାଣୁର ଗତି ଏବେ ତୀବ୍ର ହେବାରେ ଲାଗିଛି । ଗତ ୨୪ ଘଂଟା ମଧ୍ୟରେ ଦେଶରେ ୫୦ ହଜାରରୁ ଉର୍ଦ୍ଧ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ପାଖା ପାଖି ୫ ମାସ ପରେ ପୁଣି ଥରେ ଗୋଟିଏ ଦିନରେ ସଂକ୍ରମିତଙ୍କ ସଂଖ୍ୟା ୫୦ ହଜାର ପାର ହୋଇଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସ୍ୱାସ୍ଥ୍ୟମନ୍ତ୍ରଣାଳୟର ସୂଚନା ମୁତାବକ ଗତ ୨୪ ଘଂଟା ମଧ୍ୟରେ ଦେଶରେ ୫୩,୩୬୪ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ଏହାସହ ୨୫୦ ଜଣଙ୍କର ମୃତ୍ୟୁ ହୋଇଛି । କହିରଖୁ କି ୨୦୨୦ ଅକ୍ଟୋବର ୨୩ ତାରିଖ ଦିନ ୫୪,୩୫୦ ସଂକ୍ରମିତ ଚିହ୍ନଟ ହୋଇଥିଲେ । ଏହାପରେ ଦେଶରେ ସଂକ୍ରମିତଙ୍କ ସଂଖ୍ୟା କ୍ରମାଗତ ହ୍ରାସ ପାଇ ୧୦ ହଜାର ତଳକୁ ଖସିଆସିଥିଲା ।
କରୋନା ଭୁତାଣୁ ସଂକ୍ରମଣର ବୃଦ୍ଧି ଫଳରେ ଦେଶରେ ଏବେ ଆକ୍ଟିଭ୍ ମାମଲା ୪ ଲକ୍ଷ ପାଖା ପାଖି ପହଂଚି ଯାଇଛି । ଯେତେବେଳେ କି ଦେଶରେ କରୋନା ମହାମାରୀରେ ମୃତକଙ୍କ ସଂଖ୍ୟା ୧ ଲକ୍ଷ ୬୦ ହଜାର ପାର ହୋଇଛି ।
କହିରଖୁ ଦେଶରେ ଚିହ୍ନଟ ହେଉଥିବା ସଂକ୍ରମିତଙ୍କ ମଧ୍ୟରୁ ୬୦ ପ୍ରତିଶତ ସଂକ୍ରମିତ କେବଳ ମହାରାଷ୍ଟ୍ରରେ ଦେଖିବାକୁ ମିଳିଛି । ଗତ ୨୪ ଘଂଟା ମଧ୍ୟରେ ମହାରାଷ୍ଟ୍ରରେ ୩୧ ହଜାରରୁ ଅଧିକ ପଜିଟିଭ୍ ଚିହ୍ନଟ ହୋଇଛନ୍ତି । ଏହାକୁ ନଜରରେ ରଖି ରାଜ୍ୟ ସରକାର ରାଜ୍ୟର ପ୍ରମୁଖ ସହର ମାନଙ୍କରେ ସମ୍ପୂର୍ଣ୍ଣ ଲକଡାଉନ ଲଗାଇଛନ୍ତି । ଏହାସହ ପୁଣିଥରେ ଦେଶର ରାଜଧାନୀ ଦିଲ୍ଲୀରେ ବି କରୋନା ତା’ର କାୟା ବିସ୍ତାର କରିବାରେ ଲାଗିଛି । ଗତ ୨୪ ଘଂଟାରେ ଦିଲ୍ଲୀରେ ୧୨୦୦ ସଂକ୍ରମିତ ଚିହ୍ନଟ ହୋଇଛନ୍ତି ।
ଗୋଟିଏ ପଟେ କରୋନା ସଂକ୍ରମଣ ବଢିଚାଲିଥିବା ବେଳେ ହୋଲି ଓ ଇଦ୍ ପର୍ବକୁ ନେଇ ଚିନ୍ତାରେ ପଡିଛନ୍ତି ସରକାର । ଏହି ସମୟରେ ପ୍ରାୟ ଭିଡ ପରିଲକ୍ଷିତ ହୋଇଥାଏ । ଏହାକୁ ନିୟନ୍ତ୍ରଣ କରିବାକୁ ସରକାର କିଭଳି ପଦକ୍ଷେପ ନେବେ ତାହା ଆଗାମୀ ଦିନରେ ଜଣାପଡିବ ।