ସ୍ୱାମୀ ଚାଲିଗଲେ, ପୁଅ ଭୁଲିଗଲା । ବ୍ରେନ ଟ୍ୟୁମରୁ କ୍ୟାନସର, ଏବେ ଆଖିକୁ ଦିଶୁନି । ବିଜୁଳି ନାହିଁ, ଭତ୍ତା ଆସୁନି- ଅସହାୟ ମହିଳାଙ୍କ ଉପରେ କାହା ନଜର ପଡୁନି…
କନକ ବ୍ୟୁରୋ: ସତରେ ସମୟ କେତେବେଳେ କାହାସହ କଣ କରିଦେବ ଆପଣ କିଛି କଳନା ବି କରିପାରିବେନି । ସମୟକୁ ଆପଣ ନିଷ୍ଠୁର କହି ପାରନ୍ତି ଅବା ନିର୍ଦ୍ଦୟ । କିନ୍ତୁ ସମୟର ସବୁ ସ୍ଥିତି ସବୁ ଶାସ୍ତିକୁ ମଥା ପାତି ସହିନେବା ହିଁ ଜୀବନ । ହେଲେ ସେ ଶାସ୍ତି ଯେତେବେଳେ ଅସହ୍ୟ ହୁଏ ଜୀବନକୁ ଆଉ ଦେହ ଭିତରେ ରଖିବାକୁ ଇଚ୍ଛା ନଥାଏ । ପ୍ରତି କ୍ଷଣରେ ମରି ମରି ଜିଇଁବାକୁ ପଡେ । ଏଇ ଯେମିତି ବାଲେଶ୍ୱରର ରୋଗୀଣା ମହିଳା ଜନ ଜେନା । ବୟସ ୫୦ ହେଲେ କ୍ୟାନସର ତାଙ୍କୁ ଶୁଆଇ ଦେଇଛି ବୟସର ଶେଷ ବିଛଣାରେ…
Kanak News is now on WhatsApp
Join and get latest news updates delivered to you via WhatsApp
ଏଇ ଘରେ ଦିନେ ତାଙ୍କ ସୁଖର ସଂସାର ଚାଲିଥିଲା । ଘର ଅଗଣାରେ ଖୁସିମାନେ ଖେଳୁଥିଲେ । ସ୍ୱାମୀ, ପୁଅ, ଝିଅକୁ ନେଇ ହସଖୁସିରେ ତାଙ୍କ ପରିବାର ଚାଲିଥିଲା । ହେଲେ ସବୁ ସମୟ ସମୟର ଖେଳ, ନିଷ୍ଠୁର ବିଧାତା ୧୧ ବର୍ଷ ତଳୁ ତାଙ୍କ ସ୍ୱାମୀଙ୍କୁ ଛଡାଇ ନେବା ପରେ ସବୁ କିଛି ଓଲଟପାଲଟ ହୋଇଗଲା । କାମ ଦାମ କରି ପେଟ ପୋଷୁଥିବା ଜନ- ଧିରେ ଧିରେ ରୋଗାଗ୍ରସ୍ତ ହେଲେ । ସ୍ଥିତି ଏମିତି ହେଲା ତାଙ୍କୁ ବ୍ରେନ୍ ଟ୍ୟୁମର ହୋଇଥିବା ଜଣାପଡିଲା । ମାତ୍ର ଅର୍ଥାଭାବରୁ ଚିକିତ୍ସାରେ ଅବହେଳା ହେଲା । ଯାହାର ପରିଣାମ ଜନଙ୍କୁ କ୍ୟାନସର ମାଡିବସିଲା । ଆଉ ସେ ଦୃଷ୍ଟି ଶକ୍ତି ହରାଇ ବସିଲେ ।
ଦୁନିଆଟା ନଦିଶିଲେ ବି ଯଦି ଯତ୍ନ ନେବାକୁ କେହି ଥାଏ ତାହାଲେ ସେ ଅନ୍ଧାରୀ ଜୀବନ ବି ଅଧା ଆଲୁଅର ଆଶା ଭଳି ଅନୁଭବ ହେବ କିନ୍ତୁ ହାଏ, ଜନଙ୍କ ଭାଗ୍ୟରେ ସେତକ ବି ନାହିଁ । ଝିଅ ବାହାଘର ପରେ ଶାଶୁଘରେ, ଆଉ ଏପଟେ ପୁଅର ଦେଖା ଦର୍ଶନ ନାହିଁ । ଏ କାନ୍ଥରେ ଲେଖା ହୋଇଥିବା କଥା ପରି ପୁଅ ବାହାଘର ପରେ ମାଆକୁ ଛାଡି ସତରେ କୁଆଡେ ଉଡିଯାଇଛି । ତେଣୁ ସାହା କି ଆହା କହିବାକୁ କେହି ନାହିଁ । ଜନଙ୍କ ଏ ଅବସ୍ଥା ଦେଖି ପାଖ ପଡିଶା ତାଙ୍କୁ ଖାଇବାକୁ ଦେଉଛନ୍ତି, ମାନବିକତା ଦୃଷ୍ଟିକୋଣରୁ ତାଙ୍କ ସେବା ଯତ୍ନ କରୁଛନ୍ତି…
କିନ୍ତୁ ବିଡମ୍ବନାର ବିଷୟ ଯେଉଁ ଭତ୍ତାଟଙ୍କାରେ ତାଙ୍କ ତକ ଜୀବନ ଚଳିଯାଉଥିଲା ତାହା ଏବେ ଆସିବା ବନ୍ଦ ହୋଇ ଯାଇଛି । ଭତ୍ତା କାହିଁକି ଆସୁନି, କାହାକୁ ଜଣା ନାହିଁ , ଜାଣିବାକୁ ବି କେହି ନାହିଁ । ଏପରି ସ୍ଥଳରେ ବିଦ୍ୟୁତ ବିଲ୍ ଦେଇ ପାରିନଥିବାରୁ ବର୍ଷେ ହେବ ଲାଇନ୍ କାଟି ଦିଆହେଇଛି । ଯାହା ଫଳରେ ୨ ବର୍ଷ ହେବ ବିଛଣାରେ ପଡି ଅନ୍ଧାରୀ ଜୀବନ କାଟୁଥିବା ଜନଙ୍କ ଘରେ ଏବେ ଘନ ଅନ୍ଧାର । ଅସହାୟ ମହିଳା ଜନଙ୍କ ଉପରେ ଜନପ୍ରତିନିଧିଙ୍କ ନଜର ପଡୁ, ଜନଙ୍କୁ ସରକାରୀ ଯୋଜନାର ସୁବିଧା ଦିଆଯାଉ । କାରଣ ଏ ସମାଜରେ ସମସ୍ତଙ୍କର ବଞ୍ଚିବାର ଅଧିକାର ଅଛି । ଆଉ ସେଥିପାଇଁ ବିଧି ବ୍ୟବସ୍ଥା କରାଯାଇଛି…