ମାତିଛନ୍ତି ମାଫିଆ । ଲୋପ କରିଦେବେ ବଜ୍ରକାପ୍ତା ବଂଶ, ଲକ୍ଷ ଲକ୍ଷ ଟଙ୍କାରେ ବିକ୍ରି ହେଉଛି ବଜ୍ରକାପ୍ତା କାତି ।

348

କନକ ବ୍ୟୁରୋ : ଅତି ସମ୍ବେଦନଶୀଳ ବଜ୍ରକାପ୍ତା ଚୋରା ଚାଲାଣ ନେଇ ଆହୁରି ଅଧିକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଲାଣି। ଯଦିଓ ଏଯାଏ ଓଡ଼ିଶାରେ କେତେ ସଂଖ୍ୟକ ବିରଳ ବଜ୍ରକାପ୍ତା ଅଛନ୍ତି, ସେ ନେଇ ବନ ବିଭାଗ କେବେ ବି ଗଣନା କରିନାହିଁ ତଥାପି ଏହି ଦୁର୍ଦାନ୍ତ ଗ୍ୟାଙ୍ଗ ଦ୍ୱାରା ପାଖାପାଖି ୨୦ଟି ବଜ୍ରକାପ୍ତା କେବଳ ଆଠଗଡ ଜଙ୍ଗଲରୁ ଚୋରା ଚାଲାଣ କରାଯାଇଥିବା ଗିରଫ ଅଭିଯୁକ୍ତ ସ୍ୱୀକାର କରିଛନ୍ତି। କେବଳ ସେତିକି ନୁହେଁ, ଆଠଗଡରେ ଆହୁରି ୧୦ରୁ ଅଧିକ ବଜ୍ରକାପ୍ତାଙ୍କୁ ମାଫିଆମାନେ ବିଭିନ୍ନ ସ୍ଥାନରେ ଲୁଚାଇ ରଖିଛନ୍ତି। ଏ ସଂକ୍ରାନ୍ତ ଡିଲ୍ ବି ଏକପ୍ରକାର ଚୂଡାନ୍ତ ହୋଇଯାଇଥିଲା। ହେଲେ ସେମାନେ ଧରାପଡିଗଲେ। ଏହିଭଳି ପାଖାପାଖି ୫୦ରୁ ଅଧିକ ମାଫିଆ ଏବେ ବୌଦ୍ଧ, ନୟାଗଡ଼, ଆଠଗଡ଼, ଢେଙ୍କାନାଳ ଓ ଅନୁଗୁଳ ସାତକୋଶିଆ ଜଙ୍ଗଲରେ ଘୂରି ବୁଲୁଥିବା ସୂଚନା ମିଳିଛି ।

ଆଠଗଡ଼ ଡିଏଫଓ ସସ୍ମିତା ଲେଙ୍କାଙ୍କ ସୂଚନା ଅନୁସାରେ, ମାଫିଆଙ୍କ ଭିଡିଓ ବିଦେଶୀ ବେପାରୀଙ୍କ ନିକଟରେ ପହଞ୍ଚିବା ପରେ ସେମାନେ ତାହାକୁ ନେବେ କି ନାହିଁ, ସ୍ଥିର କରିଥାନ୍ତି। ଥରେ ବ୍ୟବସାୟ ଚୂଡ଼ାନ୍ତ ହେବା ପରେ ଓଡ଼ିଶାର ଏହି ଗ୍ୟାଙ୍ଗ ବଜ୍ରକାପ୍ତାକୁ ଅଖାରେ ଧରି କୋଲକାତା ଯାଏ ପହଞ୍ଚିଥାନ୍ତି। ଗତ ୨ ତାରିଖରେ ଗିରଫ ହୋଇଥିବା ମାଫିଆମାନେ ବସ୍‌ ଓ ଟ୍ରେନ ଯୋଗେ କୋଲକାତା ଯାଇଥିବା କହିଥିଲେ। ସେଠାରେ ହୋଟଲେରେ ରହୁଥିବା ବିଦେଶୀ ବେପାରୀ ଟଙ୍କା ଦେଇ ବଜ୍ରକାପ୍ତା ନେଇଥିଲେ। ହେଲେ ଦ୍ୱିତୀୟ ଦଫାରେ ୯ ତାରିଖରେ ଗିରଫ ମାଫିଆ କହିଥିଲେ, ସେମାନେ ଭଦ୍ରକ ଯାଇଥିଲେ। ସେଠାରେ ମଧ୍ୟସ୍ଥିଙ୍କ ହାତରେ ମାଲ ଦେଇ ଟଙ୍କା ନେଇ ଆସିଥିଲେ। ତେବେ ଏମାନେ ଗତ କିଛି ବର୍ଷ ଧରି ଏହି ବେପାରରେ ମାତିଥିବା ସ୍ୱୀକାର କରିଛନ୍ତି।

ଗିରଫ ହୋଇଥିବା ମାଫିଆ ମାନିଛନ୍ତି ଯେ ସେମାନଙ୍କ ନିକଟରେ ଆହୁରି ୨ଟି ବଜ୍ରକାପ୍ତା ରହିଛି। ଖୁବ୍ ଶୀଘ୍ର ବନ୍ୟଜୀବ ଅପରାଧ ନିୟନ୍ତ୍ରଣ ବ୍ୟୁରୋର ଅଧିକାରୀମାନେ ଆଠଗଡ଼ ଆସୁଥିବା ସୂଚନା ମିଳିଛି। ହେଲେ ରାଜ୍ୟ ବନ ବିଭାଗ କିନ୍ତୁ ଏହି ତଦନ୍ତକୁ କାହିଁକି କେବଳ ଆଠଗଡ଼ ବନଖଣ୍ଡ ଭିତରେ ସୀମିତ ରଖିଛନ୍ତି, କାହିଁକି ଏହାକୁ ଅନୁଗୁଳ, ନୟାଗଡ଼ ଆଦି ଅଞ୍ଚଳରେ ଜୋରଦାର କରୁନାହାନ୍ତି, ତାହା ବୁଝାପଡୁନାହିଁ। ଆଠଗଡ଼ରେ ସପ୍ତାହକ ଭିତରେ ୧୦ଜଣ ଗିରଫ ହୋଇଛନ୍ତି, ଯେଉଁମାନଙ୍କୁ ରିମାଣ୍ଡରେ ଅଣାଯିବ। ହେଲେ ଗତ ଅକ୍ଟୋବର ମାସ ୨୨ ତାରିଖରେ ବାରିପଦା ଡିଏଫଓ ୬ଜଣ ମାଫିଆଙ୍କୁ ଗିରଫ କରିଥିଲେ। ସେମାନଙ୍କ ଠାରୁ ବଜ୍ରକାପ୍ତା କାତି ଜବତ ହୋଇଥିଲା।

ଗତବର୍ଷ ନଭେମ୍ବର ମାସରେ କୋଲକାତା ବନବିଭାଗ ଅଧିକାରୀମାନେ ଗୋଟିଏ କାରରେ ଯାଉଥିବା ବଜ୍ରକାପ୍ତା ମାଂସ ଜବତ କରିଥିଲେ। ତାହା ଓଡ଼ିଶାରୁ ଆସିଥିବା ଜଣାପଡିଥିଲା। ଅଖା ବସ୍ତାରେ ଅତି ଜୋରରେ ବନ୍ଧା ଯାଇଥିବା କାରଣରୁ ସେଥିରେ ବଜ୍ରକାପ୍ତା ମରିଯାଇଥିଲେ। ୨୦୧୫ ଜୁଲାଇ ୧୪ ତାରିଖରେ ବନ୍ୟଜନ୍ତୁ ଅପରାଧ ନିୟନ୍ତ୍ରଣ ବ୍ୟୁରୋ, ଭୋପାଳର ଏକ ଟିମ୍ ବ୍ରହ୍ମପୁରରେ ଚଢଉ କରି ବଜ୍ରକାପ୍ତାର ଦେହାବଶେଷ ଜବତ କରିଥିଲେ। ବ୍ରହ୍ମପୁର ଦେଇ ଏହା ଅନ୍ୟ ରାଜ୍ୟକୁ ଚାଲାଣ ହେଉଥିବା ସେତେବେଳେ ଏହି ଟିମ୍ ସୂଚନା ଦେଇଥିଲେ। ଏହାବ୍ୟତୀତ ପୁଲିସ ୨୦୧୮ରେ ଓଡ଼ିଶାରେ ଅନେକ ଅପରେସନ୍ କରିଛି।

ସେହିଭଳି କୋଲକାତା ବଜାରରୁ ମିଳିଥିବା ସୂଚନା ଅନୁଯାୟୀ, ବଜ୍ରକାପ୍ତା କାତିର ଦାମ କିଲୋଗ୍ରାମ୍ ପ୍ରତି ପାଖାପାଖି ୨ଲକ୍ଷ ୧୬ ହଜାର ଟଙ୍କାରେ ବିକ୍ରି ହୋଇଥାଏ। ଏହାର ମାଂସ କେଜି ପ୍ରତି ଦାମ ୨୨ ହଜାର ଟଙ୍କାରୁ ଅଧିକ। ଅତି ବିରଳ ଏହି ପ୍ରାଣୀ ସୁରକ୍ଷା ପାଇଁ ଅନ୍ତର୍ଜାତୀୟ ବଜ୍ରକାପ୍ତା ସୁରକ୍ଷା ଦିବସ ପ୍ରତିବର୍ଷ ଫେବ୍ରୁଆରି ୧୭ ତାରିଖରେ ପାଳନ ହେଉଥିଲେ ହେଁ, ଗଣମାଧ୍ୟମରେ ପ୍ରକାଶିତ ଗୋଟିଏ ବେସରକାରୀ ସ୍ୱେଚ୍ଛାସେବୀ ସଂଗଠନର ତଥ୍ୟକୁ ଯଦି ବିଶ୍ୱାସ କରାଯାଏ, ୨୦୦୯ରୁ ୨୦୧୭ ମଧ୍ୟରେ ଭାରତ ଦେଇ ଅତିକମରେ ପ୍ରାୟ ୫୭୭୨ ବଜ୍ରକାପ୍ତା ବିଦେଶକୁ ଚାଲାଣ ହୋଇଛନ୍ତି। ଏହି ତଥ୍ୟ ଅନୁସାରେ, ଦେଶରେ ଏହି ସମୟ ମଧ୍ୟରେ ଯେଉଁ ୯୦ଟି କ୍ଷେତ୍ରରେ ବନ ବିଭାଗ ବିପୁଳ ସାମଗ୍ରୀ ଜବତ ହୋଇଛି, ସେଥିରୁ ୮୩ଟି କ୍ଷେତ୍ରରେ ବଜ୍ରକାପ୍ତା କାତି ଥିଲା।

ଏବେ ପ୍ରଶ୍ନ ଉଠୁଛି, ଏତେ ସମ୍ବେଦନଶୀଳ ପ୍ରାଣୀ ପ୍ରତି ବନବିଭାଗ ରାଜ୍ୟସ୍ତରରେ ଯେଭଳି ତନାଘନା କରିବା କଥା ତାହା ଏଯାଏ ପରିଦୃଷ୍ଟ ହୋଇନାହିଁ। ରାଜ୍ୟ ସରକାରଙ୍କ ବନ ବିଭାଗ ମନ୍ତ୍ରୀ କିମ୍ବା ସଚିବ ମଧ୍ୟ ଏହା ଉପରେ ଯେତେ ଗୁରୁତ୍ୱ ଦେବା କଥା ତାହା ଦେବାଭଳି ମନେ ହେଉନାହିଁ। ବନ୍ୟପ୍ରାଣୀବିତ୍ ଆଶଙ୍କା କରୁଛନ୍ତି, ରାଜ୍ୟ ସରକାର ଯଦି ଏ କ୍ଷେତ୍ରରେ ଆଉ ସାମାନ୍ୟତମ ଉଦାସୀତନା ଦେଖାନ୍ତି, ତେବେ ଓଡ଼ିଶାରୁ ଏମାନେ ବିଲୁପ୍ତ ହେବାର ସମ୍ଭାବନା ଏଡାଇ ଦେଇ ହେବନି।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

Comments are closed.