ଗୋଟିଏ ଦିନରେ ମହାମାରୀ କରୋନା ନେଲା ୫୦ ଜଣ ଡାକ୍ତରଙ୍କ ଜୀବନ : ଭାରତୀୟ ମେଡିକାଲ ଆସୋସିଏସନ ଆଇଏମଏ ରେଜିଷ୍ଟ୍ରର ତଥ୍ୟରୁ ପ୍ରକାଶ
କନକ ବ୍ୟୁରୋ : ଗୋଟିଏ ଦିନରେ ଆଖି ବୁଜିଲେ ୫୦ ଜଣ ଡାକ୍ତର । କୋଭିଡ ହସ୍ପିଟାଲରେ ଆକ୍ରାନ୍ତଙ୍କୁ ସୁସ୍ଥ କରିବା ପାଇଁ ଦିନରାତି କାମ କରୁଥିବା ଡାକ୍ତରଙ୍କ ମୃତ୍ୟୁ ଖବର ସମସ୍ତଙ୍କୁ ବିଚଳିତ କଲାଭଳି । ଅନ୍ୟକୁ ଜୀବନ ଦେଉଥିବା ଡାକ୍ତରଙ୍କ ମୃତ୍ୟୁ ହେଲେ ଏହା ଜାତୀୟ ସଂପତିକୁ ହାନୀ । ହେଲେ କରୋନାର ଦ୍ୱିତୀୟ ଲହର ଏହିଭଳି ସାଂଘାତିକ ସ୍ଥିତି ସୃଷ୍ଟି କରିଛି । ଯେଉଁଠି ଦ୍ୱିତୀୟ ଲହର ଆରମ୍ଭ ହେବା ଦିନରୁ ଦେଶରେ ଆଜିଯାଏଁ ୨୪୪ ଡାକ୍ତର ପ୍ରାଣ ହରାଇଲେଣି । କେବଳ ରବିବାର ଗୋଟିଏ ଦିନରେ ଦେଶର ବିଭିନ୍ନ ଭାଗରୁ ୫୦ ଜଣ ଡାକ୍ତରଙ୍କ କରୋନାରେ ମୃତ୍ୟୁ ହୋଇଥିବା ଇଣ୍ଡିଆନ ମେଡିକାଲ ଆସୋସିଏସନ- ଆଇଏମଏ ରେଜିଷ୍ଟରରୁ ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ମୃତ୍ୟୁ ହୋଇଥିବା ମୋଟ୍ ୨୪୪ ଡାକ୍ତରଙ୍କ ଭିତରୁ ବିହାରରେ ସର୍ବାଧିକ ୬୯, ଉତର ପ୍ରଦେଶରେ ୩୪, ଦିଲ୍ଲୀରେ ୨୭ ଜଣ ଅଛନ୍ତି । ସବୁଠାରୁ ଚିନ୍ତାର ବିଷୟ ହେଉଛି ମୃତ୍ୟୁ ହୋଇଥିବା ଡାକ୍ତରଙ୍କ ଭିତରୁ ୩ ପ୍ରତିଶତ କରୋନାର ଦୁଇଟି ଡୋଜ୍ ଟିକା ନେଇସାରିଥିଲେ । ଅର୍ଥାତ କରୋନା ଟିକାନେଲେ ସ୍ୱାସ୍ଥ୍ୟବସ୍ଥା ସଂକଟାପନ୍ନ ହେବନାହିଁ ବୋଲି ଯେଉଁ ଧାରଣା ରହିଛି ତାକୁ ଏହି ତଥ୍ୟ ବିରୋଧାଚରଣ କରୁଛି । ହେଲେ ଏବେ ବି ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କ ଟିକାକରଣ ଜୋରଦାର କରିବାକୁ ଗୁରୁତ୍ୱ ଦେଇଛି ଆଇଏମଏ । ସଂସ୍ଥାର ତଥ୍ୟ ଅନୁସାରେ ଦେଶରେ ମୋଟ୍ ୬୬ ପ୍ରତିଶତ ଡାକ୍ତର ଓ ସ୍ୱାସ୍ଥ୍ୟକର୍ମୀ କରୋନା ଟିକା ନେଇଛନ୍ତି ।