ମହାରାଷ୍ଟ୍ରରେ ୫୦-୫୦ ଫର୍ମୁଲା, ୪୦ ଦିନ ପରେ ଗଠନହେଲା ମନ୍ତ୍ରିମଣ୍ଡଳ।
କନକ ବ୍ୟୁରୋ: ଶିବସେନାର ବିଦ୍ରୋହୀ ନେତା ଏକାନାଥ ସିନ୍ଦେଙ୍କ ଗୋଷ୍ଠୀ ବିଜେପି ସହ ମିଶି ମହାରାଷ୍ଟ୍ରରେ ସରକାର ଗଠନ କରିବାର ୪୦ ଦିନ ପରେ ମନ୍ତ୍ରିମଣ୍ଡଳ ଗଠନ କରିଛନ୍ତି । ସୁପ୍ରିମକୋର୍ଟର ଚାପ ସତ୍ୱେ ୨ କ୍ୟାବିନେଟ୍ ମନ୍ତ୍ରୀଙ୍କ ସହ ୧୮ ମନ୍ତ୍ରୀ ମଙ୍ଗଳବାର ଶପଥ ଗ୍ରହଣ କରିଛନ୍ତି । ମହାରାଷ୍ଟ୍ର ରାଜ୍ୟପାଳ ବି ଏସ କୋଶିଆରୀ ଦକ୍ଷିଣ ମୁମ୍ବାଇସ୍ଥିତ ରାଜଭବନରେ ମନ୍ତ୍ରୀମାନଙ୍କୁ ପଦ ଏବଂ ଗୋପନିୟତାର ଶପଥ ପାଠ କରାଇଛନ୍ତି । ସଂଖ୍ୟାରେ ବହୁତ କମ ହୋଇଥିଲ ବି ମନ୍ତ୍ରିମଣ୍ଡଳରେ ଏକାନାଥ ସିନ୍ଦେ ଗୋଷ୍ଠୀକୁ ସମାନ ଅଧିକାର ଦେଇଛି ବିଜେପି । ୧୮ ମନ୍ତ୍ରୀଙ୍କ ମଧ୍ୟରୁ ବିଜେପି ଏବଂ ଏକନାଥ ଗୋଷ୍ଠୀରୁ ୯ ଜଣ ଲେଖାଏ ମନ୍ତ୍ରୀ ଶପଥ ନେଇଛନ୍ତି । ମହାରାଷ୍ଟ୍ର ବିଜେପି ସଭାପତି ଚନ୍ଦ୍ରକାନ୍ତ ପାଟିଲଙ୍କୁ ମଧ୍ୟ ମନ୍ତ୍ରିମଣ୍ଡଳରେ ସାମିଲ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଜୁନ୍ ୩୦ରୁ ଶପଥ ନେଇଥିବା ଏକନାଥ ସିନ୍ଦେ ସରକାରରେ ମନ୍ତ୍ରିମଣ୍ଡଳ ଗଠନରେ ବିଳମ୍ବ ଯୋଗୁ ବିରୋଧୀ ସମାଲୋଚନା କରିଥିଲେ । ମନ୍ତ୍ରୀମଣ୍ଡଳ ଗଠନ ଉପରେ ଆଲୋଚନା ନେଇ ଏକନାଥ ସିନ୍ଦେ ବହୁବାର ରାତିରେ ଦିଲ୍ଲୀ ଗସ୍ତ କରି ମଧ୍ୟ ସମାଲୋଚିତ ହୋଇଥଲେ । ଶେଷରେ ମନ୍ତ୍ରିମଣ୍ଡଳ ଗଠନ ହୋଇଥିଲେ ବି ଅଧାରୁ ଅଧିକ ସିଟ୍ ବଳକା ରହିଛି । ୪୩ ସଦସ୍ୟ ବିଶିଷ୍ଟ ମହାରାଷ୍ଟ୍ର ମନ୍ତ୍ରିମଣ୍ଡଳରେ ଆହୁରି ୨୫ ପଦବୀ ଫାଙ୍କା ରହିଛି । ତେବେ ଏପର୍ଯ୍ୟନ୍ତ ବିଭାଗ ଭାଗବଣ୍ଟା କରାଯାଇନାହିଁ । କାହାକୁ କେଉଁ ବିଭାଗ ମିଳିବ ସେନେଇ ଚର୍ଚ୍ଚା ହେଉଥିବା ବେଳେ ଉପ-ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କୁ ଗୁରୁତ୍ୱପୂର୍ଣ୍ଣ ଗୃହ ବିଭାଗର ଦାୟିତ୍ୱ ମିଳିବ ବୋଲି ସୂଚନା ମିଳିଛି ।
ମନ୍ତ୍ରିମଣ୍ଡଳରେ ଆହୁରି ୨୫ ସିଟ୍ ଫାଙ୍କା ପଡିଥିବାରୁ ବିଜେପି-ସିନ୍ଦେଙ୍କ ମଧ୍ୟରେ ଠିକ୍ ଭାବେ ବୁଝାମଣା ହୋଇନଥିବା ନେଇ ଚର୍ଚ୍ଚା ହେଉଛି । ହେଲେ ସୁପ୍ରିମକୋର୍ଟରେ ଶିବସେନା ବିବାଦ ମାମଲାର ଶୁଣାଣି ଶେଷ ହୋଇନଥିବାରୁ ମନ୍ତ୍ରିମଣ୍ଡଳରେ ଅଧିକ ମନ୍ତ୍ରୀଙ୍କୁ ସାମିଲ କରାଯାଇନଥିବା ରାଜନୈତିକ ଋଣନୀତିକାରମାନେ ମତପ୍ରକାଶ କରିଛନ୍ତି ।