ରାଜ୍ୟ ଭିତରେ ଚାଲିବ ୫ଟି ସ୍ୱତନ୍ତ୍ର ଟ୍ରେନ୍ । ଶନିବାର ଓ ରବିବାର ବନ୍ଦ ରହିବ ସେବା, ପୂର୍ବତଟ ରେଳବାଇର ଘୋଷଣା ।
କନକ ବ୍ୟୁରୋ : କରୋନା ଭାଇରସ ପାଇଁ ଲକଡାଉନ ୫.୦ ଜାରି ଥିବା ବେଳେ ରାଜ୍ୟ ଭିତରେ ୫ଟି ସ୍ୱତନ୍ତ୍ର ଟ୍ରେନ ଚାଲିବ ବୋଲି ପୂର୍ବତଟ ରେଳବାଇ ପକ୍ଷରୁ ଘୋଷଣା ହୋଇଛି । ଏହି ୫ଟି ସ୍ୱତନ୍ତ୍ର ଟ୍ରେନ ଜୁନ ୮ ତାରିଖ ଠାରୁ ଜୁନ ୩୦ ଯାଏଁ ଚାଲିବ । କିନ୍ତୁ ଏହି ଅବଧି ମଧ୍ୟରେ ପ୍ରତି ଶନିବାର ଓ ରବିବାର ସ୍ୱତନ୍ତ୍ର ଟ୍ରେନ ସେବା ବନ୍ଦ ରହିବ । ପୂର୍ବତଟ ରେଳବାଇ ପକ୍ଷରୁ ଏହି ସୂଚନା ଦିଆଯାଇଛି । ପୂର୍ବତଟ ରେଳବାଇ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ଭୁବନେଶ୍ୱର-ବଲାଙ୍ଗୀର-ଭୁବନେଶ୍ୱର, ଭୁବନେଶ୍ୱର-ଭଦ୍ରକ-ଭୁବନେଶ୍ୱର ସ୍ୱତନ୍ତ୍ର ଟ୍ରେନ, ଭୁବନେଶ୍ୱର-ବ୍ରହ୍ମପୁର-ଭୁବନେଶ୍ୱର ସ୍ୱତନ୍ତ୍ର ଟ୍ରେନ, ସମ୍ବଲପୁର-ଖୋର୍ଦ୍ଧାରୋଡ-ସମ୍ବଲପୁର ସ୍ୱତନ୍ତ୍ର ଟ୍ରେନ, ଭୁବନେଶ୍ୱର-କୋରାପୁଟ-ଭୁବନେଶ୍ୱର ଟ୍ରେନ ଚଳାଚଳ କରିବ ।
Kanak News is now on WhatsApp
Join and get latest news updates delivered to you via WhatsApp
ରେଳବାଇ ପକ୍ଷରୁ କୁହାଯାଇଛି ଯେ, ସ୍ୱତନ୍ତ୍ର ଟ୍ରେନରେ ଯାତ୍ରା କରିବା ଲାଗି ଆଇଆରସିଟିସି ୱେବସାଇଟରୁ ରିଜରର୍ଭେସନ ଟିକେଟ ମିଳିପାରିବ । ରେଳବାଇ ପକ୍ଷରୁ କୁହାଯାଇଛି ଯେ, କୋଭିଡ-୧୯ ଗାଇଡଲାଇନ ଅନୁସାରେ ଯାତ୍ରୀଙ୍କୁ ନିୟମ ପାଳନ କରିବାକୁ ପଡ଼ିବ ।
ସୂଚନାଯୋଗ୍ୟ, କରୋନା ଭାଇରସ ପାଇଁ ସମଗ୍ର ଦେଶରେ ଗତ ମାର୍ଚ୍ଚ ୨୫ ତାରିଖ ଠାରୁ ଲକଡାଉନ ଆରମ୍ଭ ହେବା ପରେ ସାଧାରଣ ରେଲ ସେବା ବନ୍ଦ ହୋଇଛି । ଜୁନ ୧ ତାରିଖ ଠାରୁ ଯଦିଓ ଟ୍ରେନ ଚଳାଚଳ କରିଛି, ତଥାପି ଏହା ପୂର୍ବଭଳି ସ୍ୱାଭାବିକ ହୋଇପାରି ନାହିଁ । ରାଜ୍ୟରେ ୫ଟି ଟ୍ରେନ ଚଳାଚଳ କରିବା ପରେ ଲୋକମାନେ ଭୁବନେଶ୍ୱରକୁ ସୁବିଧାରେ ଆସିପାରିବେ । ଏହି ୫ଟି ଟ୍ରେନ ଚାଲିବା ଦ୍ୱାରା ରାଜ୍ୟର ଲକ୍ଷାଧିକ ଲୋକ ଉପକୃତ ହୋଇପାରିବେ ।