ମହାନଦୀ, ବ୍ରାହ୍ମଣୀ, ବୈତରଣୀ ସମେତ ୫ ନଦୀର ପାଣି ପ୍ରଦୂଷିତ । ପରିବେଶ ମନ୍ତ୍ରୀଙ୍କ ଉତ୍ତର
କନକ ବ୍ୟୁରୋ: ଜଳ ପାଲଟୁଛି ଜହର । ଗୋଟିଏ ପଟେ ରାଜ୍ୟରେ ଜଳ ସଙ୍କଟ ଦେଖା ଦେଉଥିବା ବେଳେ ଅନ୍ୟପଟେ ନଦୀଦଳ ଜହର ପାଲଟୁଛି । ବିଭିନ୍ନ ନଦୀର ଜଳ ପ୍ରଦୂଷିତ ହେବା କାରଣରୁ ଏହା ପରିବେଶ ପାଇଁ ସମସ୍ୟା ସୃଷ୍ଟି କରୁଛି । ତେବେ ବର୍ତ୍ତମାନ ରାଜ୍ୟର ୫ଟି ନଦୀର ଜଳ ସାଙ୍ଘାତିକ ରୂପେ ପ୍ରଦୂଷିତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ମହାନଦୀର ୨ଟି ସ୍ଥାନରେ, ଶଙ୍ଖ ନଦୀର ଗୋଟିଏ ସ୍ଥାନରେ, କୋଏଲ ନଦୀର ଗୋଟିଏ ସ୍ଥାନରେ, ବ୍ରହ୍ମଣୀ ନଦୀର ୪ଟି ସ୍ଥାନରେ ଏବଂ ବୈତରଣୀ ନଦୀର ୩ଟି ସ୍ଥାନରେ ଜଳ ପ୍ରଦୂଷିତ ହେଉଛି । ତେବେ ମୋଟ ୫ଟି ନଦୀର ୧୧ ସ୍ଥାନରେ ଜଳ ପ୍ରଦୂଷଣ ହେଉଥିବା ନେଇ ଆଜି ବିଧାନସଭାରେ ରିପୋର୍ଟ ଦେଇଛନ୍ତି ମନ୍ତ୍ରୀ । ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ ଗୃହରେ ଜଳ ପ୍ରଦୂଷଣ ଉତ୍ତର ରଖିଛନ୍ତି ।
ତେବେ ବିଜେପି ବିଧାୟକ ମୋହନ ମାଝୀଙ୍କ ପ୍ରଶ୍ନରେ ଉତ୍ତର ରଖିଛନ୍ତି ମନ୍ତ୍ରୀ ଆରୁଖ । କଟକ ଓ ସମ୍ବଲପୁରରେ ମହାନଦୀ ଜଳ ସହରର ଆବର୍ଜନା ପାଣିରୁ ପ୍ରଦୂଷିତ ହେଉଛି । ସେହିପରି ରାଉରକେଲାରେ ଷ୍ଟିଲ ପ୍ଲାଣ୍ଟର ବର୍ଜ୍ୟବସ୍ତୁ ଓ ଡ୍ରେନ ପାଣି କାରଣରୁ ବ୍ରାହ୍ମଣୀ ନଦୀ ଦୂଷିତ ହେଉଛି । ତାବାଦ୍ ଶଙ୍ଖ ଓ କୋଏଲ ମନୁଷ୍ୟକୃତ କାରଣରୁ ପ୍ରଦୂଷିତ ହେଉଥିବା ମନ୍ତ୍ରୀ ଉତ୍ତର ରଖିଛନ୍ତି ।
ତେବେ ଏସବୁ ନଦୀ ଜଳକୁ ବ୍ୟବହାର ଉପଯୋଗୀ କରିବା ପାଇଁ ଆଉ ପ୍ରଦୂଷଣମୁକ୍ତ କରିବା ପାଇଁ ଜଳ ଯୋଗାଣ ଓ ସ୍ୱରେଜ ବୋର୍ଡ ପକ୍ଷରୁ ବିଭିନ୍ନ ପ୍ରକଳ୍ପ କରାଯାଉଥିବା ମନ୍ତ୍ରୀ କହିଛନ୍ତି । ସମ୍ବଲପୁରରେ ଜାଇକା ପକ୍ଷରୁ ୪୦ ନିୟୁତ ଲିଟର କ୍ଷମତା ବିଶିଷ୍ଟ ବର୍ଜ୍ୟଜଳ ବିଶୋଧନାଗାର ସ୍ଥାପନା ହେଉଛି । ସେହିପରି କଟକ, ରାଉରକେଲା ସମେତ ୧୧ଟି ସ୍ଥାନରେ ନଦୀ ପ୍ରଦୂଷଣ ରୋକିବାକୁ ମାରାଥନ କାମ ଚାଲିଛି ।