ଓଡିଶାରେ ଚତୁର୍ଥ କରୋନା ରୋଗୀ ଚିହ୍ନଟ: ଭଦ୍ରକର ଦୁବାଇ ଫେରନ୍ତା ଯୁବକଙ୍କ ନମୂନାରେ ଠାବ ହେଲା ମାରାତ୍ମକ ଭୂତାଣୁ; ସ୍ୱାସ୍ଥ୍ୟ ବିଭାଗର ସୂଚନା, ଯୁବକଙ୍କ ଠାରେ ଦେଖା ଦେଇନଥିଲା କରୋନା ଲକ୍ଷଣ
ରୋଗୀଙ୍କୁ କଟକ ଆଣିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ
କନକ ବ୍ୟୁରୋ: ଓଡିଶାରେ ଆଉ ଜଣେ କରୋନା ପଜିଟିଭି ଚିହ୍ନଟ ହୋଇଛି । ଜଣେ ୨୯ ବର୍ଷିୟ ଯୁବକଙ୍କ ଠାରେ ଚିହ୍ନଟ ହୋଇଛି କରୋନା ଭୂତାଣୁ । ଆକ୍ରାନ୍ତ ଯୁବକ ଜଣକ ଭଦ୍ରକର ଓ ସେ କିଛି ଦିନ ତଳେ ସେ ଦୁବାଇରୁ ଫେରିଥିଲେ । ଟ୍ୱିଟ୍ କରି ଏହି ସୂଚନା ଦେଇଛି ରାଜ୍ୟ ସ୍ୱାସ୍ଥ୍ୟ ବିଭାଗ । ଏହାକୁ ମିଶାଇ ଓଡିଶାରେ କରୋନା ଆକ୍ରାନ୍ତଙ୍କ ସଂଖ୍ୟା ଚାରିରେ ପହଂଚିଛି । ତେବେ ଓଡିଶାରେ ପ୍ରଥମ ଥର ପାଇଁ ଭୁବନେଶ୍ୱର ବାହାରେ କରୋନା ସଂକ୍ରମିତ ଚିହ୍ନଟ ହେବା ସରକାରଙ୍କ ଚିନ୍ତା ବଢାଇ ଦେଇଛି । ଭଦ୍ରକରେ ରହୁଥିବା ଏହି ଚତୁର୍ଥ ରୋଗୀଙ୍କୁ କଟକ ବଡମେଡିକାଲ ଆଣିବା ପାଇଁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛି ରାଜ୍ୟ ସ୍ୱାସ୍ଥ୍ୟ ବିଭାଗ । ଏଥିସହ ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଆଇସୋଲେସନ୍ ରଖିବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛି ରାଜ୍ୟ ସ୍ୱାସ୍ଥ୍ୟ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
The fourth COVID patient did not have any symptoms. Hence people with travel history but no symptoms should not be complacent. They must follow home quarantine for two weeks and then self monitor their health condition for another two weeks.
— H & FW Dept Odisha (@HFWOdisha) March 31, 2020
ତେବେ ଦୁବାଇରୁ ଫେରିବା ପରେ ଆକ୍ରାନ୍ତ ଯୁବକ କେଉଁଠିକୁ ଯାଇଥିଲେ, କେତେ ଜଣଙ୍କ ସଂସ୍ପର୍ଶରେ ଆସିଥିଲେ । ଯେଉଁମାନଙ୍କ ସଂସ୍ପର୍ଶରେ ଆସିଥିଲେ ସେମାନଙ୍କୁ ଠାବ କରିବା ପ୍ରଶାସନ ପାଇଁ ବଡ ଚାଲେଞ୍ଜ ରହିବ । ସେପଟେ ଭଦ୍ରକରେ କରୋନା ଆକ୍ରାନ୍ତ ଚିହ୍ନଟ ଖବର ପରେ ଆଲର୍ଟ ହୋଇଛି ପୁଲିସ ପ୍ରଶାସନ । ତାଲାବନ୍ଦକୁ କଡାକଡି କରାଯାଉଛି । ସବୁଠୁ ବଡ କଥା ହେଉଛି ଦୁବାଇ ଫେରିବା ପରେ ୧୪ ଦିନ ଯାଏଁ ସଂପୃକ୍ତ ଯୁବକଙ୍କ ପାଖରେ କରୋନାର କୌଣସି ଲକ୍ଷଣ ଦେଖା ଦେଇନଥିଲା । ତେଣୁ ସେ ଅଧିକ ଲୋକଙ୍କ ସଂପର୍କରେ ଆସିଥିବେ ବୋଲି ସନ୍ଦେହ କରାଯାଉଛି । ଭଦ୍ରକର ଆକ୍ରାନ୍ତଙ୍କ ଠାରୁ ଅନ୍ୟମାନେ ସଂକ୍ରମିତ ହୋଇଥିଲେ କରୋନା ଗୋଷ୍ଠୀ ସଂକ୍ରମଣ ଆଡକୁ ମୁହାଁଉଛି ବୋଲି କୁହାଯାଇ ପାରିବ । ଓଡିଶାରେ ଗତକାଲି ସୁଦ୍ଧା ୬୧୦ଟି ନମୁନା ପରୀକ୍ଷା ହୋଇଥିବା ବେଳେ ୪ଟି ପଜିଟିଭ ଚିହ୍ନଟ ହୋଇଛି ।
ମଙ୍ଗଳବାର ୧୩୭ଟି ନମୁନା ପରୀକ୍ଷା ମଧ୍ୟରୁ ଗୋଟିଏ ପଜିଟିଭି ଥିବା ବେଳେ ଅନ୍ୟ ସବୁ ନେଗେଟିଭ୍ ରହିଛି । ଆଜି ଆରଏମଆରସିରେ ୧୧୯ଟି ନମୁନା ପରୀକ୍ଷା ହୋଇଥିବା ବେଳେ ସମସ୍ତ ରିପୋର୍ଟ ନେଗେଟିଭ୍ ଆସିଛି । ଭୁବନେଶ୍ୱର ଏମ୍ସରେ ୧୫ଟି ନମୁନା ପରୀକ୍ଷା ହୋଇଥିବା ବେଳେ ଗୋଟିଏ ପଜିଟିଭି ହୋଇଛି । ଆଉ ସେହି ଗୋଟିଏ ପଜିଟିଭ ହେଉଛନ୍ତି ଭଦ୍ରକ ଯୁବକ । ଅନ୍ୟପଟେ କଟକ ବଡ ମେଡିକାଲରେ ସମସ୍ତ ୩ଟି ନମୁନା ନେଗେଟିଭ୍ ବାହାରିଛି । ସେପଟେ ନିଜାମୁଦ୍ଦିନ ଧାର୍ମିକ ସମାବେଶରେ ଯୋଗ ଦେଇ ଦେଇଥିବା କିଛି ଲୋକ ଓଡିଶା ଫେରିଥିବା ଚର୍ଚ୍ଚା ନେଇ ମୁଖ୍ୟ ମୁଖପାତ୍ର ସୁବ୍ରତ ବାଗ୍ଚୀ କହିଛନ୍ତି ଏହି ସମାବେଶରୁ ଫେରିଥିବା ୩ ଜଣଙ୍କୁ କ୍ୱାରେନଟାଇନ୍ ବା ସଙ୍ଗରୋଧରେ ରଖାଯାଇଛି । ଆଉ କିଏ କିଏ ସେଠାକୁ ଯାଇଥିଲେ ଏବଂ ସେମାନଙ୍କ ସଂସ୍ପର୍ଶରେ କେଉଁମାନେ ଆସିଥିଲେ ତାହା ଅନୁଧ୍ୟାନ କରାଯାଉଛି ।