କନକ ବ୍ୟୁରୋ : ବହୁ ବାଦ ବିବାଦ ପରେ ବାତିଲ ହେଲା ମାଲକାନଗିରି ଜିଲ୍ଲାର ବିବାଦୀୟ ଲଘୁ ଖଣିଜ ଟେଣ୍ଡର । ଓଡିଶା ସରକାରଙ୍କ ରାଜସ୍ୱ ବିଭାଗର ନିର୍ଦ୍ଦେଶ କ୍ରମେ ମାଲକାନଗିରି ଜିଲ୍ଲାପାଳ ସମସ୍ତ ୪୮ଟି ଖଣି ନିଲାମ ପ୍ରକ୍ରିୟାକୁ ବାତିଲ କରିଛନ୍ତି । ଦକ୍ଷିଣାଞ୍ଚଳ ରାଜସ୍ୱ କମିଶନରଙ୍କ ସରଜମିନ ତଦନ୍ତ ଓ ତାଙ୍କ ସୁପାରିଶ ପରେ ଏପରି ନିଷ୍ପତ୍ତି ନିଆଯାଇଛି । ଏବଂ ସାନି ଟେଣ୍ଡର ପାଇଁ ଜିଲ୍ଲାପାଳ ଆହ୍ୱାନ ଦେଇଛନ୍ତି । ପୂର୍ବତନ ଜିଲ୍ଲାପାଳ ଡ. ୟେଦୁଲା ବିଜୟ ୨ଟି ଟେଣ୍ଡର ବକ୍ସ ନିଜ ଘରକୁ ନେଇ ଆନ୍ଧ୍ରର ଏକ ଘରୋଇ କମ୍ପାନୀକୁ ଅନୁକମ୍ପା ଦେଖାଇଥିବା ଅଭିଯୋଗ ହୋଇଥିଲା । ତେବେ ଟେଣ୍ଡର ବାତିଲ ହୋଇଥିବା ବେଳେ ଦୋଷୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ଗତ ମାର୍ଚ୍ଚ ମାସରେ ମାଲକାନଗିରି ଜିଲ୍ଲାର ପୂର୍ବତନ ଜିଲ୍ଲାପାଳ ଅନେକ ବୈଧ ଖଣି ଲିଜକୁ ବାତିଲ କରି ଲଘୁ ଖଣିଜ ପଦାର୍ଥର ଲିଜ ଲାଗି ଟେଣ୍ଡର ଆହ୍ୱାନ କରିଥିଲେ । ଆଉ ଟେଣ୍ଡର ସମୟ ସୀମା ସରିବା ପରେ ଦୁଇଟି ଟେଣ୍ଡର ବାକ୍ସକୁ ନିଜ ଘରୁକୁ ନେଇ ଯାଇଥିଲେ । ଟେଣ୍ଡର ବକ୍ସକୁ ଦୁଇ ଦିନ ଧରି ନିଜ ଘରେ ରଖି, କାଗଜପତ୍ର ହେରଫେର କରି ଆନ୍ଧ୍ରର ଏକ କମ୍ପାନୀକୁ ବେଆଇନ୍ ଭାବେ ଟେଣ୍ଡର ପ୍ରଦାନ କରିଥିଲେ । କୋଟିଏ ଟଙ୍କାର ସଲଭେନ୍ସି ବାବଦକୁ ଦୁଇ କୋଟିରୁ ଅଧିକ ଟଙ୍କା ମୁଲ୍ୟର ଧରିଗୁଡା–ଏ, ଧରିଗୁଡା–ବି, ମାଲକାନଗିରି–ଏ, ମାଙ୍ଗିପାଲି, ଇଦିକୋଣ୍ଡା, ପର୍ସନପାଲି ଖଣିକୁ ଚତୁରତାର ସହ ହାତେଇ ଥିଲା ଆନ୍ଧ୍ର କମ୍ପାନୀ । ଆନ୍ଧ୍ର କମ୍ପାନୀ ଲଘୁ ଖଣିଜ ଟେଣ୍ଡର ହାତେଇବା ପଛରେ ପୂର୍ବତନ ଜିଲ୍ଲାପାଳ ଡ. ୟେଦୁଲା ବିଜୟ ହାତ ଥିବା ଅଭିଯୋଗ କରିଥିଲେ କଂଗ୍ରେସ ନେତା ।
ଅଭିଯୋଗ ପରେ ପୁରା ଘଟଣାର ପୁଙ୍ଖାନୁଫୁଙ୍ଖ ତଦନ୍ତ କରି ଟେଣ୍ଡର ବାତିଲ କରିବା ଲାଗି ରାଜ୍ୟ ସରକାରଙ୍କୁ ସୁପାରିଶ କରିଥିଲେ ଦକ୍ଷିଣାଂଚଳ ରାଜସ୍ୱ କମିଶନର । ରାଜସ୍ୱ ବିଭାଗର ନିର୍ଦ୍ଦେଶ କ୍ରମେ ୬ଟି ତହସିଲ ଅଧିନରେ ଥିବା ୪୮ଟି ଲଘୁ ଖଣି ଲିଜ ଟେଣ୍ଡରକୁ ବାତିଲ କରାଯାଇଛି । ଏବେ ସାନି ଟେଣ୍ଡର ଆହ୍ୱାନ କରିବା ପାଇଁ ତହସିଲଦାରଙ୍କୁ ନିର୍ଦ୍ଦେଶ ଦେଇଛନ୍ତି ବର୍ତମାନର ଜିଲ୍ଲାପାଳ ବିଶାଳ ସିଂ । ତେବେ ଗତ ୮ ମାସ ଧରି ଜିଲ୍ଲାରେ ଗୋଡି ପଥର କୃତ୍ରିମ ଅଭାବ ସୃଷ୍ଟି ହୋଇଥିବାରୁ ନୂତନ ଟେଣ୍ଡର କାର୍ଯ୍ୟକାରୀ ନ ହେବା ଯାଏଁ ବୈଧ ଥିବା ଲିଜଧାରିଙ୍କୁ ଖନନ କରିବା ଲାଗି ଅନୁମତି ଦେବାକୁ ଦାବି ହୋଇଛି
ପୂର୍ବରୁ ଆନ୍ଧ୍ରର ଠିକାଦାର ଚାଭା ବେଣୁଗୋପାଳଙ୍କ ସଲଭେନ୍ସି ସାର୍ଟିଫିକେଟକୁ ମଧ୍ୟ ବାତିଲ କରିଥିଲେ ଜିଲ୍ଲାପାଳ । ଚଭା ବେଣୁଗୋପାଳ ମୋଟୁ ତହସିଲ ଅନ୍ତର୍ଗତ ପୁଶୁଗୁଡା ମୌଜାରେ ବେଆଇନ ଭାବେ ୧୦ ଏକରରୁ ଅଧିକ ଜଙ୍ଗଲ ଓ ଗୋଚର ଜମି ଅକ୍ତିଆର କରିଥିବା ନେଇ କଂଗ୍ରେସ ଅଭିଯୋଗ କରିଥିଲା । ଏହି ପୁରା ଘଟଣାରେ ସଂପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି କଂଗ୍ରେସ ।