କନକ ବ୍ୟୁରୋ : କେନ୍ଦ୍ରସରକାରଙ୍କ ସାଧାରଣ ବଣ୍ଟନ ବିଭାଗ ୪୩ ଲକ୍ଷ ୯୦ ହଜାର ନକଲି ରାସନ କାର୍ଡ ରଦ୍ଦ କରିଛନ୍ତି । ସରକାରଙ୍କ ତରଫରୁ ପ୍ରକୃତ ହିତାଧିକାରୀଙ୍କୁ ଖାଦ୍ୟ ସୁରକ୍ଷା ଆଇନ ବଳରେ ରିହାତି ମୂଲ୍ୟରେ ଖାଦ୍ୟ ସାମଗ୍ରୀ ଯୋଗାଇ ଦିଆଯାଇ ପାରିବ । ଖାଦ୍ୟ ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି କି ନକଲି ରାସନକାର୍ଡଧାରୀଙ୍କୁ ଚିହ୍ନଟ କରିବା ଜରୁରି । ୨୦୧୩ ମସିହାରେ ବହୁ ସଂଖ୍ୟାର ନକଲି ରାସନ କାର୍ଡ ଦେଖିବାକୁ ମିଳିଥିଲା । ଯାହାକୁ ନେଇ ସରକାର ବିଗତ ୭ ବର୍ଷ ମଧ୍ୟରେ ଏଭଳି ନକଲି ରାସନକାର୍ଡଧାରୀଙ୍କୁ ଚିହ୍ନଟ କରିବାକୁ ପ୍ରୟାସ ଜାରି ରହିଛି । ଅଧିକାରୀ ଜଣଙ୍କ ଆହୁରି କହିଛନ୍ତି କି ସରକାର ଏଥିପାଇଁ ରାସନକାର୍ଡଧାରୀଙ୍କ ସବୁତଥ୍ୟ ଡିଜିଟାଲାଇଜେସନ କରିବା ପାଇଁ ଯେଉଁ ଅଭିଯାନ ଚଳାଇଛନ୍ତି ସେହି ମାଧ୍ୟମରେ ଏବେ ନକଲି ରାସନକାର୍ଡ ଧରା ପଡୁଛି ।
Kanak News is now on WhatsApp
Join and get latest news updates delivered to you via WhatsApp
ଏକ ଜାତୀୟ ଗଣମାଧ୍ୟମକୁ ସୂଚନା ଦେଇ ଅଧିକାରୀ ଜଣଙ୍କ କହିଛନ୍ତି କି ଜାତୀୟ ଖାଦ୍ୟ ସୁରକ୍ଷା ଆଇନ ବଳରେ ବର୍ତମାନ ଦେଶର ୮୧.୩୫ କୋଟି ଲୋକ ଲାଭବାନ ହେଉଛନ୍ତି । ଯାହାକି ଦେଶର ମୋଟ ଜନସଂଖ୍ୟାର ୩ ଭାଗରୁ ୨ ଭାଗ । ବର୍ତମାନ ପ୍ରଧାନମନ୍ତ୍ରୀଙ୍କ ଗରିବ କଲ୍ୟାଣ ଯୋଜନା ମାଧ୍ୟମରେ ଏହି କାର୍ଡଧାରୀ ମାନଙ୍କୁ ମାସକୁ ୫ କେଜି ଖାଦ୍ୟ ସାମଗ୍ରୀ ମାଗଣାରେ ଯୋଗାଇ ଦିଆଯାଉଛି । ସରକାର ଏହି ଯୋଜନାକୁ ଆହୁରି ବ୍ୟାପକ କରିବାକୁ ଯୋଜନା ପ୍ରସ୍ତୁତ କରୁଛନ୍ତି । ମାର୍ଚ୍ଚ ୨୦୨୦ କରୋନା ମାହାମାରୀ ଆସିବା ପରେ ସାଧାରଣ ଲୋକଙ୍କ ଖାଦ୍ୟ ଆବଶ୍ୟକତାକୁ ନଜର ରଖି ସରକାର ଏଭଳି ପଦକ୍ଷେପ ନେଇଛନ୍ତି ।
କେନ୍ଦ୍ରସରକାର ଜାତୀୟ ଖାଦ୍ୟସୁରକ୍ଷା ଯୋଜନାରେ ପ୍ରତିମାସ ୪.୨ କୋଟି ଟନ୍ ଖାଦ୍ୟ ଶଷ୍ୟ ଲୋକମାନଙ୍କୁ ରିହାତି ଦରରେ ବାଣ୍ଟୁଛନ୍ତି । ଯେଉଁଥିରେ ହିତାଧିକାରୀଙ୍କୁ ପ୍ରତି କିଲୋଗ୍ରାମ ଗହମ ପାଇଁ ୨ ଟଙ୍କା ଓ ପ୍ରତି କିଲୋଗ୍ରାମ ଚାଉଳ ପାଇଁ ୩ ଟଙ୍କା ଦେଉଛନ୍ତି । ଏହା ବ୍ୟତିତ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ସରକାର ପ୍ରତିମାସ ୩.୨ କୋଟି ଟନ୍ ଖାଦ୍ୟ ଶଷ୍ୟ ହିତାଧିକାରୀଙ୍କୁ ମାଗଣାରେ ଦିଆଯାଉଛି ।
କେନ୍ଦ୍ରସରକାର ଗୋଟିଏ ରାଷ୍ଟ୍ର ଗୋଟିଏ ରାସନ କାର୍ଡ ଯୋଜନା ଉପରେ ବି କାମ କରୁଛନ୍ତି । ଏହା ମାଧ୍ୟମରେ ପ୍ରବାସୀ ଶ୍ରମିକମାନେ ଯେଉଁଠାରେ ରହିଲେ ବି ସେଠାରୁ ସରକାରଙ୍କ ଦ୍ୱାରା ପ୍ରଦତ ରିହାତି ଦରରେ ଖାଦ୍ୟ ସାମଗ୍ରୀ ନେଇ ପାରିବେ ।
୪୪ ଲକ୍ଷ ନକଲି ରାସନ କାର୍ଡ ଜବତ୍ ହେବା ପରେ ବିଭାଗୀୟ ଅଧିକାରୀ ଏବେ ଚିନ୍ତାରେ ପଡିଛନ୍ତି । ଏହା ମଧ୍ୟରେ କିଛି ଲୋକଙ୍କର ମୃତ୍ୟୁ ହୋଇଯାଇଥିଲେ ବି ସେମାନଙ୍କ ନାମରେ ରିହାତି ରାସନ ସାମଗ୍ରୀ ଉଠାଯାଉଛି । କିଛି ଲୋକଙ୍କ ନାମରେ ଦୁଇଟି ଲେଖାଏଁ ରାସନ କାର୍ଡ ଇସ୍ୟୁ ହୋଇଛି । ଏଭଳି ଚଂଚକତା କିଏ କରିଛି ତାହା ଏବେ ବିଭାଗ ଦ୍ୱାରା ଅନୁସନ୍ଧାନ କରାଯାଉଛି ।