ଆସନ୍ତା ୨୬ ତାରିଖରେ ମୋଦି ସରକାରକୁ ପୁରୁଛି ଚତୁର୍ଥ ବର୍ଷ । ଆଉ ଏହାକୁ ନେଇ ବିଜେପି ଶିବିରରେ ଦେଖାଦେଇଛି ଅନେକ ଉତ୍ସାହ । ୪ବର୍ଷ ମଧ୍ୟରେ କେନ୍ଦ୍ରରେ ନିଜର ଦବଦବା ଜାହିର କରି ଦେଶର ୨୧ଟି ରାଜ୍ୟରେ ନିଜର ସରକାର ଗଢ଼ିବାରେ ସମର୍ଥ ହୋଇଛି ବିଜେପି । ତେଣୁ ଦେଶସାରା ମୋଦି ମ୍ୟାଜିକ ସହିତ ଗେରୁଆ ରଙ୍ଗରେ ରଙ୍ଗୀନ ସଫଳତାକୁ ବଖାଣିବା ପାଇଁ ଯୋଜନା କରୁଛି ବିଜେପି । ଅନ୍ୟପଟେ କଂଗ୍ରେସ ମୋଦି ସରକାରଙ୍କ ଚତୁର୍ଥ ଇନିଂସକୁ “ବିଶ୍ୱାସଘାତ ଦିବସ’ ଭାବେ ପାଳନ କରିବା ପାଇଁ ଘୋଷଣା କରିଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ କଂଗ୍ରେସର ଜେନେରାଲ ସେକ୍ରେଟାରୀ ଅଶୋକ ଗେହଲଟ ଏବଂ କଂଗ୍ରେସ ମୁଖ୍ୟ ମୁଖପାତ୍ର ରଣଦୀପ ସିଂ ସୁରଜେୱାଲା ଏକ ସମ୍ବାଦିକ ସମ୍ମିଳନୀରେ ମେ ୨୬ ତାରିଖକୁ “ବିଶ୍ୱାସଘାତ ଦିବସ’ ଭାବେ ପାଳନ କରିବା ପାଇଁ ଘୋଷଣା କରିଛନ୍ତି । ଏହି ଦିବସ ପାଳନ କରିବା ଯଥାର୍ଥ ହେଉଛି ଯେ ଆସନ୍ତା ୨୦୧୯ ନିର୍ବାଚନ ପୂର୍ବରୁ ଜନସାଧାରଣଙ୍କୁ ଏକତ୍ରିତ କରି ମୋଦି ସରକାରଙ୍କ ବିଫଳତା ବିଷୟରେ ଜଣାଇବ ବୋଲି କହିଛି କଂଗ୍ରେସ । ଗେହଲଟଙ୍କ କହିବା ଅନୁଯାୟୀ ବର୍ତ୍ତମାନ କଂଗ୍ରେସ ୨୦୧୯ ନିର୍ବାଚନ ମିଶନରେ ଫୋକସ କରୁଛି ତେଣୁ ହାଇକମାଣ୍ଡ ରାହୁଲ ଗାନ୍ଧୀଙ୍କ ନିର୍ଦ୍ଦେଶ ଅନୁସାରେ ଗତ ମାସ ୨୯ ତାରିଖରେ ‘ଆକ୍ରୋଶ’ ର୍ୟାଲି କରିଥିଲା କଂଗ୍ରେସ । ଯାହାଦ୍ୱାରା ଏଭଳି ଦୁର୍ନୀତି ଖୋର ମୋଦି ସରକାରଙ୍କ ଅସଲ ଚେହେରା ଜନସମ୍ମୁଖକୁ ଆଣିବା କଂଗ୍ରେସର ପ୍ରୟାସ ବୋଲି ଗେହଲଟ କହିଛନ୍ତି । ଏପରିକି ମୋଦି ସରକାର ସମସ୍ତ କ୍ଷେତ୍ରରେ ଜନସାଧାରଣଙ୍କୁ ଧୋକା ଦେଇଥିବା ଅଭିଯୋଗ କରିଛି ଜାତୀୟ କଂଗ୍ରେସ ।
ଆସନ୍ତା ୨୬ ତାରିଖ ଶନିବାର ଦିନ ଦେଶବ୍ୟାପୀ ବିଶ୍ୱାସଘାତ ଦିବସ ଭାବେ ପାଳନ କରିବ କଂଗ୍ରେସ । ଦେଶର ସମସ୍ତ ରାଜ୍ୟ କଂଗ୍ରେସ ଶାଖା କାର୍ଯ୍ୟାଳୟ ଜିଲ୍ଲାୱାରୀ ଧାରଣା ସହ ପ୍ରତିବାଦ କରିବ କଂଗ୍ରେସ ବୋଲି ସୁଚନା ମିଳିଛି । ମୋଦି ସରକାର ନିର୍ବାଚନୀ ଇସ୍ତାହାରରେ ଅନେକ ପ୍ରତିଶ୍ରୁତି ଦେଇଥିଲେ କିନ୍ତୁ ସବୁଦିଗରେ ଫେଲ୍ ମାରିଛି ତାଙ୍କ ପ୍ରତିଶ୍ରୁତି । କଂଗ୍ରେସ କହିଛି ୨କୋଟି ନିଯୁକ୍ତି , ଚାଷୀଙ୍କୁ ୫୦ ପ୍ରତିଶତ ଇନପୁଟ୍ ସବସିଡି, ଦଳିତ ଆଦିବାସୀ ମାନଙ୍କୁ ସୁରକ୍ଷା ଦବାରେ ପ୍ରତିଶ୍ରୁତି, କଳା ଟଙ୍କା କୁ ସାର୍ବଜନୀନ କରି ଜନତାଙ୍କ ବ୍ୟାଙ୍କ ଖାତାକୁ ଦେବାର ପ୍ରତିଶ୍ରୁତି କୁଆଡେ ଗଲା, ବୋଲି ପ୍ରଶ୍ନ କରିଛି କଂଗ୍ରେସ । ଏଭଳି ସବୁ ପ୍ରସଙ୍ଗକୁ ନେଇ ଆସନ୍ତା ୨୬ରେ ବିଜେପି ପାଳିବାକୁ ଥିବା ୪ର୍ଥ ବର୍ଷ ପୂର୍ତ୍ତିକୁ ଫିକା କରିବା ପାଇଁ ଅଣ୍ଟା ଭିଡିଛି କଂଗ୍ରେସ ।