ବିସ୍ଫୋରଣ ପରେ ଆକ୍ସନ । ରାଜଭବନ ନିକଟ ପେଟ୍ରୋଲ ପମ୍ପକୁ ସିଲ କଲା ଆଇଓସିଏଲ : ସୁରକ୍ଷା ଦୃଷ୍ଟିରୁ ନିଆଗଲା ପଦକ୍ଷେପ
କନକ ବ୍ୟୁରୋ : ରାଜଧାନୀର ରାଜବଭବନ ନିକଟରେ ପେଟ୍ରୋଲ ପମ୍ପରେ ବିସ୍ଫୋରଣ ଘଟଣା । ପେଟ୍ରୋଲ ପମ୍ପକୁ ସିଲ୍ କଲା ଇଣ୍ଡିଆନ ଅଏଲ କର୍ପୋରେସନ । ଗତ ବୁଧବାର ଦିନ ହଠାତ ଉକ୍ତ ପେଟ୍ରୋଲ ପମ୍ପରେ ବିସ୍ଫୋରଣ ହୋଇଥିଲା । ଏହି ବିସ୍ଫୋରଣ ସିଏନଜି ଗ୍ୟାସ୍ ସିଲିଣ୍ଡର ଲିକ୍ ରୁ ହୋଇଥିବା ନେଇ ସୂଚନା ଦେଇଥିଲେ କମିଶନରେଟ୍ ପୋଲିସ । ଦୁର୍ଘଟଣାରେ କେତେ ଲୋକଙ୍କ ଜୀବନ ଯାଇଛି ସେନେଇ ଏଯାଏ ସ୍ପଷ୍ଟ ହୋଇପାରି ନାହିଁ । ସେପଟେ ବିସ୍ଫୋରଣ ଘଟିଥିବା ସିଏନଜି ଷ୍ଟକ ଏବେ ବି ବିପଦମୁକ୍ତ ହୋଇନଥିବା ଜଣାପଡିଛି । ବିସ୍ଫୋରଣ ଦିନ କମିଶନରେଟ୍ ପୋଲିସ ପକ୍ଷରୁ ପେଟ୍ରୋଲ ଟାଙ୍କିର ୨ କିଲୋମିଟର ପରିଧିକୁ କିଛି ସମୟ ପାଇଁ ସିଲ୍ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଆଜି ପେଟ୍ରୋଲ ବିତରଣ କମ୍ପାନୀ ଇଣ୍ଡିଆନ ଅଏଲ କର୍ପୋରେସନ ତା ନିଜ ତରଫରୁ ପେଟ୍ରୋଲ ପମ୍ପଟିକୁ ସିଲ୍ କରିଛି । ଏହା ସହ ମୃତକଙ୍କ ପରିବାରକୁ ୮ ଲକ୍ଷ ଟଙ୍କାର ସହାୟତା ଘୋଷଣା କରିବା ସହ ଗୁରୁତର ଓ ଆହତ ମାନଙ୍କ ଚିକିତ୍ସା ପାଇଁ ବି ଆର୍ଥିକ ସହାୟତା ଯୋଗାଇଛି କମ୍ପାନୀ । ଅନ୍ୟପଟେ ସମସ୍ତ ଆହତ ମାନଙ୍କ ମାଗଣା ଚିକିତ୍ସା ହେବ ବୋଲି ବିସ୍ଫୋରଣ ଦିନ ମୁଖ୍ୟମନ୍ତ୍ରୀ ଘୋଷଣା କରିଥିଲେ । ଅନ୍ୟପଟେ ସାରା ରାଜ୍ୟରେ ପେଟ୍ରୋଲ ପମ୍ପର ନିରାପତ୍ତା ନେଇ ଯାଂଚ ହେବ ବୋଲି ସରକାରଙ୍କ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି ।
ପେଟ୍ରୋଲପମ୍ପରେ ବିସ୍ଫୋରଣକୁ ନେଇ ଏସବୁ ବାଦ ସବୁଠାରୁ ବଡକଥା ହେଉଛି ପେଟ୍ରୋଲ ପମ୍ପର କିଛି କର୍ମଚାରୀ ଏଯାଏ ନିଖୋଜ ଥିବା କଥା ସେମାନଙ୍କ ପରିବାର ଲୋକେ ଅଭିଯୋଗ କରିଥିଲେ ବି ଏହାକୁ ଗୁରୁତ୍ୱ ଦିଆଯାଉନଥିବା ଦେଖିବାକୁ ମିଳିଛି । ଏନେଇ କୋଲକତାରୁ ମରାମତି ପାଇଁ ଆସିଥିବା ଜଣେ ଯୁବକର କିଛି ପତ୍ତା ମିଳୁନାହିଁ । ଏନେଇ ତାଙ୍କ ପରିବାର ଲୋକେ ପେଟ୍ରୋଲପମ୍ପରେ ପହଂଚି ଅଧିକାରୀଙ୍କ ସହ କଥା ହେବା ପରେ ନିରାଶ ହୋଇ ଫେରିଛନ୍ତି ।