ଆକାଶରୁ ଖସିଲା ମୃତ୍ୟୁ : ବର୍ଷା ସାଙ୍ଗକୁ ମାରିଲା ବିଜୁଳି, ଘଡ଼ଘଡ଼ି; ମୟୁରଭଞ୍ଜ ଜିଲ୍ଲାର ଦୁଇଟି ସ୍ଥାନରେ ବଜ୍ରାଘାତ ହେବାରୁ ୪ ଜଣଙ୍କ ମୃତ୍ୟୁ
କନକ ବ୍ୟୁରୋ : ମୟୁରଭଞ୍ଜ ଜିଲ୍ଲାର ଦୁଇଟି ସ୍ଥାନରେ ବଜ୍ରାଘାତ ହେବାରୁ ୪ ଜଣଙ୍କ ମୃତ୍ୟୁ ହୋଇଛି । ବାଘୁଆଶୋଳ ଗାଁର ଦଶମ ଶ୍ରେଣୀ ଛାତ୍ର ବବୁଲୁ ନାୟକ, ଷଷ୍ଠ ଶ୍ରେଣୀ ଛାତ୍ରୀ ବର୍ଷା ନାୟକ ଏବଂ ନମବ ଶ୍ରେଣୀ ଛାତ୍ର ସୁଜିତ ନାୟକ, ଘରୁ ଶହେ ମିଟର ଦୂର ପଡିଆକୁ ଛେଳି ଚରାଇବାକୁ ଯାଇଥିଲେ । ଏହି ସମୟରେ ଜୋରରେ ବର୍ଷା ସାଙ୍ଗକୁ ପ୍ରବଳ ବଜ୍ରପାତ ହୋଇଥିଲା । ପାଖରେ ଥିବା ଏକ ଗଛ ମୁଳକୁ ୩ ଜଣ ଧାଇଁ ଯାଇଥିଲେ । ଆଉ ଠିକ୍ ଏହି ସମୟରେ ହଠାତ୍ ଜୋରରେ ଏକ ବଜ୍ରପାତ ହୋଇଥିଲା । ଆଖି ପିଛୁଳାକେ ବବୁଲୁ, ବର୍ଷା ଓ ସୁଜିତ ଚେତା ହରାଇ ଗଛ ମୁଳେ ପଡ଼ିଯାଇଥିଲେ । ତୁରନ୍ତ ସେମାନଙ୍କୁ ବାରିପଦା ମେଡ଼ିକାଲକୁ ନିଆଯାଇଥିଲା । ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ସେହିପରି ଶୁଳିଆପଦା ବ୍ଲକ ଚୁହାଟ ପଂଚାୟତର ବଡନାଚଣା ଗାଁରେ ଅନୁପମା ବିଶ୍ୱାଳଙ୍କ ବଜ୍ରାଘାତରେ ମୃତ୍ୟୁ ହୋଇଥିବାବେଳେ ତାଙ୍କ ପୁଅ ଡମ୍ବରୁଧର ସଂକଟାପନ୍ନ ଅବସ୍ଥାରେ ଚିକିତ୍ସିତ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତବର୍ଷ ଏପ୍ରିଲ ମାସରୁ ଚଳିତବର୍ଷ ମାର୍ଚ୍ଚ ମାସ, ଗୋଟିଏ ବର୍ଷ ଭିତରେ ଓଡ଼ିଶାରେ ୨୦ ଲକ୍ଷ ୪୩ ହଜାର ଥର ବିଜୁଳି ମାରିଛି । ତାପୂର୍ବ ବର୍ଷ ତୁଳନାରେ ଓଡ଼ିଶାରେ ଏହାର ହାର ୩୭ ପ୍ରତିଶତ ବଢ଼ିଛି । ବଜ୍ରପାତର ତୀବ୍ରତା ଏବଂ ବଜ୍ରପାତର ସଂଖ୍ୟା ଯୋଗୁଁ ବଜ୍ରାଘାତ ଜନିତ ମୃତ୍ୟୁ ସଂଖ୍ୟା ବଢ଼ିଥାଏ । ବିଗତ ଗୋଟିଏ ବର୍ଷ ଭିତରେ ଆମ ଦେଶରେ ୧ ହଜାର ୬୯୭ ଜଣଙ୍କର ବଜ୍ରାଘାତରେ ମୃତ୍ୟୁ ହୋଇଛି । ବିହାରରେ ସର୍ବାଧିକ ୪୦୧ ଜଣଙ୍କର ମୃତ୍ୟୁ ହୋଇଛି । ଗଛ ତଳେ ରହିବା କାରଣରୁ ପ୍ରାୟ ୭୦% ବଜ୍ରାଘାତ ହେଉଥିବା ବେଳେ ଖୋଲା ଆକାଶ ତଳେ ଥିବା ସମୟରେ ୨୫% ଲୋକ ବଜ୍ରାଘାତରେ ମୃତ୍ୟୁବରଣ କରୁଛନ୍ତି ।
ଗ୍ଲୋବାଲ ୱାରର୍ମିଂ, ଜଙ୍ଗଲ କ୍ଷୟ, ଜଳସ୍ତର ପତନ, କଂକ୍ରିଟକରଣ, ପ୍ରଦୁଷଣ ବୃଦ୍ଧିର ଏକ ବଡ଼ ପ୍ରଭାବ ପରିବେଶ ଉପରେ ପଡୁଛି । ଆଉ ଏହାର ପ୍ରତିକ୍ରିୟା ଭାବେ ବଜ୍ରାଘାତ ଭଳି ପ୍ରାକୃତିକ ଅଘଟଣ ଘଟିଥାଏ । ଆଫ୍ରିକା ମହାଦେଶରେ ସବୁଠୁ ଅଧିକ ବଜ୍ରାଘାତ ଜନିତ ମୃତ୍ୟୁ ହୋଇଥାଏ । ଏହା ପଛକୁ ଏସିଆ, ଦକ୍ଷିଣ ଆମେରିକା, ଉତ୍ତର ଆମେରିକା ଏବଂ ଅଷ୍ଟ୍ରେଲିଆ ରହିଛି । ପ୍ରଶ୍ନ ହେଉଛି ବଜ୍ରାଘାତ ଜନିତ ମୃତ୍ୟୁକୁ କେମିତି କମ୍ କରି ହେବ ? ବଜ୍ରାଘାତକୁ ସଂପୂର୍ଣ୍ଣ ରୋକିବା ଅନ୍ତତଃ ବର୍ତ୍ତମାନ ପକ୍ଷେ ସଂଭବ ନୁହେଁ । ତେବେ ବଜ୍ରାଘାତ ସମ୍ପର୍କରେ ଲୋକଙ୍କୁ ଆଗୁଆ ସତର୍କ ସୂଚନା ଦିଆଯାଇପାରିବ । ଘର ଓ କିମ୍ବା ବସତିରେ ବଜ୍ରାଘାତ ପ୍ରତିରୋଧୀ ଉପକରଣର ବ୍ୟବହାର କରାଯାଇପାରିବ ।