ଉତ୍ତରାଖଣ୍ଡ ତପୋବନ ଟନେଲରୁ କେମିତି ଉଦ୍ଧାର ହେଲେ ଶ୍ରମିକ ? ଭୟାନକ ହିମସ୍ଖଳନର ୩୬ ଘଂଟା ପରେ ଆସିଲା ସାଘାଂତିକ ଚିତ୍ର

ଟନେଲର ରେଲିଂକୁ ଧରି ଯବାନଙ୍କ ସହାୟତାରେ ବାହାରକୁ ବାହାରିଲେ ଫସିଥିବା ଶ୍ରମିକ; ଏବେବି ଉଦ୍ଧାର କାର୍ଯ୍ୟ ଜାରି

ଦେଶ ବିଦେଶନ୍ୟୁଜ୍
By Rituparna Routray
145

କନକ ବ୍ୟୁରୋ : ଉତ୍ତରାଖଣ୍ଡ ତପୋବନ ଟନେଲରେ ଫସିଥିବା ଶ୍ରମିକଙ୍କୁ ଉଦ୍ଧାର ସମୟର ଚିତ୍ର ସାମ୍ନାକୁ ଆସିଛି । ଦୀର୍ଘ ପ୍ରାୟ ୩୬ ଘଂଟା ଫସି ରହିବା ପରେ ଶ୍ରମିକ ଉଦ୍ଧାର ପାଇଛନ୍ତି । ରବିବାର ହିମ ସ୍ଖଳନ ପରେ ଏହି ଟନେଲ ସଂପୂର୍ଣ୍ଣ ରୁଦ୍ଧ ହୋଇଯାଇଥିଲା । ଟନେଲକୁ ଅବରୋଧ କରିଥିବା ମାଟି କାଦୁଅକୁ ହଟାଛନ୍ତି ଉଦ୍ଧାରରେ ନିୟୋଜିତ ଯବାନ । ଏହାପରେ ଶ୍ରମିକଙ୍କ ପାଖରେ ପହଂଚିବାକୁ ସମର୍ଥ ହୋଇଛନ୍ତି ।

ତେବେ ସଂକୀର୍ଣ୍ଣ ଟନେଲରେ ଅତି ସତର୍କତାର ସହିତ ଉପରେ ଥିବା ରେଲିଂକୁ ଧରି ଧିରେଧିରେ ବାହାରକୁ ବାହାରିଛନ୍ତି ଶ୍ରମିକ । ଟନେଲ ଭିତରେ ଆଲୋକ ନଥିବାବେଳେ ଟର୍ଚ୍ଚ ଲାଇଟ ପକାଇ ବାଟ ଦେଖାଇଥିଲେ ଉଦ୍ଧାରକାରୀ ଦଳ । ଆଉ ଶେଷରେ ଟନେଲର ଏକ ସଂକୀର୍ଣ୍ଣ ରାସ୍ତା ଦେଇ ପଦାକୁ ବାହାରିବା ପାଇଁ ସମର୍ଥ ହୋଇଛନ୍ତି ଫସିରହିଥିବା ଶ୍ରମିକ । ଏହି ଚିତ୍ର ସାମ୍ନାକୁ ଆସିବା ପରେ ମୃତ୍ୟୁର ଏହି ଟନେଲ ଭିତରେ କେମିତି ଥିଲା ଶ୍ରମିକଙ୍କ ଅବସ୍ଥା ତାହା ଧିରେଧିରେ ଜଣାପଡୁଛି ।

ସେପଟେ ଉତରାଖଣ୍ଡ ଚମୋଲି ଜିଲ୍ଲାରୁ ଆଉ ୨ଟି ମୃତଦେହ ଉଦ୍ଧାର ହୋଇଛି । ରେଣୀ ଗାଁ ନିକଟରୁ ମିଳିଛି ଏହି ମୃତଦେହ । ଫଳରେ ଏପର୍ଯ୍ୟନ୍ତ ମୃତ୍ୟୁ ସଂଖ୍ୟା ୨୮ରେ ପହଂଚିଛି । ଅନ୍ୟ ନିଖୋଜ ଶ୍ରମିକମାନଙ୍କ ଅନୁସନ୍ଧାନ ଜାରି ରହିଛି । ପ୍ରଥମ ଟନେଲର ୧୨୦ ମିଟର ଭିତରେ ପହଂଚି ସାରିଛନ୍ତି ଉଦ୍ଧାରକାରୀ ଦଳ । ଆଇଟିବିପି, ସେନା, ଏନଡିଆରଏଫ ଓ ଏସଡିଆରଏଫର ମିଳିତ ଟିମ୍ ତପୋବନ ଟନେଲରେ ପହଂଚିବାକୁ ସମର୍ଥ ହୋଇଛି ।

ହେଲେ ଦ୍ୱିତୀୟ ଟନେଲରୁ, ଅବରୋଧ ହଟାଇ ଶ୍ରମିକମାନଙ୍କ ପାଖରେ ପହଂଚିବା ଏପର୍ଯ୍ୟନ୍ତ ସମ୍ଭବ ହୋଇନାହିଁ । ରବିବାର ଭୟାନକ ହିମସ୍ଖଳନକୁ ୩୬ ଘଂଟାରୁ ବି ଅଧିକ ସମୟ ବିତିଗଲାଣି । ତେଣୁ ମାଟିତଳେ କିମ୍ବା ସୁଡଙ୍ଗ ଭିତରେ ଫସିରହିଥିବା ଶ୍ରମିକ ମାନଙ୍କ ଅବସ୍ଥିତିକୁ ନେଇ ସନ୍ଦେହ ବଢିବାରେ ଲାଗିଛି ।

ସମ୍ବନ୍ଧିତ ଖବର More from author