କନକ ବ୍ୟୁରୋ : ପଞ୍ଚମ ପାଳିର ପ୍ରଥମ କ୍ୟାବିନେଟ ବୈଠକରେ ବଡ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଉଭୟ ଚାଷୀ ଓ ଏସଏଚଜି ମହିଳାଙ୍କୁ ବଡ ଉପହାର ଦେଇଛନ୍ତି ନବୀନ । ପୂର୍ବ ପ୍ରତିଶୃତି ମୁତାବକ ସରକାର ଗଠନର ପ୍ରଥମ ଦିନରେ ଚାଷୀଙ୍କ ଆକାଉଣ୍ଟକୁ କାଳିଆ ଟଙ୍କା ପଠାଇଛନ୍ତି ନବୀନ ସରକାର । ଏପରିକି କାଳିଆ ଯୋଜନାକୁ ବର୍ଦ୍ଧିତ କରାଯାଇ ଏଥିରେ ଆହୁରି ୩୩ ଲକ୍ଷ ପରିବାରକୁ ସାମିଲ କରାଯିବ ବୋଲି ଘୋଷଣା କରିଛନ୍ତି ନବୀନ । ଏହାସହ କାଳିଆ ଯୋଜନାରେ ୭୫ ଲକ୍ଷ ପରିବାରକୁ ସାମିଲ କରାଯିବ ବୋଲି ସ୍ପଷ୍ଟ କରିଛନ୍ତି ନବୀନ । ପୂର୍ବରୁ କାଳିଆ ଯୋଜନାରେ ୪୨ ଲକ୍ଷ ଚାଷୀ ପରିବାରକୁ ସାମିଲ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନ ପୂର୍ବରୁ ରାଜ୍ୟର ଅଧିକାଂଶ ଚାଷୀଙ୍କ ନିକଟକୁ କାଳିଆ ଟଙ୍କା ଯାଇଥିବା ବେଳେ ନିର୍ବାଚନ ସମୟରେ ଏହା ଉପରେ ରୋକ ଲଗାଇଥିଲେ ନିର୍ବାଚନ କମିଶନ । ତେବେ ସରକାର ଗଠନର ପ୍ରଥମ ଦିନରେ କାଳିଆ ଟଙ୍କା ଚାଷୀଙ୍କୁ ମିଳିବ ବୋଲି ନିର୍ବାଚନ ସଭାରେ ସ୍ପଷ୍ଟ କରିଥିଲେ ନବୀନ । ଆଉ ଆଜି ସରକାର ଗଠନର କିଛି ଘଣ୍ଟା ମଧ୍ୟରେ କାଳିଆ ଟଙ୍କା ପ୍ରଦାନ କରିଛନ୍ତି ନବୀନ । ଆଜି ପ୍ରାୟ ୮.୪ ଲକ୍ଷ ଚାଷୀ ପରିବାରଙ୍କ ଆକାଉଣ୍ଟକୁ କାଳିଆ ଯୋଜନାର ବାବଦକୁ ୫ ହଜାର ଟଙ୍କା ପ୍ରଦାନ କରିଛନ୍ତି ରାଜ୍ୟ ସରକାର । ବଳକା ଚାଷୀଙ୍କ ଆକାଉଣ୍ଟକୁ ମଧ୍ୟ ଖୁବଶୀଘ୍ର କାଳିଆ ଟଙ୍କା ପଠାଯିବ ବୋଲି କହିଛନ୍ତି ନବୀନ । ଏପରିକି କୌଣସି ଯୋଗ୍ୟ ହିତାଧିକାରୀ ଯେପରି କାଳିଆ ଯୋଜନାରୁ ବଞ୍ଚିତ ନ ହୁଅନ୍ତି ସେମାନଙ୍କୁ ମଧ୍ୟ ଦରଖାସ୍ତ ପକାଇବାର ସୁଯୋଗ ଦିଆଯିବ ବୋଲି କହିଛନ୍ତି ନବୀନ ।
ସେହିଭଳି ଏସଏଚଜି ମହିଳାଙ୍କ ପାଇଁ ୧୦୦୦ କୋଟିର କାମକୁ ଅନୁମୋଦନ କରିଛନ୍ତି ନବୀନ ସରକାର । ଯେଉଁଥିରେ ଏସଏଚଜି ମହିଳା ୪୦ ପ୍ରକାରର କାର୍ଯ୍ୟ କରିବେ । ସ୍କୁଲ ପିଲାଙ୍କ ମଧ୍ୟାହ୍ନ ଭୋଜନ ଠାରୁ ଆରମ୍ଭ କରି ସ୍କୁଲ ପିଲାଙ୍କ ପୋଷାକ ତିଆରି କରିବା ଭଳି କାର୍ଯ୍ୟ ରହିଛି । ମଞ୍ଜି ଉତ୍ପାଦନ,ଚାରା ରୋପଣ,ମାଛ ଚାଷ, ହସ୍ପିଟାଲକୁ ଖାଦ୍ୟ ଯୋଗାଣ, ମିଟର ରିଡିଂ ଓ ବିଲ ଆଦାୟ ଭଳି କାର୍ଯ୍ୟ ଦାୟିତ୍ୱ ଏସଏଚଜି ମହିଳା ଗ୍ରୁପକୁ ଦିଆଯିବ ବୋଲି କହିଛନ୍ତି ନବୀନ ।